2023 جىلدىڭ ءبىرىنشى جارتىجىلدىعىندا IT قىزمەت ەل ەكونوميكاسىنا 476,8 ملرد تەڭگە الىپ كەلگەن. بۇل ءوسىمنىڭ 90 پايىزى استانا مەن الماتىعا تيەسىلى. كومپيۋتەرلىك باعدارلامالاۋ, كونسۋلتاتسيالىق جانە باسقا دا ىلەسپە قىزمەتتەر كولەمى بىلتىرعا قاراعاندا 56 پايىزعا ۇلعايعان. بۇل ەكونوميكانىڭ باقىلانبايتىن سەكتورىن قوسپاعانداعى كورسەتكىش ەكەنىن ەسكەرگەن ءجون.
جالپى, سەكتورداعى ءوسىم 2016 جىلدان بەرى بايقالىپ وتىر. تسيفرلىق قىزمەتتەردىڭ جاعدايى ءار قالادا ءارتۇرلى. دالىرەك ايتار بولساق, الماتىداعى كورسەتكىش 215,4 ملرد تەڭگەگە جەتسە, ەلوردادا 212,1 ملرد تەڭگەنى قۇراعان. ءۇشىنشى ورىندا باتىس قازاقستان وبلىسى تۇر – 7,1 ملرد تەڭگە. ەڭ تومەنگى كورسەتكىشتەر ۇلىتاۋ, تۇركىستان جانە جەتىسۋ وبلىستارىندا تىركەلگەن.
IT – سۇرانىسقا يە, سان قيلى سالا. ونىڭ ىشىندە باعدارلامالىق قامتاماسىز ەتۋدى قولداۋ قىزمەتتەرى مەن مەملەكەتتىك ەلەكتروندى اقپاراتتىق جۇيەلەردى قالىپتاستىرۋ, اقپاراتتىق-كوممۋنيكاتسيالىق ينفراقۇرىلىمدى باسقارۋ قىزمەتتەرى الدىڭعى قاتارعا شىعىپ تۇر.
ناتيجە – جاقسى. دەمەك ءونىمدى ارتتىراتىن وندىرۋشىلەر دە ارتۋى قاجەت. وسىعان وراي مەملەكەت باسشىسى 2025 جىلعا قاراي كەم دەگەندە 100 مىڭ جوعارى بىلىكتى IT ماماندى دايارلاۋ مىندەتىن قويىپ, تاپسىرما بەرگەن ەدى. پرەمەر-ءمينيستردىڭ رەسمي رەسۋرسىنا سۇيەنسەك, وتاندىق جوعارى وقۋ ورىندارىنىڭ IT فاكۋلتەتتەرىندەگى ستۋدەنتتەر سانى ارتىپ كەلەدى. سونداي-اق ءار وڭىردە زاماناۋي IT مەكتەپتەر سالۋ ساياساتى دا جۇزەگە اسىرىلىپ جاتىر. ونداي مەكتەپتەر يننوۆاتسيالىق ەكونوميكانى قۇرۋعا قاجەتتى كادرلىق بازانى تولىقتىرا تۇسەدى.
قازىر IT كاسىپتەردىڭ 70 پايىزى ءالى نارىققا شىقپاعان ۋاقىتتا ءومىر ءسۇرىپ جاتىرمىز. 2025 جىلعا قاراي الەمدە IT ازىرلەۋشىلەردىڭ تاپشىلىعى 17 ملن ادامدى قۇرايدى دەگەن بولجام بار.
