جاسىراتىنى جوق, قازىر قۇراق كورپە تىگۋ بىلاي تۇرماق, ينە ساباقتاي المايتىندار كوپ. وسى ءبىر كوشەلى ونەردى ولتىرمەي جۇرگەن اق جاۋلىقتى انالارىمىز عانا سياقتى. سولاردىڭ ءبىرى راۋشان اجەيدىڭ قولىنان شىققان ءتول تۋىندىلارىنا سۇرانىس كوپ قازىر. تاڭنان كەشكە دەيىن تىگىن ماشىڭكەسىمەن قۇراق قۇرايدى.
راۋشان زياداقىزى قازىر 72 جاستا. ءالى تىڭ. ابدەن ماشىقتانعان ساۋساقتارىمەن ينە ساباقتاپ, ماتانى كوزبەن-اق ولشەپ, ءتۇپ-ءتۇزۋ قيادى. قيىندىنى قيىندىعا جالعايدى. ماتا بەتىنە ورنەكتەگەن ويۋلارى دا كوز تارتادى. تۇستەردى دە ۇيلەسىمدى ەتىپ تاڭدايدى. گەومەتريا, ديزايندى وقىماي-اق وسى جۇمىستىڭ ءبارىن وڭاي يگەرگەن اجەي – ءوز ءىسىنىڭ ناق شەبەرى.
قۇراق كورپە تىگىپ وتىرىپ, حالىق اندەرىن قوڭىر ۇنىمەن شىرقايدى. اجەسىنىڭ مەيىرىمىنەن شۋاق سەزىنگەن نەمەرەلەرى بولسا, ەرتەگىسىن تىڭدايدى. بۇدان بولەك, وبال مەن ساۋاپ, ار مەن ۇيات جونىندە تاعىلىمىن ايتادى. سونىسىمەن ۋاقىتى وتەدى. ۇستەلىندە قولمەن اينالدىراتىن وتكەن عاسىردان ساقتاپ كەلە جاتقان تىگىن ماشىڭكەسى تۇر. ۇيىندەگى تاريحي جادىگەرى. مۇنىڭىز دا تىڭ. تاپسىرىستىڭ كوپ بولىگىن وسى ماشىڭكەمەن سىرىلداتادى. كورپەسىنە سۇرانىس كوپ. جارناماسىز-اق كاسىبىن دوڭگەلەتىپ وتىر. ءار كورپەسىن بار ىنتا-ىقىلاسىمەن قۇراعاندىقتان, ىسمەر اجەنى كوبى بىلەدى. راۋشان اجەي ءبىر ايدا جيىرمادان اسا كورپە ساتادى. شي قۇراق دەگەن تۇرىنە كوپ ۋاقىت كەتەدى.
– بۇل كاسىپپەن قازىرگى كەلىنشەكتەر اينالىسپايدى. ويتكەنى ماشاقاتى كوپ. ءتوزىم مەن ۇقىپتىلىق قاجەت. ولاردى دا كىنالاۋعا بولمايدى. قازىر زامان باسقا. ۇيدە ومالىپ وتىراتىن ۋاقىت جوق كوبىندە. بىراق بۇل – ۇلتتىڭ قولونەرى. سول سەبەپتى دە ساقتاۋعا كۇش سالۋ كەرەك, – دەيدى اجەي.
راۋشان اجەمىز قازىر قۇراق قۇراۋدى ءوزىنىڭ قىزدارى مەن كەلىندەرىنە ۇيرەتىپ جاتىر.
شاڭىراق يەسى سەيسەنبەك ءنارىن ۇلى دا قولونەرمەن اينالىسادى. جاسى – 73-تە. قاڭىلتىردى ءيىپ شەلەك ازىرلەيدى, قايىستان قامشى ورەدى, ارقان ەسەدى, اعاشتان ءتۇرلى جيھاز جاسايدى, تاعىسىن تاعى. ودان بولەك, جاز بويى باۋ-باقشاسىن باپتايدى. باقشاسى دا ءتۇرلى جەمىس-جيدەككە باي. قىس بويى اۋلانىڭ قارىن كۇرەيدى. كورشىلەرىنىڭ ۇيىندە سەيسەنبەك اقساقالدىڭ شەبەرحاناسىنان شىققان شەلەك پەن ءتۇرلى بۇيىم بار. اۋىلداستارى «سەيسەنبەگى بار اۋىل جۇتامايدى», دەپ شەبەرىن ءبىر مارقايتىپ قويادى.
اقساقال اۋىلىنا ەڭبەگىمەن سىيلى. ارينە, جاسىنان ەڭبەكپەن شىڭدالعان اقساقال وڭاي شارشاسىن با؟ ءالى كۇنگە دەيىن تىنىم تاپپايتىنى دا سودان. كۇنى بويى شاعىن شەبەرحاناسىنان شىقپايدى. كەڭەس ۇكىمەتى كەزىندە كومپارتيا مۇشەسى بولىپتى. تراكتور جۇرگىزىپ, كەڭشاردا مال باسىن كوبەيتۋگە ۇلەس قوسقان ەڭبەككەر. مال باسىن ارتىعىمەن كوبەيتكەنى ءۇشىن 1980 جىلى III دارەجەلى «ەڭبەك داڭقى» وردەنىمەن ماراپاتتالعان. وردەننەن بولەك ءتۇرلى ماداقتاما قاعازدارى سورەسىندە قالانىپ تۇر. «ەڭبەك ەتە ءجۇرىپ, قويىن-قونىشىمىزعا جۋرنال, كىتاپ سالىپ, قىر باسىندا كوركەم ادەبيەتتى وقيتىن ەدىك», دەيدى قادىرلى اقساقال.
– بۇگىنگى قوعامدا ەڭبەككە ق ۇلىقسىز جاستار كوپ. ءار نارسەنى سىلتاۋ ەتەدى. بىراق «ەڭبەكتەنەمىن, ناپاقا تابامىن» دەگەن ادام ەشتەڭەگە قارامايدى. باستىسى, نيەت پەن ىنتا. ءبىز جەتپىستەن اسساق تا, ەڭبەكتەن قول ۇزگەن جوقپىز. قيمىلداعان ادامنىڭ جاعدايى وڭ, دەنى ساۋ بولادى, – دەيدى سەيسەنبەك اقساقال.
سەيسەنبەك اقساقال مەن راۋشان اجەيدىڭ شاڭىراق قۇرعانىنا ەلۋ جىلدان استى. 4 قىزى, 3 ۇلى بار. سولاردان جيەن, نەمەرە, شوبەرە كورىپ وتىر. زاماننىڭ قيىن كەزىندە جاعدايى تومەن وتباسىدان بالا الىپ, اسىراپ, جەتكىزگەنى جانە بار. كومەك سۇراعاننىڭ كوڭىلىن قايتارماعان قايىرىمدى جاندار «وسى كۇنىمىز حالىقتىڭ اق باتاسى عوي», دەيدى.
قاراعاندى وبلىسى
