كەزىندە ءوزىنىڭ جان دۇنيەسىن جارىپ شىققان «اباي – ايگەرىم», «قوس مۇڭلىق» درامالىق تۋىندىلارى – كورەرمەن قاۋىمنىڭ كوڭىلىن جاۋلاپ العان ۇزدىك شىعارمالارى. ەكەۋى دە بۇگىنگى كۇنگە دەيىن ساحنا تورىنەن تۇسكەن ەمەس.
سونىڭ ءبىر كۋاسى جەتىسۋ وبلىسىنىڭ بيكەن ريموۆا اتىنداعى دراما تەاترى ايگىلى اكتەردىڭ جۇزجىلدىق مەرەيتويىنىڭ قۇرمەتىنە وراي تۇعىرلى تۇلعانىڭ ءوزى جازىپ ساحنالاعان «قوس مۇڭلىق» سپەكتاكلىن جۋىردا استاناداعى جاستار تەاترىندا قويدى.
بۇل سپەكتاكل قازىر قوعامدى جايلاپ بارا جاتقان جاعىمسىز جاعداي – قارتايعان اتا-اناسىنا قايىرىمسىز بولعان كەسىرلى ۇرپاقتىڭ مىنەز-قۇلقىن بۇكپەسىز اشىپ بەرگەن. ءوزى ءوسىرىپ, ەرجەتكىزگەن, ماپەلەپ, باۋىرىنا باسقان بالالارىنىڭ جامان جولعا تۇسكەنىن, اكە-شەشەسىنە جىلى ۇياسىنان قارتتار ۇيىنە قۋىپ, سوندا بارۋعا ماجبۇرلەۋ وتە ايانىشتى, درامالىق تارتىستا شەبەر بەينەلەنگەن. سپەكتاكلدە اتا-انا قادىرىن بىلمەيتىن, اراق پەن ناشاعا ساناسى ۋلانعان جاستاردىڭ دايىن ولجا, ارزان ومىردەن وپىق جەيتىنىن دە قاتتى ەسكەرتەدى. تىكباقاي قىز, نامىسسىز جىگىتتىڭ ساناسىز ءومىرىن زامان شىندىعىنا ساي بۇكپەسىز كورسەتىپ بەرگەن.
«قوس مۇڭلىق» باستالىسىمەن دەمىن ىشىنە تارتا وتىرىپ كورىپ شىققان كورەرمەن بيكەن اپامىزدىڭ بۇل قويىلىمىنا شەكسىز ريزا بولدى. زامانا شىندىعىن, ونداعى كەيىپكەرلەر ءرولىن سومداعان اكتەرلەردىڭ ورەلى ونەرى ادامدى قالىڭ ويعا باتىرادى. اسىرەسە وسى سپەكتاكلدىڭ ءونبويىندا ءبىر تىنىم تاپپاي, ءبىر ءۇزىلىسسىز كۇش-قايراتىن سارقا جۇمساعان, باستى رولگە شەكسىز شەبەرلىگىن سالعان كۇنزيپا رولىندەگى قازاقستاننىڭ حالىق ءارتىسى الماحان كەنجەبەكوۆاعا بارشا كورەرمەن ريزالىعىن ءبىلدىردى.
قويۋشى رەجيسسەر, قازاقستاننىڭ ەڭبەك سىڭىرگەن ءارتىسى مۇرات اقمانوۆتىڭ تاپقىر شەشىمدەرى كوپشىلىكتى ءتانتى ەتتى. ادامنىڭ ىشكى جان دۇنيەسىن, تولعانىسىن, كۇيزەلىسىن, ءتۇرلى تىڭ يدەيالاردى ساحنالىق ءىس-قيمىلدارمەن ۇتىمدى قيۋلاستىرىپ بەرگەنى, وزىندىك ىزدەنىستىڭ وزگەشە ورنەگى ىسپەتتى. سونىڭ ارقاسىندا بارلىق اكتەرلەردىڭ رولدەرى ءوز دارەجەسىندە سەنىمدى دە شىنايى بولىپ شىققان. «قوس مۇڭلىقتىڭ» ءبىر سىڭارى گۇلبارام ءرولىن سومداعان ماكەن نۇرمۇحامبەتوۆانىڭ دا, اسىرەسە پەرزەنتتىك پارىزىن ۇمىتقان, ۇنەمى اناسىنا قارسى شىعىپ, جاعالاسقان كۇنزيپانىڭ ۇلى الداننىڭ رولىندەگى داۋلەت قاناتتىڭ قابىلەت-قارىمى دا كورەرمەن كوڭىلىنەن شىقتى.
ءبىر سوزبەن ايتقاندا, «قوس مۇڭلىق» – قازىرگى قوعام ءومىرىنىڭ اششى شىندىعى. اتا-اناسىن قادىرلەمەۋدىڭ ءتۇبى جامانشىلىققا الىپ كەلەتىن وتە سوراقى تىرىلىك ەكەنىن, جانىڭدى جەگىدەي جەپ وتىرىپ كورسەتىپ بەرەتىن وتە ۇلاعاتتى درامالىق تۋىندى دەر ەدىك. مۇنى ءبىز سپەكتاكل بىتىسىمەن جەتىسۋلىق ونەر قايراتكەرلەرىنە تىك تۇرىپ قول سوققان كورەرمەندەردىڭ ريزالىعىنان, وعان قوسا كوزدەرىن جاسقا تولتىرىپ تۇرىپ, تاعدىرى تالكەككە تۇسكەن «قوس مۇڭلىقتىڭ» وبرازىن رياسىز كورسەتكەن اكتەرلەرگە دەگەن زور قۇرمەتتەن شەكسىز سەزىندىك.
بۇگىنگى قوعامدىق ومىردەگى كەلەڭسىز قىلىقتاردى اشكەرەلەيتىن, كوكەيگە وي سالاتىن, جاماننان جيرەندىرەتىن مۇنداي سپەكتاكلدەردى وسكەلەڭ ۇرپاق ءجيى كورىپ, تەاتر تالىمىنەن ۇلاعات السا ەكەن دەيمىز.
مۇحاممەد حانافيا,
فاتيما ەرتورەقىزى
