وفلاين جانە ونلاين فورماتتا وتكەن ەسەپتىك كەزدەسۋدە ەۇۋ رەكتورى 2022-2023 وقۋ جىلىنداعى جۇمىس قورىتىندىلارىن ۇسىنىپ, الداعى جىلدارعا ارنالعان ۋنيۆەرسيتەتتىڭ باسىمدىقتارىن بەلگىلەدى. جيىنعا ستۋدەنتتەر مەن ولاردىڭ اتا-انالارى, جۇمىس بەرۋشىلەر, عىلىمي-پەداگوگيكالىق قوعام وكىلدەرى قاتىستى.
ءىس-شارا بارىسىندا ەرلان سىدىقوۆ ۋنيۆەرسيتەتتىڭ ماڭىزدى عىلىمي جەتىستىكتەرىنە باسا نازار اۋداردى. بيىل ۋنيۆەرسيتەت عىلىمىنان تۇسكەن كىرىستەردىڭ ۇلەسى 2020 جىلمەن سالىستىرعاندا ءۇش ەسەگە جۋىق ءوسىپ, 5,03 ملرد تەڭگەنى قۇرادى.
ەۇۋ عالىمدارى 240-تان استام عىلىمي زەرتتەۋلەر مەن 10 حالىقارالىق عىلىمي جوبانى جۇزەگە اسىرىپ جاتىر. ولار اتوم جانە سۋتەگى ەنەرگەتيكاسى, مولەكۋلالىق بيولوگيا, گەندىك ينجەنەريا, بيومەديتسينا, گەواقپاراتتىق مودەلدەۋ, جاڭا قۇرىلىس ماتەريالدارى جانە باسقا دا سالالاردى قامتيدى. الدىڭعى جىلدارمەن سالىستىرعاندا ىرگەلى زەرتتەۋلەر سانى 26%-عا, ال قولدانبالى زەرتتەۋلەر 18%-عا ارتتى.
2022 جىلى عىلىمي-زەرتتەۋ قىزمەتىنىڭ ناتيجەسى بويىنشا 125 اۆتورلىق كۋالىك پەن پاتەنت الىندى. ايتا كەتسەك, ەۇۋ-دىڭ 6 زەرتحاناسى ۇلتتىق اككرەديتتەۋ ورتالىعىمەن اككرەديتتەلگەن.
«ەۋرازيا ۇلتتىق ۋنيۆەرسيتەتىن زەرتتەۋ ۋنيۆەرسيتەتىنە ترانسفورماتسيالاۋ جانە يننوۆاتسيالىق ەكونوميكانى دامىتۋعا قوسقان ۇلەسىمىزدى ارتتىرۋ شەڭبەرىندە عىلىمي ينفراقۇرىلىمدى جاڭعىرتۋعا باسىمدىق بەرىلەدى. ەسەپتى كەزەڭدە «ENU-TECH» جاڭا كامپۋسىندا زاماناۋي عىلىمي-تەحنيكالىق ينفراقۇرىلىم مەن اككرەديتتەلگەن زەرتحانالار جەلىسىن قۇرۋ ءۇشىن قۇنى 10 ملرد.تەڭگە بولاتىن ينۆەستيتسيالىق باعدارلاما ازىرلەندى. سوڭعى 5 جىلدا العاش رەت ۋنيۆەرسيتەتتىڭ ءوز قاراجاتىنان جوعارى دالدىكتەگى عىلىمي جابدىقتاردى ساتىپ الۋعا 703 ملن. تەڭگە ءبولىندى. ءبىز عىلىمي-يننوۆاتسيالىق جانە ءبىلىم بەرۋ الەۋەتىن ودان ءارى ارتتىرۋعا, سونداي-اق عالىمدارىمىزدىڭ ازىرلەمەلەرىن كوممەرتسيالاندىرۋعا جاردەمدەسۋگە نيەتتىمىز. ءبىزدىڭ «يادرولىق تەحنولوگيالار پاركى» اق بازاسىندا 5 شاعىن ءوندىرىس جۇمىس ىستەيدى. ءبىز بيزنەسپەن جانە ەكونوميكانىڭ ناقتى سەكتورىنداعى ءىرى كاسىپورىندارمەن ىنتىماقتاستىقتى بەلسەندى تۇردە كەڭەيتىپ جاتىرمىز. قازىر 3D پرينتەرلەردى قۇراستىرۋ, شۆەيتساريا زەرتتەۋشىلەرىمەن بىرلەسە ونەركاسىپ قالدىقتارىن قولدانۋ ارقىلى گەوپوليمەرلى بەتوندار شىعارۋعا ارنالعان تەحنولوگيالىق جەلىنى ورناتۋ بويىنشا شاعىن وندىرىستەر قۇرۋ جۇمىستارى جۇرگىزىلۋدە. سونىمەن بىرگە بۇگىندە ءبىزدىڭ عالىم ابدۋللا وماروۆتىڭ سەيسمولوگيا باعىتىنداعى جوباسىنا مالايزيانىڭ ءىرى كومپانياسى قىزىعۋشىلىق تانىتىپ وتىر», دەدى ەۇۋ رەكتورى ەرلان سىدىقوۆ.
