فوتو: senate_kz
«پرەزيدەنت قاسىم-جومارت كەمەل ۇلى توقاەۆ ۇلتتىق قۇرىلتايدىڭ تۇركىستان تورىندە وتكەن وتىرىسىندا جۇيەلى يدەولوگيالىق جۇمىستىڭ نەگىزگى باعىتتارىن بەلگىلەپ بەردى. بۇل باعىتتا تاريحي سانانى جاڭعىرتۋ, مادەني مۇرانى ناسيحاتتاۋ, وسكەلەڭ ۇرپاقتى تاربيەلەۋ ماسەلەسىنە باسا ءمان بەرىلدى», دەگەن م.اشىمباەۆ مەملەكەت باسشىسىنىڭ باستاماسىمەن مادەني مۇرانى جانە ۇلتتىق قۇندىلىقتاردى دارىپتەۋ باعىتىندا دا اۋقىمدى رەفورمالار ىسكە اسىرىلىپ جاتقانىن ايتتى.
سەنات توراعاسى ۇلتتىق قۇندىلىقتار, ەڭ الدىمەن, تىلىمىزگە, تاريحىمىزعا, مادەنيەتىمىزگە, داستۇرىمىزگە جانە دىنىمىزگە تابان تىرەيتىنىن جەتكىزدى.
«تاريحي سانانى قالىپتاستىرۋ ماڭىزدى مىندەتتەردىڭ ءبىرى. سونىڭ اياسىندا مەملەكەت باسشىسىنىڭ تاپسىرماسىمەن سەنات اشارشىلىق تاقىرىبى بويىنشا ءبىراز ارحيۆ قۇجاتتارىن جاريالادى. بۇگىنگە دەيىن جەتى توم جيناق ازىرلەندى. بۇل جۇمىس الداعى ۋاقىتتا دا جالعاسادى. حالقىمىز ەجەلدەن ءدىن مەن ءداستۇردى ساباقتاستىرا بىلگەن. كوشپەندى وركەنيەتكە ءتان وي ەركىندىگى, اشىقتىق, تولەرانتتىلىق ءارتۇرلى راديكالدى كوزقاراستارعا بوي ۇرماۋعا مۇمكىندىك بەردى. ءبىز ءدىن ماسەلەسىندە اتا-بابامىز قالىپتاستىرىپ كەتكەن جانە ۋاقىتتىڭ سىنىنان وتكەن وسى رۋحاني جولىمىزدان جاڭىلماۋىمىز كەرەك. ۇلتىمىزدىڭ ۇلىلارى اباي دا, شاكارىم دە, الاش قايراتكەرلەرى دە وسىعان ۇندەگەن», دەدى سەنات توراعاسى.
وتىرىس بارىسىندا قاتىسۋشىلار قوزعالعان ماسەلەگە قاتىستى پىكىر ءبىلدىرىپ, الداعى ۋاقىتتا بۇل باعىتتا بىرلەسىپ جۇمىس ىستەۋگە مۇددەلى ەكەندەرىن جەتكىزدى. سونداي-اق ءىس-شارادا ۇلتتىق قۇندىلىقتاردى وقىتۋ باعدارلامالارى, تسيفرلىق كوممۋنيكاتسيانىڭ زاماناۋي فورماتتارى جانە باسقا دا باستامالار ارقىلى دارىپتەۋ جونىندە تىڭ يدەيالار ايتىلدى.
ديالوگ الاڭىندا سەنات جانە ءماجىلىس دەپۋتاتتارىمەن قاتار ەلىمىزدىڭ ەڭبەك سىڭىرگەن ساۋلەتشىسى, مەملەكەتتىك ەلتاڭبانىڭ اۆتورى جانداربەك مالىبەكوۆ, جازۋشى, قوعام قايراتكەرى جابال ەرعاليەۆ, «قازاق گازەتتەرى» جشس-نىڭ باس ديرەكتورى, ۇعا اكادەميگى, الاشتانۋشى ديحان قامزابەك, جازۋشى, دراماتۋرگ روزا مۇقانوۆا, مادەنيەت قايراتكەرى قانات ايتباەۆ, حالىقارالىق دارەجەدەگى سپورت شەبەرى, «Qazaq boxing» مەكتەبىنىڭ جاتتىقتىرۋشىسى مۇحيت امانتاەۆ, «Unknownkazak» جوباسىنىڭ اۆتورى, بلوگەر دياس كامەريدانوۆ جانە تاعى باسقا ساراپشىلار قاتىسىپ, پىكىرلەرىن ايتتى.
