سونىمەن قاتار پرەزيدەنتكە «باتىس ەۋروپا – باتىس قىتاي» حالىقارالىق ءدالىزىنىڭ قىزىلوردا قالاسىنان اقتوبە وبلىسىنىڭ شەكاراسىنا دەيىنگى ارالىعىن (566 كم) ءى ساناتتاعى 4 جولاقتى جولعا اۋىستىرۋ جوسپارلانىپ وتىرعانى تۋرالى مالىمەت بەرىلدى.
وسى رەتتە اتالعان باعىتتاعى جۇمىستاردىڭ جوبالىق-سمەتالىق قۇجاتتامالارىن ازىرلەۋ كەلەسى جىلدان باستالادى.
مەملەكەت باسشىسى قازىرگى جول, شىن مانىندە, وتە تار ەكەنىن اتاپ ءوتىپ, ونى كەڭەيتۋ جۇمىستارىن تەزىرەك باستاۋ قاجەتتىگىنە نازار اۋداردى. بۇل رەتتە پرەزيدەنت پرەمەر-ءمينيستردىڭ ءبىرىنشى ورىنباسارى رومان سكليارعا ماسەلەنى باقىلاۋعا الۋ جونىندە تاپسىرما بەردى.
سونىمەن قاتار پرەزيدەنتكە قىزىلوردا قالاسىنىڭ جاڭا جىلۋ ەلەكتر ورتالىعىنىڭ جوباسى تانىستىرىلدى.
بىلتىر ەنەرگەتيكا مينيسترلىگى تۇركيالىق «Aksa Enerji Uretim AS» كومپانياسىمەن قىزىلوردا قالاسىندا جاڭا بۋ - گاز قوندىرعىسىن ورناتۋ جونىندە كەلىسىمشارتقا قول قويدى. شەتەلدىك ينۆەستيتسيا ەسەبىنەن سالىنىپ جاتقان جاڭا جەو 240مۆت ەلەكتر قۋاتىن جانە ساعاتىنا 277 جىلۋ قۋاتىن وندىرە الادى. جوبانىڭ بولجامدى قۇنى – 215 ميلليارد تەڭگە.
وبلىس اكىمىنىڭ ايتۋىنشا, قازىر قۇرىلىسقا دايىندىق جۇمىستارى قىزۋ ءجۇرىپ جاتىر. 2025 جىلدىڭ سوڭىنا دەيىن پايدالانۋعا بەرىلەتىن جەو قالانىڭ جىلۋ جانە ەلەكتر قاجەتتىلىگىن تولىق قامتاماسىز ەتىپ قانا قويماي, ارتىلعان ەلەكتر ەنەرگياسىن باسقا وڭىرلەرگە ساتۋعا مۇمكىندىك بەرەدى.
قازىرگى قولدانىستاعى جىلۋ ەلەكتر ورتالىعى 1964 جىلى سالىنعان. بىرنەشە رەت كۇردەلى جوندەۋ جۇرگىزىلسە دە, ستراتەگيالىق نىساننىڭ نەگىزگى جانە قوسالقى قوندىرعىلارىنىڭ توزۋ دەڭگەيى 90 پايىزعا جەتكەن. سونداي-اق قالاداعى ۇزىندىعى 207,7 شاقىرىم بولاتىن جىلۋ جەلىسىنىڭ جارتىسىنا جۋىعى جاڭارتۋدى قاجەت ەتەدى.
مەملەكەت باسشىسى ەلىمىزدىڭ ەنەرگەتيكالىق قاۋىپسىزدىگىن كۇشەيتۋ تۇرعىسىنان بۇل جوبانىڭ ماڭىزدى ەكەنىن اتاپ ءوتىپ, ۇكىمەت پەن وبلىس اكىمدىگىنە جىلۋ ەلەكتر ورتالىعىن بەلگىلەنگەن مەرزىمدە پايدالانۋعا بەرۋدى تاپسىردى.
بۇعان قوسا, پرەزيدەنتكە قىزىلوردا وبلىسى اكىمىنىڭ ورىنباسارى, قازاقستان رەسپۋبليكاسى پرەزيدەنتىنىڭ «بايقوڭىر» كەشەنىندەگى ارناۋلى وكىلى قايرات نۇرتاي كوسمودروم قالاشىعىنداعى احۋال تۋرالى باياندادى. قاسىم-جومارت توقاەۆ قالانى الەۋمەتتىك-ەكونوميكالىق تۇرعىدان دامىتۋ ءۇشىن رەسەي تاراپىمەن تىعىز قارىم-قاتىناستا جۇمىس ىستەۋ قاجەت ەكەنىنە نازار اۋداردى.
