گۇلناپيس ورىنباسارقىزىنىڭ ومىردەن وزعانىنا قىرىق كۇن بولىپ قالىپتى. كۇنى كەشە عانا ورتامىزدا جۇرگەندەي ەدى. ول كىسىنىڭ ەرەن ەڭبەگىن ايتىپ تاۋىسا الماسپىز. قامشىنىڭ سابىنداي قىسقا عۇمىرىندا ادامزات بالاسىنا, عىلىم سالاسىنا سىڭىرگەن يگىلىكتى ەڭبەگى جەتەرلىك. ەلىمىزدىڭ الەۋمەتتانۋ عىلىمىنىڭ دامۋىنا, وزىندىك عىلىمي مەكتەپتەردىڭ قالىپتاسۋىنا, عالىم-شاكىرتتەرگە تالىمگەرلىك ەتىپ, ولاردىڭ كاسىبي جەتىلۋىنە قوسقان ۇلەسى ەرەكشە.
گۇلناپيس ورىنباسارقىزى 1966 جىلى قىزىلوردا وبلىسىندا دۇنيەگە كەلگەن. 1985-1990 جىلدارى م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن فيلوسوفيا ماماندىعى بويىنشا بىتىرگەن. 90-جىلدارداعى ەلەۋلى دە ماڭىزدى الەۋمەتتىك وزگەرىستەردى باستان وتكەرگەن قيىن كەزەڭدە وقۋ-اعارتۋشىلىق قىزمەتىن باستاپ, 1993-1996 جىلدارى ءال-فارابي اتىنداعى قازاق ۇلتتىق ۋنيۆەرسيتەتىنىڭ اسپيرانتۋراسىندا وقىعان. 1997 جىلى «تۇلعانىڭ ساياسي الەۋمەتتەنۋى ماسەلەسىن الەۋمەتتانۋلىق تالداۋ» تاقىرىبىندا كانديداتتىق ديسسەرتاتسياسىن قورعاسا, 2008 جىلى «قازاقستان قوعامىنىڭ مودەرنيزاتسياسى ۇردىسىندەگى تۇلعانىڭ الەۋمەتتەنۋىنىڭ ۇلگىلەرى» تاقىرىبىندا دوكتورلىق ديسسەرتاتسياسىن تابىستى قورعاپ, الەۋمەتتانۋ عىلىمىنىڭ دوكتورى عىلىمي دارەجەسىنە يە بولعان.
گۇلناپيس ورىنباسارقىزىنىڭ الەۋمەتتانۋدىڭ وزەكتى ماسەلەلەرىنە قاتىستى 40-تان اسا وقۋ قۇرالى مەن مونوگرافياسى, 80-گە جۋىق عىلىمي جانە ادىستەمەلىك ماقالاسى جارىققا شىققان. پروفەسسور ءوز ەڭبەكتەرىندە تۇلعانى الەۋمەتتانۋلىق تۇرعىدان زەرتتەگەن الەۋمەتتانۋ عىلىمىنىڭ كلاسسيكتەرى مەن قازىرگى عالىمداردىڭ ەڭبەكتەرىنە سۇيەنە وتىرىپ, تۇلعا الەۋمەتتانۋىنىڭ دامۋىنا ولشەۋسىز ۇلەس قوستى.
عالىم كاسىبي جانە قوعامدىق قىزمەتىندەگى قاجىرلى ەڭبەگىنىڭ ارقاسىندا جوعارى ماراپاتتارعا يە بولدى. «قازاقستان رەسپۋبليكاسى ءبىلىم بەرۋ سالاسىنىڭ قۇرمەتتى قىزمەتكەرى» توسبەلگىسىمەن ماراپاتتالدى. ءبىلىم سالاسىنا سىڭىرگەن ەڭبەگىنىڭ جەمىسى رەتىندە 2011 جىلى «جوعارى وقۋ ورنىنىڭ ۇزدىك وقىتۋشىسى» بايقاۋىنىڭ جەڭىمپازى اتاندى. 2022 جىلى «ۇزدىك عىلىمي قىزمەتكەر» اتاعىنا يە بولدى.
«تاۋ الىستاعان سايىن بيىكتەي بەرىپ, تۇلعالانا تۇسەدى» دەمەكشى, عالىمنىڭ عىلىمعا, ونىڭ ىشىندە الەۋمەتتانۋ سالاسىنا سىڭىرگەن ەڭبەگى تاريحتا قالارى ءسوزسىز. گۋلناپيس ورىنباسارقىزى ومىردەن وتكەنىمەن, كىسىلىك كەمەل بولمىسى, بيىك ادامگەرشىلىگى مەن اق پەيىلى تالاي ادامنىڭ جادىندا ساقتالىپ قالعانى انىق. الدىڭىز – پەيىش, ارتىڭىز – كەنىش, جاتقان جەرىڭىز ءجانناتتىڭ ءتورى بولسىن. جارقىن بەينەڭىز ءسىزدى بىلەتىن ءاربىر جاننىڭ جۇرەگىندە ءاردايىم ساقتالادى.
ەسكە الۋشى:
اسەم وماروۆا,
ءال-فارابي اتىنداعى قازاق ۇلتتىق ۋنيۆەرسيتەتى الەۋمەتتانۋ جانە الەۋمەتتىك جۇمىس كافەدراسىنىڭ وقىتۋشىسى
