ءبىر قۋانىشتىسى, بايقاۋ باستالعان العاشقى جىلدارعا قاراعاندا قاتىسۋشىلار كەنەن ازىرباەۆ شىعارمالارىنا تەرەڭ بويلاي باستاعان. اۋەلدە جان-جاقتان كەلگەن تالانتتى ونەرپازدار كومپوزيتوردىڭ «شىرقا, داۋسىم», «كوكشولاق», «قايران جاستىق» سەكىلدى ساناۋلى اندەرىن قايتالاپ شىرقاپ, كورەرمەندى جالىقتىرىپ جىبەرەتىن. ەندىگى كوزقاراس وزگەشە. ايتسە دە, الداعى ۋاقىتتا كەنەننىڭ ورىندالماي جاتقان وزگە دە شىعارمالارى قاتىسۋشىلار نازارىنان تىس قالماسا دەيسىڭ.
«دالا فولكلورىنىڭ مىڭ جىلى» ارنايى جوباسىن جۇزەگە اسىرۋ, قازاقتىڭ ايگىلى حالىق اقىنى, ءانشى, كومپوزيتور كەنەن ازىرباەۆتىڭ شىعارماشىلىعىن جاڭعىرتۋ ماقساتىندا ۇيىمداستىرىلعان بايقاۋعا 26 ءداستۇرلى ءانشىنىڭ قاتىسقانىن ايتا كەتكەن ءجون. ءار ءانشىنىڭ ءوز ءۇنى بار. باستىسى, ولاردىڭ بارلىعى دا ۇلكەن دايىندىقپەن كەلگەن. سودان دا بولسا كەرەك, كەنەن شىعارمالارىن جۇرەكپەن سەزىنىپ ورىندادى.
رەسپۋبليكالىق بايقاۋ قورىتىندىسىندا الماتى وبلىسىنان كەلگەن نۇرسۇلتان ەلەمەسوۆ باس جۇلدەگە لايىق دەپ تانىلىپ, 1 ميلليون تەڭگەنىڭ سەرتيفيكاتىنا يە بولسا, جۇلدەلى ءبىرىنشى ورىن تۇركىستان وبلىسىنىڭ ۇكىلى ءۇمىتى ماعجان ساتىبالدىعا بۇيىردى. قازىلار القاسىنىڭ شەشىمىمەن قاراعاندىلىق ماديار ومىرعالي مەن قوستانايلىق جاسۇلان وتەمۇراتوۆ ەكىنشى ورىندى يەلەنسە, ۇزدىك ۇشتىكتى جامبىلدىق ايدا سرايىل مەن استانالىق الۋا باۋىرجانقىزى تۇيىندەدى. سونداي-اق «كەنەن اتا» قورى تاعايىنداعان ارنايى جۇلدە جامبىلدىق ءانشى مەرەي ابۋەۆاعا تابىستالدى. كونكۋرس ديپلومانتى اتانعان جەتى قاتىسۋشى دا قارجىلاي سىيلىقتان قۇر قالعان جوق.
ءىس-شارا بارىسىندا كەنەن ازىرباەۆ اتىنداعى وبلىستىق فيلارمونيانىڭ 55 جىلدىعىنا ورايلاستىرىلىپ, ء«ان كەمەڭگەرى – كەنەن» اتتى گالا-كونتسەرت ۇيىمداستىرىلدى. وعان ەسىم-سويى ەلىمىزگە بەلگىلى ەسترادا جۇلدىزدارى قاتىسىپ, اننەن شاشۋ شاشتى.
بۇل كۇنى بالاساعۇن اتىنداعى ورتالىق كونتسەرت زالىنا جينالعان ونەرسۇيەر قاۋىم كەنەن ازىرباەۆتىڭ «تىك شىرقاۋ», «شىرقا, داۋسىم», «كوكشولاق», «ەڭبەكشى ەلىم», «بازار-نازار», «جاس ەكپىن», ء«مورتاي سۇلۋ», «ەل قۋانىشى» سەكىلدى وزگە دە اسەم اندەرىن سان ءتۇرلى داۋىس يەلەرىنىڭ شىرقاۋىندا تىڭداپ, قوشەمەت كورسەتتى.
تاراز
