فوتو: primeminister.kz
ءاليحان سمايىلوۆ بەلارۋس قازاقستان ءۇشىن ماڭىزدى ساۋدا-ەكونوميكالىق سەرىكتەس ەكەنىن اتاپ ءوتتى. وتكەن جىلى ەكىجاقتى تاۋار اينالىمى 23%-عا ءوسىپ, $1 ملرد شەگىنەن استى. پرەمەر-ءمينيستردىڭ ايتۋىنشا, ءوسىمنىڭ جوعارى سەرپىنىن ساقتاۋ ءۇشىن جەتكىزىلەتىن تاۋارلار مەن قىزمەتتەردىڭ اۋقىمىن كەڭەيتۋ بويىنشا بىرلەسكەن جۇمىستى جالعاستىرۋ قاجەت.
سونىمەن قاتار ەكى ەل اراسىنداعى سەرىكتەستىكتىڭ قوزعاۋشى كۇشىنىڭ ءبىرى – ونەركاسىپتىك كووپەراتسيا. ماسەلەن, قازىردىڭ وزىندە قۇنى $180 ملن-عا جۋىق 8 جوبا جۇزەگە اسىرىلىپ, سونىڭ نەگىزىندە 1400 جاڭا جۇمىس ورنى اشىلدى. ىسكە اسىرۋ ساتىسىندا قۇنى $19 ملن-دى قۇرايتىن 2 جوبا بار. بۇل رەتتە قازاقستان مەن بەلارۋس ۆەدومستۆولارى 800-گە جۋىق جۇمىس ورنىن قۇرۋ ارقىلى قۇنى $100 ملن-نان اساتىن تاعى 4 جوبانى ىسكە قوسۋ بويىنشا جۇمىس جۇرگىزىپ جاتىر.
«قازاقستان يندۋستريالىق ىنتىماقتاستىقتى دامىتۋعا, جاڭا بىرلەسكەن جوبالاردى ىسكە اسىرۋعا جانە قولدانىستاعى ءوندىرىس ورىندارىنىڭ قۋاتىن كەڭەيتۋگە مۇددەلى», دەدى ءاليحان سمايىلوۆ.
ءوز كەزەگىندە بەلارۋس پرەمەر-ءمينيسترى قازاقستان رەسپۋبليكاسى مەن بەلارۋس رەسپۋبليكاسىنىڭ تابىستى ىنتىماقتاستىق جوبالارى وسى باعىتتى ودان ءارى دامىتۋ ءۇشىن ۇلگى بولا الاتىنىن اتاپ ءوتتى.
«بۇگىندە بىرلەسكەن وندىرىستىك قۋاتتار قازىردىڭ وزىندە قازاقستاندا جىلىنا 10 مىڭ تراكتور مەن 1 مىڭعا دەيىن كومباين شىعارۋعا مۇمكىندىك بەرەدى. ءبىز بۇل جوبالارعا الداعى ۋاقىتتا دا قولداۋ كۇتەمىز», دەدى رومان گولوۆچەنكو.
سونىمەن قاتار ول اگروونەركاسىپتىك كەشەن, ءورت ءسوندىرۋ-قۇتقارۋ تەحنيكاسىن ءوندىرۋ جانە قۇرىلىس سالاسىنداعى ءوزارا ءىس-قيمىلدى تەرەڭدەتۋ پەرسپەكتيۆالارىن اتاپ كورسەتتى.
