«قازاقستان سانكتسيالىق تەكەتىرەستەرگە قارسى. ويتكەنى ساياسي تۇرعىدا نەگىزدەلگەن شەكتەۋلەر حالىقارالىق قاتىناستارداعى جالپى احۋالعا سىزات تۇسىرەدى جانە مەملەكەتتەر اراسىنداعى ساۋدا-ەكونوميكالىق ىنتىماقتاستىقتىڭ دامۋىنا كەرى اسەر ەتەدى. سونىمەن بىرگە ءبىز ايماقتىق ساياساتتاعى سانكتسيالىق شەكتەۋلەردى ەسكەرۋگە ءماجبۇرمىز. بەيبىتشىلىك پەن ىنتىماقتاستىقتىڭ ءوزارا ءتيىمدى فورمۋلاسىن تابۋ ءۇشىن سىندارلى ديپلوماتيانىڭ ۋاقىتى كەلدى دەپ سانايمىز. مەن بۇل تۋرالى جۋىردا وتكەن بۇۇ باس اسسامبلەياسى سەسسياسىنىڭ مىنبەرىندە سويلەگەن سوزىمدە ايتتىم. قازاقستان بارلىق مۇددەلى مەملەكەتپەن اراداعى كەدەرگىسىز ساۋدانى دامىتۋدى جانە ينۆەستيتسيالىق ىنتىماقتاستىق ورناتۋدى جاقتايدى. قۇرمەتتى كانتسلەر, كەشە ەكونوميكالىق ىنتىماقتاستىق ماسەلەلەرى جونىندە سىزبەن جانە گەرمانيانىڭ جەتەكشى كومپانيالارىنىڭ باسشىلارىمەن تابىستى كەلىسسوز جۇرگىزدىم. مۇنداي ىقپالداستىقتىڭ كەلەشەگى جارقىن بولادى دەپ سانايمىن», دەدى قاسىم-جومارت توقاەۆ.
قازاقستان پرەزيدەنتى اۋىل شارۋاشىلىعىن كەلەسى باسىم باعىت رەتىندە اتاپ ءوتتى. مەملەكەت باسشىسى گەرمانيالىق سەرىكتەستەردىڭ قولداۋىمەن قازاقستاندا ورنىقتى ەگىنشىلىكتىڭ ايماقتىق ورتالىعىن قۇرۋدى ۇسىندى.
ونىڭ ايتۋىنشا, اتالعان ورتالىق تەوريالىق ازىرلەمەلەر بويىنشا تاجىريبە الماسۋعا, سونداي-اق ولاردى قولدانىسقا ەنگىزۋگە جانە كوممەرتسيالاندىرۋعا سەپتىگىن تيگىزە الار ەدى.