كادرلىق الەۋەتتىڭ باسەكەگە قابىلەتتىلىگىن ارتتىرۋ ماقساتىندا ەۇۋ جاستاردى عىلىمعا تارتۋعا باسا نازار اۋدارادى. سونىڭ ارقاسىندا تەك ەسەپتى جىلدىڭ وزىندە 40 جاسقا دەيىنگى عالىمداردىڭ ۇلەسى 36 پايىزدان 53 پايىزعا ءوستى. وتكەن جىلدان باستاپ ەۇۋ-دا «زەرتتەۋشى» دەگەن جاڭا لاۋازىم ەنگىزىلدى, سونداي-اق ۋنيۆەرسيتەت ءوز قاراجاتى ەسەبىنەن كوممەرتسيالاندىرۋ باعىتىنداعى الەۋەتتى يدەيالارى بار جاس عالىمداردى قولداۋ ماقساتىندا جىل سايىنعى «JANA ASU» ىشكى گرانتىن بەكىتتى.
بۇگىندە «جاس عالىم» پرەزيدەنتتىك جوباسى اياسىندا ەۇۋ كافەدرالارى مەن عىلىمي بولىمشەلەرىندە عىلىمي زەرتتەۋلەردى جۇزەگە اسىراتىن جاس عالىمدار توبى 71 پوستدوكتورانتقا ارتتى.
ۋنيۆەرسيتەت حالىقارالىق ىنتىماقتاستىقتى بەلسەندى دامىتىپ جاتىر. ماسەلەن, وتكەن جىلى ەۇۋ عالىمدارى 700-دەن استام شەتەلدىك ماماندارمەن بىرلەسە ەڭبەك ەتتى.
رەكتور ەسەپتىك كەزدەسۋ بارىسىندا سوڭعى 5 جىلدا ەۇۋ عالىمدارىنىڭ ماقالا جاريالاۋ بەلسەندىلىگى ەكى ەسەگە ارتقانىن اتاپ ءوتتى. ولاردىڭ دەنى Web of Science بازاسىنىڭ Q1, Q2 جۋرنالدارىندا جاريالانادى. Scopus دەرەكتەر بازاسى بويىنشا ەۇۋ عالىمدارىنىڭ ءبىر ماقالاسىنا ورتاشا دايەكسوز كورسەتكىشى 4,4, فيزيكا-تەحنيكالىق فاكۋلتەتى عالىمدارىندا 7,1 قۇرايدى.
بيىل ەۇۋ-دىڭ 17 وقىتۋشىسى قر پروفەسسور-وقىتۋشىلار قۇرامىنىڭ توپ-50 باس رەيتينگىنە ەنگىزىلدى. وندا ءبىرىنشى ورىندى حيرش يندەكسى بويىنشا قازاقستاننىڭ توپ-100 عالىمىنىڭ كوشىن باستايتىن ۋنيۆەرسيتەتتىڭ پروفەسسورى ءراتباي مىرزاقۇلوۆ يەلەندى.
«ەۇۋ قر بعم ءبىلىم جانە عىلىم ساپاسىن قامتاماسىز ەتۋ كوميتەتىنىڭ ۇسىنىلاتىن باسىلىمدار تىزىمىنە ەنگىزىلگەن عىلىمي جۋرنالدار سانى بويىنشا, سونداي-اق حالىقارالىق مالىمەتتەر بازاسىندا يندەكستەۋ بويىنشا كوشباسشىلار قاتارىنا كىرەدى. Web of Science Core Collection حالىقارالىق دەرەكتەر بازاسىنا ەنگىزىلگەن 17 وتاندىق جۋرنالدىڭ 3-ەۋى – «Eurasian Mathematical Journal», «Eurasian Journal of Mathematical and Computer Application» جانە «Eurasian Journal of Physics and Functional Materials» ەۇۋ-دا اعىلشىن تىلىندە جارىق كورەدى», دەدى رەكتور كەزدەسۋ بارىسىندا.
