«دۇنيەجۇزى قازاقتارى قاۋىمداستىعى» رەسپۋبليكالىق قوعامدىق بىرلەستىگى, استانا مەديتسينا ۋنيۆەرسيتەتى, اكادەميك ە.دالەنوۆ اتىنداعى پروفيلاكتيكالىق مەديتسينا عىلىمي-زەرتتەۋ ينستيتۋتى بىرلەسىپ وتكىزگەن فورۋمعا ءداستۇرلى مەديتسينا سالاسىنىڭ ماماندارى مەن زەرتتەۋشى عالىمدار, جوعارى ساناتتاعى دارىگەرلەر, مەديتسينالىق جوعارى وقۋ ورىندارىنىڭ وقىتۋشىلارى مەن ءبىلىم الۋشىلارى قاتىستى. ءداستۇرلى مەديتسينا ماماندارىنىڭ بىلىكتىلىگىن جەتىلدىرۋ, دارىلەردىڭ رەسمي تىركەلۋى جانە ءداستۇرلى ەمنىڭ تيىمدىلىگى مەن قاجەتتىلىگى باياندالدى. سونداي-اق عىلىم مەن تەحنولوگيا جەتىستىگىنە سۇيەنىپ, زاماناۋي جانە ءداستۇرلى مەديتسينا ءادىس-تاسىلدەرىن عىلىمي نەگىزدە بىرىكتىرۋدىڭ مۇمكىندىگى تۇجىرىمدالدى.
– بۇل فورۋم قازاققا كەرەك. قازاق حالقى قانشا ءومىر سۇرسە, ءداستۇرلى مەديتسينا دا سونشا ءومىر ءسۇرىپ كەلەدى. وسى كۇنگە دەيىن ءوز جاراسىن ءوزى ەمدەپ, سىنىعىن سالىپ كەلگەنى بەلگىلى. قازاق مەديتسيناسىن زەرتتەيتىن ورتالىق اشىلۋى كەرەك دەپ ويلايمىن. كورشى مەملەكەتتەر باياعىدا ءداستۇرلى مەديتسينانى عىلىممەن ۇشتاستىرعان, – دەدى دۇنيەجۇزى قازاقتارى قاۋىمداستىعى توراعاسىنىڭ ورىنباسارى قارلىعاش حوجامۇرات.
ءداستۇرلى مەديتسينا – حالىقتىڭ قانىنا بىتكەن ءىلىم. دەگەنمەن حالىق ەمىنىڭ اتىن جامىلىپ, دەنساۋلىققا زيان جولمەن قىرۋار پايدا تاۋىپ وتىرعاندار دا بار. سول سەبەپتى وسى زامانداعى عىلىمي ادىستەمەلەردى قولدانىپ, ءداستۇرلى مەديتسينانى زەرتتەۋ ماڭىزدى.
– زاماناۋي مەديتسينانىڭ ىلىمدەرى مەن ادىستەمەلەرى ارقىلى ءداستۇرلى مەديتسينا نەگىزىن عىلىمي تۇردە قالىپتاستىرۋعا بولادى. مىسالى, وقۋ جۇيەسى بويىنشا جوعارى وقۋ ورنىن اياقتاعان ءبىلىم الۋشىلار ەكىنشى قوسىمشا ءبىلىمدى ءداستۇرلى مەديتسينادان الۋعا بولاتىنىن كوبى بىلمەيدى. بىزدە ءبىلىم جۇيەسى قالىپتاسقان. قازاق مەديتسيناسىن ءداستۇرلى مەديتسينانىڭ ۇلتتىق قۇرامى رەتىندە عىلىمي تۇردە نەگىزدەيىك, – دەگەن ۇسىنىس ايتتى ە.دالەنوۆ اتىنداعى پروفيلاكتيكالىق مەديتسينا عىلىمي-زەرتتەۋ ينستيتۋتىنىڭ اعا وقىتۋشىسى باعاي نازارباي ۇلى.
حالىق ەمىنىڭ جاناشىرلارى ءداستۇرلى مەديتسينانىڭ دامۋ باعدارلاماسىن جۇيەلەيتىن مەموراندۋم قابىلداپ, جۇيەلى تۇردە دامىتۋ تۋرالى باستاما كوتەردى.
