بۇگىن فورۋمنىڭ باس سەرىكتەسى «Altyn Qyran Foundation» قوعامدىق قورى جانە ۇلتتىق سپورت قاۋىمداستىعى قوناقتارعا ارناپ سپورتتىق باعدارلاما ۇيىمداستىردى. باعدارلاما بارىسىندا ولار ۇلتتىق قۇندىلىقتارىمىزبەن ەتەنە تانىستى. اتاپ ايتقاندا, ۇلتتىق سپورت قاۋىمداستىعى مەن سالالىق سپورت فەدەراتسيالارىنىڭ ماماندارى ۇلتتىق ويىنداردان (توعىزقۇمالاق, اسىق اتۋ, ساداق اتۋ, قىز قۋ, اۋدارىسپاق, كوكپار, قۇسبەگىلىك) قويىلىم كورسەتتى. سونداي-اق قوناقتاردىڭ نازارىنا قولونەر شەبەرلەرى جاساعان ۇلتتىق بۇيىمدار دا ۇسىنىلدى.
قويىلىم الدىندا ءسوز العان ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ:
«كەزەكتى رەت ۇيىمداستىرىلىپ وتىرعان «وتانداستار فورۋمى» شەتەلدەردەگى قازاق ۇيىمدارىنىڭ باسىن قوساتىن اسا اۋقىمدى جيىن. «Altyn Qyran Foundation» قوعامدىق قورى جانە ۇلتتىق سپورت قاۋىمداستىعى وسىنداي ىرگەلى جوباعا قولداۋ كورسەتۋدى وزىنە اسا زور مارتەبە سانايدى. بارشاڭىزعا ءمالىم, ۇلتتىق سپورتتىڭ ارتىندا ۇلتىمىزدىڭ تاريحى, سالت-ءداستۇرى, نامىسى مەن رۋحى تۇر. ۇلتتىق سپورت قاۋىمداستىعى اتا-بابادان قالعان قاسيەتتى مۇرانى دامىتۋعا بار كۇشىن سالىپ وتىر. وتانى ءبىردىڭ – تىلەگى ءبىر! بەرەكە-بىرلىگىمىزبەن قازاقستاننىڭ مەملەكەتتىگىن نىعايتا تۇسەمىز دەگەن سەنىمدەمىن», دەدى.
سونداي-اق قاۋىمداستىق پرەزيدەنتى قانداستاردى كەلەسى جىلى استانادا وتەتىن V دۇنيەجۇزىلىك كوشپەندىلەر ويىنىنا شاقىردى.
