ناۋىرزىم مەملەكەتتىك تابيعي قورىعىنىڭ تۋريستەردى قارسى الۋ ورتالىعىندا وتكەن تانىمدىق ەكسكۋرسيادان باستالعان ءىس-شارا باس كەڭسە الاڭىنداعى كۆەست ويىنىنا ۇلاستى. كوڭىلدى ويىن بارىسىندا بالالار «بۇركىت», «ارىستان» دەپ اتالعان ەكى توپقا ءبولىنىپ, ورمان ىشىندە كەزدەسەتىن كەدەرگىلەردەن مۇدىرمەي وتۋدەن جارىستى. كوماندالىق جارىس ۇستىندە بالانىڭ شاپشاڭدىعى مەن وي ۇشقىرلىعى قاتار تانىلادى. ويىن ۇستىندە وقۋشىلار ناۋىرزىم قورىعىندا كەزدەسەتىن جان-جانۋارلار مەن وسىمدىكتەر دۇنيەسىنە قاتىستى ۆيكتورينا سۇراقتارىنا جاۋاپ ىزدەپ, سوزجۇمباق شەشتى. سونداي-اق سىر ساندىقتىڭ ىشىندەگى كەزدەيسوق ارىپتەردەن قۇپيا ءسوز قۇراستىرىپ, بۇتالاردىڭ اراسىنا جاسىرىلعان قاعاز قالتاشالارداعى تاپسىرمالاردى ورىندادى.
قورىق ماماندارىنىڭ ايتۋىنشا, مۇنداي ءىس-شارالار جاس وسكىندەردى تۋعان جەردىڭ تابيعاتىن ايالاۋعا ۇيرەتەدى. وتانسۇيگىشتىككە تاربيەلەپ, بالانىڭ ەرىك-جىگەرى مەن ادامگەرشىلىك قاسيەتتەرىن ۇشتايدى.
مەرەكەلىك ءىس-شارا سوڭىندا تانىمدىق ويىندارعا بەلسەنە قاتىسىپ, ۇشقىرلىق تانىتا بىلگەن جاس ەكولوگتەرگە ارنايى ديپلومدار مەن شاعىن ەسكەرتكىش سىيلىقتار تابىس ەتىلدى.
قوستاناي وبلىسى
