ەڭ الدىمەن قۇقىقتىق ءتارتىپ اسكەرىنىڭ باس تاربيەشىسى باتىس قازاقستان وبلىسى اكىمىنىڭ ورىنباسارى باقىتجان نارىمبەتپەن كەزدەسۋ وتكىزدى. ءوڭىر اكىمىنىڭ ورىنباسارى ۇلتتىق ۇلان گەنەرالىن جىلى شىرايمەن قارسى الىپ, وبلىستا قازاقستان حالقى اسسامبلەياسىنىڭ باسشىلىعىمەن ۇيىمداستىرىلىپ جاتقان رەسپۋبليكالىق انالار كەڭەسىنە قاتىسۋعا كەلىسىمىن بەرگەنى ءۇشىن العىسىن ءبىلدىردى. باقىتجان حابەر ۇلىنىڭ ايتۋىنشا, گەنەرال-مايور ق. ۇمبەتوۆ ءۇشىن جايىق ءوڭىرى ەكىنشى ۇيىندەي بولىپ كەتكەن. جەرگىلىكتى تۇرعىندار قايرات جارىلقاسىن ۇلىنىڭ وبلىستاعى قىزمەتىن جانە جاستار اراسىنداعى ءپاتريوتيزمدى نىعايتۋعا قوسقان جۇمىستارىن ءالى كۇنگە دەيىن ۇمىتقان جوق. بولاشاقتا وبلىستا زاماناۋي ۇلگىدەگى اسكەري – مەكتەپ ينتەرناتىن سالۋ جوسپارىمەن ءبولىستى.
ءوز كەزەگىندە حالىق قاھارمانى وبلىس باسشىلىعىنىڭ وڭىردەگى ۇلتتىق ۇلان اسكەرىمەن ارىپتەستىك نەگىزدەگى قارىم-قاتىناستار ورناتقانى ءۇشىن العىسىن ءبىلدىرىپ, قۇقىقتىق ءتارتىپ اسكەرىنىڭ باس قولباسشىسى گەنەرال-لەيتەنانت ەركىن بوتاقانوۆتىڭ ساپار بارىسىنا قويعان تاپسىرمالارىمەن جانە ماڭىزدى رەسپۋبليكالىق شاراعا قاتىستى جوسپارلارىمەن تانىستىردى. سونداي-اق, ۇلتتىق ۇلان باس قولباسشىسىنىڭ بۇيرىعىمەن باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆتى «قۇقىقتىق ءتارتىپ اسكەرىنە – 30 جىل» مەرەكەلىك مەدالىمەن ماراپاتتادى. ەكى تاراپ وسىعان دەيىن قول جەتكىزىلگەن دوستىق نەگىزدەگى ارىپتەستىك قارىم-قاتىناستاردى ءارى قاراي دا جالعاستىرۋ بويىنشا كەلىستى.
جوعارىدا اتالعان مەرەكەلىك مەدالمەن ورال گارنيزونى بويىنشا اسكەري پروكۋرور ادىلەت پودپولكوۆنيگى مارات بۇتىمباەۆ تا ماراپاتتالدى. كەزدەسۋ وبلىستىق پروكۋراتۋرا عيماراتىندا ءوتتى. گەنارال-مايور قايرات ۇمبەتوۆ ساپار اياسىندا قىزمەتكە جاڭا تاعايىندالعان اسكەري پروكۋرورمەن كەزدەسۋ وتكىزدى. قوس تاراپ وڭىردەگى قۇقىقتىق ءتارتىپ پەن اسكەري ورتاداعى زاڭدىلىق تۋرالى پىكىرلەستى. ادىلەت پودپولكوۆنيگى مارات بۇتىمباەۆ ۇلتتىق ۇلان اسكەري بولىمدەرىمەن جۇمىس بارىسى تۋرالى اڭگىمەلەسە كەلە, پروكۋراتۋرا قىزمەتكەرلەرىنىڭ اسكەري ورتادا زاڭ مەن ءتارتىپتى نىعايتۋ بويىنشا اركەز قولداۋ كورسەتەتىنىن جەتكىزدى.
«ۇلتتىق ۇلان – قۇقىقتىق ءتارتىپ اسكەرى. ءوز قىزمەتىندە ارقاشان زاڭدىلىقتى ساقتاۋ پرينتسىپتەرىن باسشىلىققا الادى. ەلىمىزدە تىنىشتىق پەن تۇراقتىلىقتى قامتاماسىز ەتۋ, قورعانىس قابىلەتىن نىعايتۋ ءبىزدىڭ ورتاق مىندەتتەرىمىز. بۇگىنگى ماراپاتىڭىز وسى مىندەتتى بىرگە جۇزەگە اسىرۋعا ءوز سەپتىگىن تيگىزەتىنىنە سەنىمدىمىن», دەدى گەنەرال-مايور قايرات ۇمبەتوۆ ماراپاتتى تاپسىرۋ بارىسىندا.
ساپار بارىسىندا حالىق قاھارمانى ورال قالاسىنىڭ قۇرمەتتى اقساقالى ۇلى وتان سوعىسىنىڭ ارداگەرى ۆەنيامين سكولەنكومەن كەزدەستى. شارا قارتتار كۇنى مەرەكەسىنە وراي ۇيىمداستىرىلدى. ۇلتتىق ۇلاننىڭ اسكەري وركەستىرى ارداگەردىڭ اۋلاسىنا كەلىپ, سوعىس جانە پاتريوتتىق تاقىرىپتاعى شىعارمالاردى ورىندادى. گەنەرال-مايور قايرات ۇمبەتوۆ ارداگەردىڭ الدىندا قۇتتىقتاۋ ءسوز سويلەپ, باعالى سىيلىقتاردى تاپسىردى.
«ۇلتتىق ۇلان اسكەرى جاۋىنگەرلىك ءداستۇردى بەرىك ۇستانعان اسكەر ءتۇرى. ءبىز اركەزدە اراداگەرلەرىمىزگە قۇرمەت كورسەتۋگە, سىزدەر سىيلاعان بەيبىت كۇندەردى ساقتاۋعا, ەلىمىزدى قورعاۋعا دايىنبىز. ءسىزدى قارتتار كۇنى مەرەكەسىمەن شىن جۇرەكتەن قۇتتىقتاپ, العىسىمىزدى بىلدىرەمىز», دەگەن حالىق قاھارمانى ۇلتتىق ۇلان باس قولباسشىسىنىڭ قۇتتىقتاۋ حاتىن وقىپ بەردى.
ارداگەر كورسەتىلگەن قۇرمەتكە العىسىن ايتىپ, حالىقتى بىرلىك پەن دوستىققا شاقىردى. ەل قورعاۋىندا جۇرگەن ازاماتتارعا زور دەنساۋلىق تىلەدى.
شارا ۇلتتىق ۇلاننىڭ 5517 اسكەري ءبولىمىنىڭ اسكەري وركەسترىنىڭ سۇيەمەلەۋدەۋىمەن ورىندالعان شاعىن كونتسەرتكە ۇلاستى.
