سوڭعى جىلدارى حالقىمىزبەن سان عاسىردان بەرى بىرگە جاساسىپ كەلە جاتقان جەتى قازىنانىڭ ءبىرى – ۇشقىر تازىعا جاناشىرلىق جاسالا باستادى. كەشەگى كەڭەس زامانىندا تۇقىمى تۇزداي قۇرىپ كەتە جازداعان تازىنىڭ تاعدىردىڭ تالكەگىنەن امان قالعانىن ۇكىدەي ۇلپىلدەتىپ, ات باسىنداي التىنعا بالاپ, سانىن كوبەيتۋگە بەت بۇرىلعان. سانىن عانا ەمەس, ساپاسىن دا. ىلكى زاماندا قارا جەردە ءۇش-ءتورت قويان قاققان تازى ورتاشا عانا جۇيرىك دەپ باعالانسا كەرەك. اڭعا شىققاندا بەس-التى قوياندى قىر اسىرماعانى شىن جۇيرىك دەپ تانىلعان.
ساپاسىن انىقتاۋ دا وسىنداي سىناقتان تۇرسا كەرەك. بۇلاندىدا وتكەن جارىسقا استانا, قاراعاندى توڭىرەگىنەن جۇزگە جۋىق تازىنىڭ جينالۋى ەلدىڭ ىقىلاسىن, وتكەننىڭ قايتا جاڭعىرۋىن, جوعالعاننىڭ تابىلعاندىعىن اڭعارتادى. ىرىكتەۋدەن كەيىن 23 تازى جەكە توپتالدى. جەلمەن جارىسقان تازىلاردىڭ جاقتان ۇشقان جالعىز جەبەدەي زۋلاعان ۇشقىرلىعىن كورۋدىڭ ءوزى ءبىر قىزىق. قانىڭ قىزىپ, دەلەبەڭ قوزادى. بۇل كۇنى جينالعان جۇرتتىڭ اۋزىندا كەربەز اتتى تازى ءجۇردى. ءيتىم-اق ەكەن. ءبىرىنشى ورىن العان كەربەزدىڭ يەسى جاڭارقالىق ايزات توقاباەۆ, وڭشەڭ جۇيرىكتى شاڭ قاپتىردى. قۇددى جۇلدىزداي اعادى. ەكىنشى ورىنعا ارلان اتتى تازى يە بولدى. يەسى قاراعاندىلىق جۇماجان جانسەرىك. ءۇشىنشى ورىنعا استانالىق باقبولات ەرشىننىڭ تۇيعىنى جايعاستى. ءسوز اراسىندا ارلاننىڭ كوپشىلىكتىڭ كوزايىمىنا اينالعان كەربەزدىڭ كۇشىگى ەكەندىگىن ايتا كەتسەك ارتىقتىعى بولماس.
جارىس بارىسىندا جالعىز تازىنىڭ عانا ەمەس, ونى باپتاعان جىگىتتەردىڭ ۇلتتىق كيىم ۇلگىسى دە ساراپقا سالىندى. بۇل ورايدا جاڭارقالىق جىگىتتەردىڭ مەرەيى ۇستەم بولدى. ارنايى سىيلىق ەلدوس كارىمقوجاعا بۇيىردى. ايتپاقشى, جارىستى بۇلاندىنىڭ جايناربەك زاڭدىباي باستاعان ۇلت قازىناسىن ۇلىقتاعان جىگىتتەر ۇيىمداستىرعانىن ايتا كەتكەن ءجون. جەڭىمپازدارعا باعالى سىيلىقتار تابىس ەتىلدى.
اقمولا وبلىسى,
بۇلاندى اۋدانى
