فوتو: aqmeshit-zhastary.kz
عاني بەيسەمباەۆ چەللەندج باسىندا ءوزىنىڭ اياۋلى ۇستازدارى تۋرالى ەستەلىكتەرىن ءبولىستى.
«ەڭ الدىمەن حاكىم ابايدىڭ «ادامزاتتىڭ ءبارىن ءسۇي باۋىرىم دەپ» قاعيداسىن بويىما ابدەن سىڭىرگەن, ومىرلىك ۇستازدارىم - اتا-اناما العىس ايتقىم كەلەدى. كەزىندە ءبىز ءبىر قاباتتى, سابان كىرپىشتەن قالانعان, شاعىن مەكتەپتە ءتالىم الدىق. سول اياداي عانا ءبىلىم ۇياسىن وقۋشىعا دەگەن ماحابباتىمەن ءزاۋلىم ءارى جارىق ەتكەن ۇستازدارىمدى ءاردايىم قۇرمەتپەن ەسكە الامىن. اسىرەسە العاش «الىپپەمەن» تانىستىرىپ, ساۋاتىمىزدى اشقان قىزىلباەۆا دامەش اپايىما مىڭ تاعزىم ەتەمىن. بۇگىندە ول كىسى توقساننىڭ تورىنە شىققان ارداقتى اجە. دامەش اپايدان كەيىن 4-7 سىنىپتا ءبىزدى ءوز الاقانىنا العان سىزدىقوۆا كۇلتاي اپايىمىز دا جادىمىزدا. اۋەلدە قاتال كورىنگەنمەن, قامقورشى بولعان ۇستازىمىزدىڭ جاقسىلىقتارىن بالا كوڭىل قايتىپ ۇمىتسىن؟! ودان كەيىنگى قىزىق تا ەڭ قيىن كەزەڭ, بوزبالا مەن بويجەتكەن ساتىمىزدە ءتالىمى مەن تاربيەسىن كورگەن سىنىپ جەتەكشىمىز سەيىلوۆا ۇلتاي اپايىمىزدى ۇمىتۋ ءتىپتى دە مۇمكىن ەمەس. ۇلتاي اپايدىڭ سول كەزدەگى بەينەسى «قىز جىبەك» فيلمىندەگى جىبەككە ۇقسايتىن», دەپ ەسكە الدى مينيستر.
سونداي-اق پەداگوگ رەتىندە قالىپتاسۋ جولىندا تالىمگەرلىك ەتكەن دالەلحان مۋسين, راۋشان بۋكاەۆا, انتونينا بوندارەۆا, قانيپا بىتىباەۆا, ءشامشا بەركىمباەۆا ۇستازدارى بۇل ومىردەن وزسا دا, ولاردىڭ ەسىمى ماڭگى جادىندا ەكەنىن اتاپ ءوتتى.
«جاس ۇرپاقتى تاربيەلەۋ جولىندا تىنىمسىز ەڭبەكتەنىپ, اعارتۋشىلىق قىزمەتتى ابىرويمەن اتقارىپ جۇرگەن جانە زەينەت دەمالىسىنداعى پەداگوگتەر قاۋىمىنا شىنايى ريزاشىلىعىمدى بىلدىرە وتىرا, ارقايسىلارىڭىزدىڭ وتباسىلارىڭىزعا اماندىق, دەندەرىڭىزگە ساۋلىق تىلەيمىن! شاكىرتتەرىڭىزدىڭ قۇرمەتىنە بولەنە بەرىڭىزدەر, مەرەيلەرىڭىز ۇستەم بولسىن!», دەپ جازدى مينيستر ءوزىنىڭ Facebook پاراقشاسىندا.
سونداي-اق كاسىبي مەرەكەگە وراي, بارشا قازاقستان ازاماتتارىنا جانە نۇرتورە ءجۇسىپ, Askhat Aimagambetov, تامارا دۇيسەنوۆا, Aida Balayeva, Sayasat Nurbek, Giniyat Azhar ارىپتەستەرىنە «ۇستازىم مەنىڭ, ۇستازىم!» اتتى چەللەندج جولدادى.
«اياۋلى ۇستازدارىڭىز جايلى جىلى لەبىزدەرىڭىزدى ءبىلدىرىپ, قىزىقتى ەستەلىكتەرىڭىزبەن بولىسۋگە شاقىرامىن», دەدى ع.بەيسەمباەۆ.
