– بەل جازىپ الايىق, تومەنىرەكتە بۇلاق بار, سۋى بال تاتيدى. قالاساڭىزدار, اناۋ تۇرعان زورماننىڭ ەسكەرتكىشىنە بارىپ, سۋرەتكە تۇسۋگە بولادى, ەستەلىك بولىپ قالادى عوي, اسىقپاڭىزدار.
ەسىمىن ءبىلىپ قويعانداي-اق ەكەن, ادامعا باۋىر تارتىپ تۇراتىن اقجارقىن مىنەزدى جۇرگىزۋشى ك ۇلىمدەگەن قالپى كولىگىنىڭ ارتقى ەسىگىن اشىپ, جۇكسالعىشىنان اۋزى تۇيىلگەن قارا پاكەت الىپ شىقتى. ەندى عانا بايقادىق, اناداي جەردەگى ءبىر ءتۇپ بوزقاراعاننىڭ قالقاسىندا قابىرعاسى ىرسيىپ ارىپ-اشقان الا توبەت جاتىر ەكەن. جارقىن الگى پاكەتتى سول ءيتتىڭ الدىنا اپارىپ اقتارا سالدى.
– «يەسىز يەن دالادا جۇرگەن بۇل نە توبەت؟» دەپ تۇرعان بولارسىزدار.
جانىمىزداعى سەمىز ايەلدىڭ «قاڭعىعان بۇرالقى يت ەمەس پە, ونى قايتەسىڭ, كەتەيىك تەزىرەك!» دەگەنىن ەستىمەگەندەي سىڭاي تانىتقان جۇرگىزۋشى ءسوزىن ءارى ساباقتادى. – شىنىمدى ايتسام, بۇل ءيتتىڭ بۇل جەردە قاشان, قالاي پايدا بولعانىن ءوزىم دە بىلمەيمىن. وسى جەردە جۇرگەنىنە بىرنەشە جىل بولدى. كەيبىر جۇرت ءارى-بەرى وتكەندە ادەيى توقتاپ, وسىلاي تاماق تاستاپ كەتەدى. ماڭايداعى مالشىلار بىرنەشە رەت بايلاپ الىپ كەتىپ, اسىراماق بولعان دەسەدى. قايتىپ وسى بۇلاقتىڭ باسىنا قاشىپ كەلە بەرەدى ەكەن. كەيدە بۇل ءبىر ءوتىپ بارا جاتقان كولىكتەردىڭ بىرىنەن قالىپ قويعان يت پە ەكەن دەگەن وي كەلەدى. ويتكەنى ماشينا قاي جەرگە توقتاسا, سول جەرگە جاقىنداپ بارادى. شاماسى, يەم كورىنىپ قالا ما ەكەن دەپ ۇمىتتەنەتىن سياقتى. ايتەۋىر الدەكىمدى ىزدەيتىنى, كۇدەر ۇزبەي بىرەۋدى كۇتەتىنى انىق. جاڭا سىزدەر ءتۇسىپ جاتقاندا دا سىرتتارىڭىزدان قالت ەتپەي قاراپ باعىپ تۇردى عوي. يەسى ادەيى تاستاپ كەتتى مە, الدە ءبىر باقىتسىزدىققا ۇشىراپ كەلە الماي قالدى ما, كىم ءبىلسىن؟...
كولىككە كوڭىلسىز بولىپ مىندىك. جارقىن دا باستاپقىداي ەمەس, جۇزىندە جايدارىلىقتىڭ ءىزى دە قالماعان. ارقالىققا جەتكەنشە ەشكىم جارىتىپ اڭگىمە ايتپادى. اركىم ءوز ويىمەن اۋرە.
ەرتەڭىندە بىرەۋلەر: «بۇرىن ول جەردە ءدامحانا بولعان. سودان قالعان يت شىعار» دەگەن بولجام ايتتى.
ارقالىقتان كەرى قايتقاندا باسقا كولىككە مىندىك. مۋزىكاسىن ايعايلاتىپ قويعان جاس جۇرگىزۋشى الگى اۆتوتۇراققا توقتاماي وتە شىقتى. تەرەزەدەن توبەت جاتقان جاققا ءۇڭىلىپ ەدىم, زورمان ەسكەرتكىشىن عانا كوزىم شالىپ قالدى. تاس تۇعىردىڭ ۇستىندە زورمان ەمەس, يت وتىرعانداي بولىپ كورىندى.
قوستاناي وبلىسى
