وسى تۇستا تاعى دا «ەكىباستۇزداعى جارىلىس ساباق بولمادى ما؟» دەگەن ساۋال تۋادى. جوسپار بويىنشا سەنبى كۇنى جىلۋ بەرىلە باستاۋى كەرەك-ءتىن. وكىنىشكە قاراي, جەو-داعى اپات قالا تۇرعىندارىن الاڭداتىپ قويدى. ال كاسىپورىن باسشىلىعى بولسا, «اپات سەبەبىن انىقتايمىز, سالدارىمەن كۇرەسىپ جاتىرمىز» دەگەن جاۋاپپەن شەكتەلدى.
مەملەكەت باسشىسى بيىلعى جولداۋىندا ەنەرگەتيكالىق قاۋىپسىزدىك ماسەلەسىنە ايرىقشا توقتالعانى بەلگىلى. بۇل ماسەلە ۇكىمەتتە دە اپتا سايىن تالقىلانادى. وسى ورايدا ءدال جىلۋ ماۋسىمى باستالار تۇستا قاراعاندىدا وقىس جاعدايدىڭ ورىن العانى, ارينە, ولقىلىق بولدى.
اپات سالدارىنان قاراعاندىلىقتار جارىقسىز, سۋسىز قالدى. باعدارشامدار ءوشىپ, كەپتەلىس كوبەيدى. وسى تۇستا قالانىڭ جول قوزعالىسىن رەتتەۋگە جول-پاترۋلدىك پوليتسيا قىزمەتكەرلەرىنىڭ جەتىسپەگەنىن دە ايتا كەتكەنىمىز ءجون.
«قازىرگى ساتتە توپار گرەس-2 جۇكتەمەنى كوتەرىپ جاتىر جانە مەنىڭ تاپسىرماممەن ءبىرىنشى ورىنباسارىم ۆاديم باسين بولعان جاعدايدى انىقتاۋ ءۇشىن ستانساعا اتتانىپ كەتتى. جۇكتەمەنى كوتەرۋ جانە ءوڭىر تۇتىنۋشىلارىنا ەلەكتر جارىعىن قىسقامەرزىمدە بەرۋ ءۇشىن «KEGOC» جانە بارلىق ستانسالار شۇعىل شارالاردى قولعا الىپ جاتىر», دەپ بەينەۇندەۋ جولداعان وبلىس اكىمى ەرماعانبەت بولەكباەۆ تۇرعىنداردان تۇسىنىستىك تانىتۋدى سۇرادى.
الايدا تۇرعىندار الەۋمەتتىك جەلىدە جەلدەي ەسكەن ءتۇرلى اقپاراتتى وقىپ دۇرلىگۋمەن بولدى. WhatsApp الەۋمەتتىك جەلىسىندەگى چاتتاردا جارىقتىڭ كەشكە دەيىن, ءتىپتى كەلەسى كۇنى دە ءجوندى بەرىلمەيتىنى جونىندە حاتتار تارادى.
– رەسمي اقپاراتقا سەنەيىك دەسەك, جالپىلاما جاۋاپ بەرە سالادى. وسى سەنبى كۇنى جىلۋ بەرىلەدى دەپ وتىرعاندا, اپات بولعانى شىنىمەن الاڭداتىپ قويدى. قازىر كۇزگى سۋىق قوي. ەل توڭا باستادى. ەندى اپات سەبەبىن انىقتاپ, ونى قالپىنا كەلتىرگەنشە دە كوپ ۋاقىت كەتپەي مە دەگەن ۋايىم بار. الدىڭگۇنى قالا ءىشىن سۋ باستى, ەندى, مىنە, جارىقسىز قالدىق. بۇگىن مۇنداي كەلەڭسىزدىك تۋىنداسا, قىس ىشىندە نە كۇتىپ تۇر دەگەن وي دا بار, – دەيدى قالا تۇرعىنى ەلدوس بولات ۇلى.
ەندى ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتى اپاتتىڭ سەبەبىن انىقتاۋ ىسىمەن اينالىسادى.