قىزمەت كورسەتۋ ساپاسىن سىرتقى باعالاۋ ۋنيۆەرسيتەتتىڭ باسەكەگە قابىلەتتىلىگىنىڭ ماڭىزدى كورسەتكىشى بولىپ تابىلادى. 2022 جىلى ەۇۋ QS نۇسقاسى بويىنشا العاش رەت ازياداعى ۇزدىك ۋنيۆەرسيتەتتەردىڭ توپ - 100 رەيتينگىنە كىردى. سونداي-اق, ۋنيۆەرسيتەت QS World University Rankings by Subject 2023 پاندىك رەيتينگىندەگى ءوز پوزيتسيالارىن نىعايتىپ قانا قويماي, وكىلدىگىن 11-دەن 17 پانگە دەيىن كەڭەيتتى. تاۋەلسىز اككرەديتتەۋ جانە رەيتينگ اگەنتتىگىنىڭ دايىنداعا رەيتينگىنە ەۇۋ-ءنىڭ 192 ءبىلىم بەرۋ باعدارلاماسى كىردى, ولاردىڭ 180-ءى العاشقى ءۇش ورىنداردى يەلەندى.
2022 جىلى ەۇۋ-دا 30 ەلدەن كەلگەن ستۋدەنتتەر 240-تان استام ءبىلىم بەرۋ باعدارلاماسى بويىنشا ءبىلىم الدى. ۋنيۆەرسيتەت نارىق قاجەتتىلىكتەرىن ەسكەرە وتىرىپ, وقىتۋدىڭ جاڭا باعدارلامالارىن ەنگىزۋگە ەرەكشە نازار اۋدارادى. كاسىبي ستاندارتتار نەگىزىندە 129 ءبىلىم بەرۋ جانە 35 يننوۆاتسيالىق باعدارلاما ازىرلەندى. بۇل رەتتە جىل سايىن اعىلشىن تىلىندەگى باعدارلامالار مەن ءبىلىم الۋشىلاردىڭ سانى ارتىپ كەلەدى.
«2022 جىلى وش مەملەكەتتىك ۋنيۆەرسيتەتىندە ەۇۋ فيليالىن اشتىق. قازىر وندا بىرنەشە ءبىلىم بەرۋ باعدارلامالارى بويىنشا وقىتۋ جۇرگىزىلۋدە. 2023 جىلى ۋنيۆەرسيتەت باكالاۆر جانە ماگيستر دارەجەسىمەن 5 مىڭعا جۋىق مامان دايىنداعانىن اتاپ وتكىم كەلەدى. سونداي-اق, 220 تۇلەك ەۇۋ كوللەدجىندە التى ماماندىق بويىنشا وقۋىن ءساتتى اياقتادى. تۇلەكتەردى جۇمىسقا ورنالاستىرۋعا جاردەمدەسۋ ماقساتىندا «مانساپ» اقپاراتتىق پلاتفورماسىن ازىرلەدىك. بۇل - جۇمىس بەرۋشىلەردىڭ, شەتەلدىك كومپانيالاردىڭ, ۋنيۆەرسيتەتتىڭ ءبىلىم الۋشىلارى مەن تۇلەكتەرىنىڭ بايلانىس ورناتۋىنا ارنالعان اشىق ۆەب-الاڭ», دەپ ءتۇسىندىردى رەكتور.
سىدىقوۆ سونىمەن قاتار ۋنيۆەرسيتەتتە ينكليۋزيۆتى ءبىلىم بەرۋدى جانە «ەشكىم دە نازاردان تىس قالمايدى» قاعيداتىن جۇزەگە اسىرۋعا قاجەتتى جاعداي جاسالىپ جاتقانىن اتاپ ءوتتى. «ەۇۋ-دا ينكليۋزيۆتى ءبىلىم بەرۋدى دامىتۋدىڭ 2023–2025 جىلدارعا ارنالعان جول كارتاسى» قابىلدانىپ, «ينكليۋزيۆتى رەپەتيتورلارعا قولداۋ كورسەتۋ زەرتحاناسىن» اشۋ جوسپارلانىپ وتىر.
الىس جانە جاقىن شەتەلدەردىڭ جەتەكشى ۋنيۆەرسيتەتتەرى ىنتىماقتاستىققا قىزىعۋشىلىق تانىتۋدا. بۇگىنگى تاڭدا ەۇۋ-مەن الەمنىڭ 460-تان استام ۋنيۆەرسيتەتى تىعىز بايلانىس ورناتقان. 2022 جىلى شەتەل ازاماتتارى ءۇشىن «كۇلتەگىن» جانە «گۋميلەۆ» اتىنداعى شاكىرتاقى تاعايىندالدى.
ەسەپ بەرۋ كەزدەسۋىنىڭ سوڭىندا رەكتور ستۋدەنتتەر مەن وقىتۋشىلاردىڭ بىرقاتار سۇراقتارىنا جاۋاپ بەردى.
