اقتوعايدىڭ تاۋ-تاسىندا ويناپ وسكەن بالا داۋلەتتىڭ ارمانى اقسوراڭداي اسقاق ەدى. بالا كەزىنەن سپورتپەن شۇعىلدانعان جىگىت قاتارلاستارىنا قامقور بولا ءبىلدى. ەلگە جاردەم بەرگەندى جانى سۇيەتىن. ۇلكەندەردەن باتا العاندى ەڭ ۇلكەن باقىت سانايتىن. وسىلاي وسكەن پەرزەنت اۋەلدە ءورت ءسوندىرۋشى بولامىن دەپ ويلاماعان.
مەكتەبىن ءتامامداپ, اۋىلىنان قانات قاققان جاس داۋلەت قاراعاندىداعى پەداگوگيكالىق ينستيتۋتقا, دەنەشىنىقتىرۋ ماماندىعى بويىنشا وقۋعا تۇسەدى. ونى ويداعىداي ءبىتىرىپ, بالقاشتاعى №7 مەكتەپكە مۇعالىم بولىپ جۇمىسقا ورنالاسادى.
توقسانىنشى جىلدار. جۇرت جاپپاي بازارعا شىققان ۋاقىت. قارجى تاپشىلىعى داۋلەتكە دە سەزىلە باستاعان. وسى كەزدە ماردىمسىز جالاقى ماماندىعىن اۋىستىرتادى.
«ول كەزدە جارنامانى گازەتتەن, ايالدامادان كورۋشى ەدىك. سونداي قاپتاعان قاعاز ىلىنگەن تاقتانىڭ ىشىنەن «قۇتقارۋشى قابىلدايمىز» دەگەندى تاۋىپ الدىم. نەگە ەكەنىن بىلمەيمىن, كوڭىلىمە قاتتى جاقتى. سول شاقتا جەزقازعان وبلىسىنا قارايتىن ەدىك. مەدكوميسسيادان سول جاقتان وتكەنمىن», دەپ ەسكە الادى قۇتقارۋشى قاتارىنا قابىلدانعان شاعىن.
ءسويتىپ, 1993 جىلى بالقاشتاعى ءورت ءسوندىرۋ بولىمشەسىنىڭ بىرىنە جۇمىسقا دا قابىلدانادى. جارى كلارا كەنەجانوۆامەن بىرگە شاڭىراعىن دا كوتەرەدى. ەڭ العاش جۇمىسقا قابىلدانعانداعى مىنا ءبىر وقيعاسىن دا ەسىنە الىپ, اڭگىمەلەپ بەردى.
«تاڭعى تورتتە شاشۋباي شاعىن اۋدانىنان دابىل قاعىلدى. جەدەل جەتىپ باردىق. ءبىرىنشى قاباتتاعى پاتەردى وت شارپىعان ەكەن. ول كەزدە قازىرگىدەي ۇلكەن وتتەگى اپپاراتىمىز جوق. ايتەۋىر, تۇتىننەن قورعاناتىنىمىز بار. ءۇيدىڭ ىشىندەگى ەرلى-زايىپتىنى شىعارىپ الدىق. تۇپكىر بولمەدە ەكى بالا قالىپتى. ءورتتىڭ بەتى قاتتى. قانشا جەردەن قۇتقارۋشىمىز دەسەك تە, ۇلكەن تاۋەكەلدى قاجەت ەتەدى. سول ساتتە وي ۇستىندەگى مەنى الاپات كۇش ۇيگە الىپ كىردى. قىپ-قىزىل وتتىڭ ىشىنەن كوزىڭىزدى اشىپ ءجۇرۋ دەگەن ءتىپتى مۇمكىن ەمەس. ايتەۋىر, ءۇيدىڭ ءىشىن ويشا جوبالاپ, الگى بولمەنىڭ ەسىگىن تەۋىپ كىرىپ, ەكى بالانى الىپ شىققانىم ەسىمدە قالىپتى», دەيدى ول.
وسى ءبىر قۇتقارۋ جۇمىسىنان كەيىن, مىنا ءبىر ويدى سەرت ەتىپ الىپتى: ء«ورت ءسوندىرۋ ماماندىعى ويلانىپ تۇرۋدى قاجەت ەتپەيدى. ءورتتى وشىرۋدەن بۇرىن باستى ميسسيا – ادام ومىرىنە اراشا ءتۇسۋ. ويتكەنى تاپ سول تۇستا ادام جانى – بىزگە امانات».
مىنە, سودان بەرى ءمىنسىز قىزمەت ەتىپ كەلە جاتقان داۋلەت مۇقاتاي ۇلى ءورت ءسوندىرۋ سالاسىنىڭ ءتۇرلى قىزمەت ساتىسىنان وتەدى. 2010 جىلى №5 ءورت ءسوندىرۋ بولىمشەسىنىڭ قاراۋىل باستىعى بولىپ زەينەتكە شىعادى. مىقتى مامان, جەدەل قۇتقارۋ جۇمىسىن ۇتقىر ۇيىمداستىرا بىلگەن داۋلەت مۇقاتاي ۇلىن كىم جىبەرە سالسىن؟ بالقاشتاعى زاۋىتتىڭ «سەرىكتەستىك» اتتى ءورت ءسوندىرۋ بولىمشەسىندە №3 قاراۋىل باستىعى رەتىندە قىزمەتىن ءارى قاراي جالعايدى. ءالى دە – وسى قىزمەتتە.
ء«بىزدىڭ داۋلەت مۇقاتاي ۇلىنىڭ اۋەلى ادامي قاسيەتى جوعارى ەكەنىن اتاپ ءوتۋىمىز كەرەك. ۇجىمدا ۇلكەن بەدەلى بار اعامىز ۇنەمى كەيىنگى جاستارعا جول كورسەتىپ ءجۇر. تاڭداعان كاسىبىن ەرەكشە ىلتيپاتپەن, ادال دا ءمىنسىز اتقارادى», دەيدى ارىپتەستەرى.
قىسقاسى, داۋلەت مۇقاتاي ۇلى ءتىلسىز جاۋدىڭ ء«تىلىن» ۇعىپ, جالىندى جەدەل قۇرىقتاۋدىڭ جولىن ۇيىمداستىرا الاتىن تاجىريبەلى مامان, قادىرلى قۇتقارۋشى. وتىز جىلعى وراسان ەڭبەگى ەسكەرىلىپ, ومىراۋىنا «ورتكە قارسى قىزمەت ورگاندارىنداعى ءمىنسىز قىزمەتى ءۇشىن» مەدالىن تاققان.
قاراعاندى وبلىسى,
بالقاش قالاسى