«قاراعاندى-ەنەرگوتسەنتر» جشس 220 كۆ جەو-3 اشىق تاراتۋ قۇرىلعىسىندا قىسقا تۇيىقتالۋ جانە قاراعاندى جەو-3 جانە توپار گرەس-ءىن بايلانىستىراتىن 110 كۆ ەلەكتر بەرۋ جەلىلەرىنىڭ ودان ءارى شامادان تىس جۇكتەلۋى سالدارىنان اتالعان ەلەكتر ستانسالارىندا گەنەراتسيانىڭ تولىق تومەندەۋى ورىن الدى. ءوندىرىستىڭ تومەندەۋىنە بايلانىستى قاراعاندى قالاسى مەن قاراعاندى وبلىسىنىڭ ونەركاسىپتىك تۇتىنۋشىلارى بويىنشا شامامەن 350 مۆت شەكتەۋلەر ەنگىزىلدى», دەپ رەسمي اقپارات تاراتتى ەنەرگەتيكا مينيسترلىگى.
دەگەنمەن كەشكىلىك قالانىڭ بىرنەشە اۋدانىنا جارىق بەرىلە باستادى. «قاراعاندى جارىق» جشس قىزمەتكەرلەرى قىزۋ كىرىسىپ, جارىق قوسىلماعان باسقا دا كوشەلەردى ەلەكتر قۋاتىمەن قامتاماسىز ەتۋدى جالعاستىرۋعا كىرىستى.
جوعارىدا اتاپ وتكەندەي, الدىڭگۇنى قاراعاندى كوشەلەرى كولگە اينالدى. تولاسسىز جاۋعان جاۋىن كەشكىلىك ەل-جۇرتتى ابدەن ابىگەرگە سالدى. قالانىڭ سۋاعارلارى بىتەلىپ قالعاندىقتان, جاياۋ جۇرگىنشىلەر تولارساقتان سۋ كەشۋگە ءماجبۇر بولدى.
ءتىپتى كەيبىر مەكەمەلەردى دە سۋ باستى. اۆتوبۋستارعا دا سۋ كىرگەن. كولىكتەر سۋعا بەلشەدەن باتتى. كەيبىر جۇرگىزۋشىلەردىڭ كولىگى جۇرە الماي, سۋ ورتاسىندا قالدى. ءىشىن سۋ الىپ كەتكەندىكتەن, كولىكتىڭ ۇستىنە شىعىپ العان جولاۋشىلاردى دا كوردىك. قاراعاندى تەحنيكالىق ۋنيۆەرسيتەتىنە دە سۋ كىرىپ, ستۋدەنتتەر جالاڭاياق سىرتقا قاشىپ شىعىپتى.
اكىمدىك جاۋىننىڭ مولشەرى كوپتىگىن جاۋاپ ەتەدى. ال جۇرتشىلىق سۋاعارلاردىڭ جوقتىعىن, بارلارى بولسا بىتەلىپ قالعانىن ايتىپ نارازى.
– قاراعاندىعا جاڭبىر جاۋسا بولدى, كولگە اينالادى. اياق الىپ جۇرەتىن جەر جوق. جاڭبىردىڭ سۋى سۋىق قوي. اۋا رايى دا سالقىن. قانشاما ادام سۋ كەشتى كەشە. ۇنەمى سۋ باسادى دا جاتادى. كولىگى جوق جۇرتقا قيىن. قانشاما كولىك سۋ استىندا قالىپ, بۇزىلدى. ءبىر-اق ساعات قۇيعان شىعار توقتاماي. بۇرىندارى دا جاڭبىر بۇدان قاتتى جاۋاتىن. بىراق مۇنداي بولمايتىن, – دەيدى قالا تۇرعىنى اسحات نيحانباي ۇلى.
بۇدان بولەك, الەۋمەتتىك جەلىدە كولگە اينالعان كوشەلەردىڭ ءتۇرلى ۆيدەولارى تاراۋدا. ونداعى ونلاين ەلدىڭ دە پىكىرى جوعارىداعى اڭگىمەگە سايادى.
قاراعاندىداعى ەكىكۇندىك قاربالاس وسى. ابدەن ابىگەرگە تۇسكەن قاراعاندى جۇرتى ءار ىستەن قايىر كۇتەدى.
قاراعاندى وبلىسى
