ارينە, تۇرمەگە وڭدى-سولدى كىرىپ شىعۋدىڭ رەتى بولماعاندىقتان, مەكەمە باسشىلىعى وندىرىستىك اۋماققا اپارماس بۇرىن تەمىر تورداعى تىرشىلىكپەن تانىستىردى. اسحانا, كىتاپحانا, كومپيۋتەر بولمەسى, پسيحولوگپەن كەڭەسەتىن بولمە, تەولوگتەن ءدارىس الاتىن بولمە جانە ارنايى ءبىر جاساقتىڭ جاعدايىمەن تانىستىرىپ, ارالاتتى. تۇرمەنىڭ وندىرىستىك اۋماعىنا وتكەنىمىزدە شاعىن كورمە قويىلدى. وسى اۋماقتا وندىرىلەتىن, نارىققا شىعاتىن ونىمدەردى تاماشالاي الدىق. سورەگە 5 ليترلىك پلاستيكالىق ىدىستان باستاپ, اسكەري جابدىق, جۋىنۋ بولمەسىنە ارنالعان كەراميكالىق ىدىس, ءتۇرلى تۇرمىستىق بۇيىمدار, جىلىجايدا وسىرىلگەن قيار, قىزاناق, ساڭىراۋقۇلاق قويىلعان. تازا بىلعارىدان تىگىلگەن اياق-كيىم, ارنايى سالالىق كيىمدەر دە بار. قۇرىلىسقا قاجەتتى ماتەريالدار: كىرپىش, بلوكتەر, شەكاراعا قولدانىلاتىن سىم دا وسى تۇرمەنىڭ وندىرىستىك اۋماعىنان شىعادى. مۇندا تىگىلگەن اياقكيىم سۇرانىسقا يە. قىسقى, كۇزگى, جازعى ەر مەن ايەلدەر اياقكيىمى بار. باعاسى – قولجەتىمدى.
– باعالارى 20 مىڭ تەڭگەدەن باستالادى. ساپاسى جوعارى بولۋ ءۇشىن تازا بىلعارىدان تىگەمىز. ماتەريالدى تۇركيادان, رەسەيدەن الدىرامىز. ينتەرنەتتەن اياقكيىمنىڭ كەز كەلگەن ۇلگىسىن كورسەتسەڭىز, ولشەمىڭىزدى الىپ, قالعانىڭىزداي تىگىپ بەرەمىز. ونلاين دا تاپسىرىس قابىلدايمىز. قازىر برەند اتاۋىمىزدى ويلاستىرىپ جاتىرمىز. ساپاسى جاقسى بولعان سوڭ, تاپسىرىسىمىز دا كۇننەن-كۇنگە ءوسىپ كەلەدى. جازاسىن وتەپ جاتقان 5 ادامدى جۇمىسپەن قامتىپ وتىرمىن. ولاردىڭ اراسىندا بۇرىن اياقكيىم تىككەندەر دە بار. جالاقىنى تاپسىرىستىڭ كولەمىنە قاراي تولەيمىز, – دەيدى جەكە كاسىپكەر كريستينا ەلتسوۆا.
«بۇرىن مۇنداي كاسىپپەن اينالىسقان سوڭ, بىزگە اياق كيىم تىگۋ اسا قيىندىق تۋدىرمايدى. ەڭبەكاقىمىزدى ادال الايىق دەپ ءار ەتىكتى ساپالى ەتىپ تىگۋگە تىرىسامىز. تىگىلگەن اياقكيىم كولەمىنە سايكەس تولەنەدى. باستىسى, مۇندا ۋاقىت وتەدى. قاسىمدا ەكى ەتىكشى بار», دەيدى ەسىمىن كورسەتپەۋدى وتىنگەن جازاسىن وتەۋشى.
مۇندا راكوۆينا شىعاراتىن شاعىن تسەح تا بار. ءۇش سوتتالۋشى ەڭبەك ەتەدى. كەراميكادان قۇيىلاتىن بۇل ماتەريالعا دا سۇرانىس جوعارى ەكەن. باعاسى دا نارىقتاعىدان ارزان. بىراق كاسىپكەرلەر باسقا مەكەمەگە كوشۋگە ءماجبۇر. سەبەبى ءۇش جۇمىسكەرىن اۋىستىرىپ جاتىر.
