ماسەلەن, پرەزيدەنت ق.توقاەۆ «HMS Bergbau AG» كومپانياسىنىڭ باسقارما توراعاسى دەننيس ءشۆيندتى قابىلدادى. اتالعان كومپانيا باسشىسى شىعىس قازاقستان وبلىسىندا ليتي وندىرەتىن جانە ونى قايتا وڭدەيتىن كەن بايىتۋ كومبيناتىن سالۋ جوباسىن تانىستىردى. ونىڭ ايتۋىنشا, جوسپارلانعان ينۆەستيتسيانىڭ جالپى سوماسى – 500 ميلليون دوللار.
«HMS Bergbau AG» – گەرمانياداعى قاتتى پايدالى قازبالاردى بارلاۋمەن جانە وندىرۋمەن اينالىساتىن جەتەكشى كومپانيالاردىڭ ءبىرى. بۇل كومپانيا اقش, سينگاپۋر, وار, يندونەزيا, پولشا, ءباا, بوتسۆانا مەملەكەتتەرىندە شيكىزات ءوندىرۋ جۇمىستارىن بەلسەندى جۇرگىزەدى. سونداي-اق ونىڭ قىتايدا, ءۇندىستاندا, كەنيادا, مالايزيادا, پاكىستاندا, شري-لانكادا, بانگلادەشتە جانە ۆەتنامدا وكىلدىكتەرى بار.
«مەملەكەت باسشىسىنىڭ گەرمانياعا ساپارى اياسىندا «HMS Bergbau» باسشىلىعىمەن كەزدەسۋ ءوتتى. اتالعان كومپانيا سيرەك مەتالل وندىرىسىمەن اينالىساتىن ءىرى كاسىپورىن. قازاقستاندا «HMS Bergbau» ءتيىستى بارلاۋ جۇمىستارىن جۇرگىزەدى. العاشقى ناتيجەگە كەلەسى جىلى قول جەتكىزەمىز دەپ كۇتىپ وتىرمىز», دەيدى «سامۇرىق-قازىنا» اق باسقارما توراعاسى نۇرلان جاقىپوۆ.
بۇل ءسوزدى «استانا» حالىقارالىق قارجى ورتالىعىنىڭ باسقارۋشىسى رەنات بەكتۇروۆ تا قۋاتتادى. ونىڭ ايتۋىنشا, اتالعان كومپانيا كەن ءوندىرىسى سالاسىندا زەرتتەۋ جۇمىستارىن جۇرگىزىپ جاتىر. كەلەسى جىلى جاڭا جوبالارعا ينۆەستيتسيا جاساۋعا دايىن.
سونداي-اق مەملەكەت باسشىسى «HHLA» كومپانياسىنىڭ باسقارما توراعاسى انگەلا تيتتسراتپەن كەزدەستى. كەزدەسۋ بارىسىندا قازاقستان مەن گەرمانيانىڭ كولىك-لوگيستيكا سالاسىنداعى ىنتىماقتاستىعىن نىعايتۋ پەرسپەكتيۆالارى تالقىلاندى. «HHLA» – جەتەكشى ەۋروپالىق لوگيستيكالىق كومپانيا. كاسىپورىن گامبۋرگ, ودەسسا, تاللينن, تريەست قالالارىنداعى تەڭىز پورتى تەرمينالدارىنا, سونداي-اق ولارمەن بايلانىستىرىلعان ورتالىق جانە شىعىس ەۋروپاداعى ينتەرمودالدىق توراپتار جەلىسىنە يەلىك ەتەدى.
«سونىمەن قاتار «HHLA» كومپانياسىمەن دە كەلىسسوز جۇرگىزىلدى. ول – لوگيستيكا سالاسىنداعى كوشباسشىنىڭ ءبىرى. جاقىن ارادا قازاقستان تەمىر جولى كومپانياسىمەن بىرلەسىپ ەلىمىزدە ورتاق جوبا باستاماق. پورت ينفراقۇرىلىمىن جانە لوگيستيكا ينفراقۇرىلىمىن دامىتۋعا نازار اۋدارادى. قازىردىڭ وزىندە الماتىدا وفيس اشقان», دەيدى «استانا» حالىقارالىق قارجى ورتالىعىنىڭ باسقارۋشىسى ر.بەكتۇروۆ.
