«جەڭىلگەننىڭ ءسوزى...». الەمنىڭ ۇزدىك شاحماتشىسى قازاقتان ۇتىلعانىن مويىنداماي سىلتاۋ ايتتى

دوحادا ءوتىپ جاتقان Qatar Masters Open حالىقارالىق ءتۋرنيردىڭ ەكىنشى كەزەڭىندە جەرلەسىمىز, الەمدىك رەيتينگتە (FIDE) 528-ساتىدا تۇرعان الىشەر سۇلەيمەنوۆ ماگنۋس كارلسەننىڭ ويىن دا, ويىنىن دا شىدەرلەپ تاستادى. 32 جاستاعى كارلسەن شاحماتتىڭ الەمدىك رەيتينگىندە توپ باستاپ تۇر.

قازاقتا «جەڭىلگەننىڭ ءسوزى قۇرىسىن» دەگەن ءسوز بار. ماگنۋس كارلسەن وزىنەن ون جاس كىشى, الەمدىك رەتينگتە قويۋ شاڭنىڭ اراسىنداعى الىشەر سۇلەيمەنوۆتىڭ جەڭىسىن مويىنداعىسى كەلمەگەندەي سىڭاي تانىتتى.  «ول ساعات تاعىپ كەلىپتى, مۇنداي  ءباسى جوعارى باسەكەدە ساعات تاعۋعا رۇقسات پا» دەپ تورەشىلەرگە شاعىمدانىپتى. تورەشى نە دەيدى؟ «اقىلدى ساعات» بولماسا بولدى, وزگەسىن  تاعۋىنا رۇقسات», دەپتى.

ون جىل بويى ەشكىم جالىن جىعا الماي الەمنىڭ الاقانىندا جۇرگەن ماگنۋستى بىلتىر 19 جاستاعى امەريكالىق  حانس نيمان دا جەڭگەن بولاتىن.  كارلسەن  حانس قيتۇرقىلىقپەن جەڭدى دەپ سوتقا دەيىن بارىپ تاتۋلاستى. بۇل جولى الىشەردىڭ تەگەۋرىنىنە توتەپ بەرە المادى. ماگنۋستىڭ «قارسىلاستىڭ ساعاتىنا قاراپ ويىمدى تياناقتاي المادىم» دەگەنى راسىمەن دە سىلتاۋ. الىشەر سۇلەيمەنوۆ تاريحي جەڭىسىنە العاشىندا ءوزى دە ابدىراپ قالعانىن ايتتى. وڭاي ما, ون جىل بويى الەم چەمپيوناتىندا ەشكىمگە ەسە جىبەرمەي كەلگەن مىقتىنىڭ مىسىن باسۋ!