فوتو: اقوردا
پرەزيدەنت ءسوز باسىندا ەلىمىزدىڭ قادىرلى ۇستازدارىن ءتول مەرەكەلەرىمەن قۇتتىقتادى.
«بارشاڭىزدى رەسپۋبليكالىق پەداگوگتەر سەزىنىڭ اشىلۋىمەن قۇتتىقتايمىن. ۇستازدار كۇنى قۇتتى بولسىن! بۇگىن, شىن مانىندە, وتە ماڭىزدى جيىن. سەبەبى ۇستاز – ەڭ الدىمەن, قادىرلى مامان. ال, ۇستاز بولۋ – قاستەرلى مىندەت», دەدى مەملەكەت باسشىسى.
بۇگىندە ەلىمىزدىڭ بولاشاعى جارقىن بولىپ, دامىعان مەملەكەتكە اينالۋى ءۇشىن مۇعالىمدەر قاۋىمى ايانباي ەڭبەك ەتىپ ءجۇر. جالپى, كىم-كىمنىڭ دە جاقسى ادام, مىقتى مامان بولۋى ۇستازىنا بايلانىستى.
«احمەت بايتۇرسىن ۇلى ء«بىز ەلدى تۇزەۋدى بالا وقىتۋ ءىسىن تۇزەۋدەن باستاۋىمىز كەرەك» دەگەن. ۇلت ۇستازىنىڭ بۇل ءسوزى قاشاندا ورىندى. ءبىلىم مەن عىلىم – تابىسقا جەتۋدىڭ ەڭ باستى كىلتى. وسكەلەڭ ۇرپاققا تاعىلىمدى تاربيە جانە وزىق ءبىلىم بەرۋ – وتە ماڭىزدى مىندەت», دەدى ق.توقاەۆ.
پرەزيدەنتتىڭ باستاماسىمەن 2019 جىلى «پەداگوگ مارتەبەسى تۋرالى» جەكە زاڭ قابىلداندى. سوڭعى ءتورت جىلدا ۇستازداردىڭ جالاقىسى 2 ەسە ءوستى. جاقىندا بالاباقشا تاربيەشىلەرىنىڭ ايلىعى 30 پايىزعا كوبەيدى. ۇستازداردىڭ ەڭبەك دەمالىسى ۇزارتىلدى.
«مۇعالىمنىڭ مىندەتىنە كىرمەيتىن ارتىق جۇمىستىڭ ءبارى الىنىپ تاستالدى. ۇستازداردىڭ كاسىبي بىلىكتىلىگىن ارتتىرۋ ماسەلەسىنە باسا ءمان بەرىلىپ جاتىر. «بولاشاق» باعدارلاماسىمەن ءۇش جىلدا 220-عا جۋىق پەداگوگ شەتەلدە وقىپ كەلدى. مۇعالىم ماماندىعىن تاڭداعان جاستارعا قويىلاتىن تالاپ كۇشەيدى. وسى سالاداعى ستۋدەنتتەردىڭ ستيپەندياسى 2,5 ەسە كوبەيدى. ءبىر سوزبەن ايتقاندا, ءبىز, ەڭ الدىمەن, بىلىكتى ۇستاز دايارلاۋ ىسىنە ايرىقشا ءمان بەرىپ وتىرمىز», دەدى پرەزيدەنت ءوز بايانداماسىندا.