تاعى ءبىر ماڭىزدى كەزدەسۋ «STADA Group» كومپانياسىنىڭ ۆيتسە-پرەزيدەنتى كريستوس گالليسپەن ءوتتى. اڭگىمە بارىسىندا دەنساۋلىق ساقتاۋ جانە فارماتسەۆتيكا سالالارىنداعى ىنتىماقتاستىق پەرسپەكتيۆالارى تالقىلاندى. «STADA» – جوعارى ساپالى ءدارى-دارمەك وندىرەتىن جەتەكشى كومپانيالاردىڭ ءبىرى. كومپانيا ءوز ونىمدەرىن الەمنىڭ 120 ەلىندە ساتادى. كريستوس گالليستىڭ ايتۋىنشا, كومپانيا ىنتىماقتاستىقتى نىعايتۋعا قىزىعۋشىلىق تانىتىپ, قازاقستانداعى مەديتسينالىق جوبالار مەن باعدارلامالارعا ينۆەستيتسيا قۇيۋ مۇمكىندىكتەرىن قاراستىرۋعا دايىن.
«مەملەكەت باسشىسى كەزدەسكەن كەلەسى كومپانيا – «STADA Group» كومپانياسى. وزدەرىڭىزگە ءمالىم, اتالعان كورپوراتسيا فارماتسەۆتيكا سالاسىنداعى الەمدىك كوشباسشىنىڭ قاتارىندا. قازىردىڭ وزىندە ەۋرازيا ايماعىنداعى ورتالىق حابىن الماتىدا اشىلعان. وندا ەكى جۇزدەن استام قازاقستاندىق جۇمىس ىستەيدى», دەيدى «استانا» حالىقارالىق قارجى ورتالىعىنىڭ باسقارۋشىسى ر.بەكتۇروۆ.
تاعى ءبىر ماڭىزدى كەزدەسۋ دەپ «Euler Hermes» اگەنتتىگىنىڭ باسقارما مۇشەسى ەدنا شيونەمەن وتكەن كەلىسسوزدى ايتا الامىز. كەزدەسۋ بارىسىندا ەكونوميكالىق ىنتىماقتاستىقتى ودان ءارى نىعايتۋ, سونىڭ ىشىندە قارجىلىق ساقتاندىرۋ سالاسىندا بىرلەسكەن جوبالاردى ازىرلەۋ, تاجىريبە الماسۋ جانە وقۋ باعدارلامالارىن ۇيىمداستىرۋ مۇمكىندىكتەرى قاراستىرىلدى.
قازىرگى تاڭدا قازاقستان دامۋ بانكى مەن «Helaba» بانكى اراسىندا قارجىلىق ىنتىماقتاستىق تۋرالى كەلىسىمگە قول قويىلعان. اتالعان كەلىسىمگە سايكەس «AltynAlmas Reagents» كومپانياسىنىڭ تسيانيد ناتري وندىرەتىن حيميالىق زاۋىتىنىڭ قۇرىلىسىنا 100 ميلليون ەۋروعا دەيىن قارجى ءبولۋ قاراستىرىلعان.
«مەملەكەت باسشىسى «Euler Hermes» كومپانياسىنىڭ باسشىلىعىمەن كەزدەستى. «Euler Hermes» – گەرمانياداعى ەڭ ءىرى كومپانيالاردىڭ ءبىرى. قارجى, ساقتاندىرۋ قىزمەتتەرىمەن اينالىسادى. وزدەرىڭىزگە ءمالىم, تاياۋدا «قازمۇنايگاز» ءىرى پوليەتيلەن جوباسىن ىسكە قوسقالى جاتىر. وعان گەرمانيادان جانە باسقا دا شەتەلدەن قاراجات تارتامىز. سوندىقتان «Euler Hermes» كومپانياسىمەن جوباعا قاتىستى گەرمانيادان قاراجات تارتۋ بويىنشا ناقتى مەموراندۋمعا قول قويدىق. بۇل جوبا جاقىن ارادا ىسكە قوسىلادى», «قازمۇنايگاز» ۇك» اق باسقارما توراعاسى ماعزۇم مىرزاعاليەۆ.
«استانا» حالىقارالىق قارجى ورتالىعىنىڭ باسقارۋشىسى ر.بەكتۇروۆتىڭ سوزىنە سۇيەنسەك, «Euler Hermes» ەكسپورتتىق-كرەديت كومپانياسىنىڭ ەلىمىزدە جۇمىس ىستەۋى نەمىس بيزنەسىن قازاقستانعا اكەلۋگە ۇلكەن سەپتىگىن تيگىزەدى. ويتكەنى بۇل – مەملەكەت تاراپىنان كەپىلدىك بەرەتىن ۇلكەن قارجى ۇيىمى.
قورىتا ايتقاندا, مەملەكەت باسشىسى ق.توقاەۆتىڭ گەرمانياعا جاساعان ساپارى ولجالى بولدى دەپ تولىق سەنىممەن ايتا الامىز. بۇل ەكىجاقتى قارىم-قاتىناستى نىعايتىپ قانا قويماي, ەلىمىزدىڭ دامۋىنا قاجەت ىلكىمدى جوبالاردى جۇزەگە اسىرۋعا مۇمكىندىك بەرەدى.