– نەگىزى, بۇل جۇمىستى يگەرىپ كەتۋ وڭاي ەمەس. ءبىز جۇمىسكەرلەرىمىزدى ءبىر جىلعا جۋىق ۇيرەتتىك. ولار اۋىسىپ بارا جاتقان مەكەمەگە كوشۋگە تۋرا كەلەدى. باسقالاردى قايتادان ۇيرەتۋگە ءبىر جىل جوعالتقاننان گورى ۇيرەنگەن ماماندارمەن جۇمىستى جالعاستىرعان الدەقايدا ءتيىمدى. جۇمىس اۋقىمىمىز ۇلعايىپ جاتىر. ءونىمىمىزدى قۇرىلىس ماتەريالدارىن ساتاتىن دۇكەندەرگە وتكىزەمىز. «Kaspi.kz» قوسىمشاسى ارقىلى دا ساۋدالاپ جاتىرمىز. ەندى ۆاننا شىعارماقشىمىز. سوسىن ءوزىمىزدىڭ برەندپەن دۇكەنىمىزدى اشساق دەگەن ماقساتىمىز دا بار. مۇنداعى جۇمىسكەرلەرمەن جۇمىس ىستەۋ وتە ءتيىمدى. كەشىكپەيدى, سۇرانبايدى, بىرىڭعاي جۇمىسپەن اينالىسادى جانە جۇمىستارىنا تياناقتى, – دەيدى كاسىپكەر نۇرسۇلتان اكەنوۆ.
ونىمەن قوسا, 5 ليترلىك پلاستيكالىق ىدىستى ارنايى ستانوكپەن وندىرەدى. مۇندا تەك ءبىر عانا مامان جۇمىس ىستەيدى. كۇنىنە الگى ستانوكتىڭ كۇشىمەن مىڭ ىدىس وندىرەدى. ءالى ساتىلىمعا شىعا قويماعان. قازىر تۇرمەنىڭ قاجەتىن عانا وتەپ تۇر. ءسۇت, سۋ تاسىمالدايدى.
ساڭىراۋقۇلاق تسەحىندا دا جۇمىس قىزۋ. جۇمىسپەن قامتىلعان جازاسىن وتەۋشىلەر ارنايى تەمپەراتۋراسى بار بولمەدە وسىرىلگەن ساڭىراۋقۇلاقتاردى سورتتاپ, پاتەنتتەيدى.
«ەڭبەك-قاراعاندى» رەسپۋبليكالىق مەملەكەتتىڭ كاسىپورىننىڭ №6 ونەركاسىپتىك ۋچاسكەسىنىڭ باسشىسى اسحات امانبەكوۆ بوس تۇرعان اۋماقتاردى دا كورسەتتى. «شاعىن جانە ورتا كاسىپپەن اينالىساتىن نيەتتىلەر بولسا, جەر بەرەمىز, بوس تسەحتاردى دا جالعا بەرۋگە ىقتيارمىز. 1 200 گەكتار جەر تەلىمى بار. ەگەر بيزنەسى ءۇشىن ءمودۋلدى كەشەن سالامىز دەسە, رۇقسات بەرەمىز. ناتيجەسىندە, جازاسىن وتەپ جاتقانداردى ەڭبەكپەن قامتۋعا مۇمكىندىك كوبەيەر ەدى» دەيدى ۋچاسكە باسشىسى.
ءبىز بارعان ونەركاسىپتىك اۋماقتا 145 سوتتالۋشى ەڭبەك ەتىپ, جالاقى الىپ وتىر. اشىق ەسىك كۇنىنە ارنايى بارعان وبلىستىق قوعامدىق كەڭەس مۇشەلەرى دانارا سمايل, بولات سىزدىق مەكەمە باسشىلارىنا ۇسىنىس-پىكىرلەرىن جەتكىزدى.
قاراعاندى وبلىسى
