سۋرەتتى تۇسىرگەن – دۋمان قۇرمانعاليەۆ
53898 اسكەري ءبولىمى كومانديرىنىڭ تاربيە جانە يدەولوگيالىق جۇمىستارى جونىندەگى ورىنباسارى, پودپولكوۆنيك ماقسات بۋراتاەۆ پريوزەرسكىدەن كەلگەن كىشكەنتاي مەيمانداردى قارسى الدى. بولاشاق ۇشقىشتارمەن قوسا اكەسى مەدەت تۇرامۇرادوۆ پەن اناسى راۋشان كۋدرەتوۆا, پريوزەرسك گارنيزونىنداعى قارۋلى كۇشتەر ارداگەرلەرى ۇجىمىنىڭ توراعاسى تىلەك كەنجەبەكوۆ جانە اقتوبە قالاسىنداعى ت.بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا ءبىلىم الىپ جۇرگەن كۋرسانتتار بولدى.
ءاليحان مەن ءماديحان پريوزەرسك قالاسىنداعى №1 جالپى ءبىلىم بەرەتىن مەكتەبىنىڭ 9 «ب» سىنىبىندا ءبىلىم الادى. وقۋدان بولەك, بوس ۋاقىتىندا سپورتپەن شۇعىلدانادى. ەكەۋى دە پريوزەرسك گارنيزونىنىڭ 06708 اسكەري بولىمىندەگى «جاس زەڭبىرەكشى» اسكەري-پاتريوتتىق كلۋبىنىڭ تاربيەلەنۋشىلەرى. قارۋلى كۇشتەردىڭ ارداگەرى تىلەك كەنجەبەكوۆ سەبەپكەر بولىپ, ءاليحان مەن ءماديحان بيىل وتكەن ءىح حالىقارالىق «ايبىن-2023» اسكەري-پاتريوتتىق جاستار جيىنىنا قاتىستى. وزدەرىنە بەرىلگەن الاۋدى بىرگە جاعۋ قۇرمەتىنە بولەندى.
– ءاليحان مەن ءماديحاننىڭ العىرلىعىنا تاڭعالامىن. بىردە كلۋب تاربيەلەنۋشىلەرىنىڭ باستارىن قوسىپ, ولاردان كەلەشەكتە قانداي ماماندىق تاڭدايتىنىن سۇرادىم. سوندا ەكەۋى دە ورنىنان بىرگە تۇرىپ, ۇشقىش بولۋدى ارماندايتىنىن جەتكىزدى. كۇتپەگەن ەدىم. قۋانىپ قالدىم. سودان ريزا بولدىم دا, اسكەري-پاتريوتتىق جاستار جيىنىنا الىپ باردىم. ەرىنبەي ەكەۋىن دە ەرتىپ الىپ, اشىق الاڭعا كەلىپ قونعان تىكۇشاقتى كورسەتتىم. تىكۇشاقتى باسقارعان اسكەري ۇشقىشتاردى كورگەن ءاليحان مەن ءماديحاننىڭ جۇزدەرىنەن ۇلكەن قۋانىشتى سەزىندىم. ەندى, مىنە, پريوزەرسك گارنيزونىنان بالقاش قالاسىنداعى اسكەري ۇشقىشتاردى دايارلايتىن وقۋ-جاتتىعۋ ورتالىعىنا جولىمىز ءتۇسىپ, بالالىق ارماندارىنىڭ ورىندالىپ جاتقانىنا كۋا بولدىق. الداعى ۋاقىتتا ءاليحان مەن ماديحانعا دۇرىس باعىت-باعدار بەرىپ, اقتوبەدەگى ت.بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا وقۋعا ءتۇسىپ كەتۋلەرىنە جول اشساق دەگەن ۇلكەن ماقساتىمىز بار, – دەيدى تىلەك كەنجەبەكوۆ.
قوس ۇلان ۇشاققا ءمىنىپ كوردى. كاسىبي ۇشقىشتارعا سۇراقتارىن جاۋدىردى. وسىلايشا, بولاشاق ۇشقىشتاردىڭ ارمانى جاقىنداي باستادى. «ەرەكشە سەزىمدەمىز. بۇگىن ۇشاققا وتىرىپ كورسەك, ەرتەڭ ۇشقىمىز كەلەدى. ول كۇندە الىس ەمەس ەكەنىن سەزەمىز», دەيدى ەگىزدەر.
قاراعاندى وبلىسى,
پريوزەرسك قالاسى
