وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, كەيىنگى ەكى جىلدا جاساندى جولمەن 34 ءسابي ومىرگە كەلگەن. الايدا بەدەۋلىك بەلگىسىمەن ءالى دە 1 345 وتباسى ەسەپكە الىنعان.
«اڭساعان ءسابي» باعدارلاماسىمەن ومىرگە كەلگەن ءسابيدىڭ ءبىرى بەس ايدان بەرى اۋرۋحانادا جاتىر. جاقىندا شاقالاق پەريناتالدىق ورتالىقتان وبلىستىق بالالار اۋرۋحاناسىنا اۋىستىرىلدى. ونىڭ ومىرگە كەلگەن كەزدەگى سالماعى – 503 گرامم, ال بويى 28 سانتيمەتر بولعان. ەڭ جەڭىل سالماقتاعى بۇل ءسابي وتباسىنىڭ تۇڭعىشى ەكەن.
«مۇنداي جەڭىل سالماقتاعى ءسابي شالا تۋعاندار ساناتىنا الىنادى. وبلىستىق پەريناتالدىق ورتالىقتىڭ دارىگەرلەرى بەس ايدان بەرى سابيگە قارقىندى ەم-دوم جۇرگىزدى. وسى كەزگە دەيىن ونىڭ سالماعى 2 كيلو 500 گرامعا جەتتى. جاقىندا شاقالاق ودان ءارى جۇرگىزىلەتىن ەم-دوم شارالارىن جالعاستىرۋ ءۇشىن وبلىستىق بالالار اۋرۋحاناسىنا اۋىستىرىلدى. ويتكەنى ونىڭ وكپەسى كىشكەنتاي بولعاندىقتان, وعان ءالى دە سرار تۇتىكشەسىز اپپاراتىمەن وتتەگى بەرۋ قاجەت», دەپ حابارلادى پەريناتالدىق ورتالىقتىڭ ءباسپاسوز قىزمەتى.
بۇل نارەستەنىڭ اتا-اناسى ەكۇ ادىسىنە بەس رەت جۇگىنىپتى. ءۇمىت ۇزبەگەن ولار بيىل «اڭساعان ءسابي» باعدارلاماسىمەن تاعى دا ءسابي سۇيۋگە بەكىنگەن.
«وتباسىمىزدىڭ باستى ارمانى – ءسابي ءسۇيۋ. بيىل جۇكتىلىك ءساتتى ءوتىپ جاتقان ەدى. الايدا دەنساۋلىعىما بايلانىستى جۇكتىلىكتىڭ 22-اپتاسىندا ەگىز ءسابيدى بوسانۋعا تۋرا كەلدى. ەگىزدىڭ سىڭارى ءتورت ساعاتتان سوڭ شەتىنەدى. ەندى وسى قىزىمنىڭ اماندىعىن تىلەپ وتىرمىن», دەيدى ءسابيدىڭ اناسى انارگۇل.
وڭىردە تۋ كورسەتكىشىنىڭ ارتقانى بايقالىپ وتىر. ماسەلەن, بىلتىر اتىراۋ وبلىسىندا 11 مىڭ 133 ءسابي ومىرگە كەلگەن. ال بيىل سەگىز ايدا ولاردىڭ سانى 10 913-كە جەتتى.
بيىل تۋعان بالالاردىڭ دەنى اتىراۋ قالاسىندا تىركەلگەن. مۇنايلى شاھاردا 9 052 نارەستە دۇنيە ەسىگىن اشقان. ال 1 014 ءسابي جىلىوي اۋدانىنداعى اتا-انالارىن قۋانىشقا بولەدى. ال قۇرمانعازى اۋدانىندا شاقالاقتار قاتارى 324-كە كوبەيگەن. نارەستەلەردىڭ سانى ماقات اۋدانىندا – 165, يندەردە – 163, قىزىلقوعادا – 89, ماحامبەتتە – 68, يساتاي اۋدانىندا 38-گە ارتتى.
اتىراۋ وبلىسى
