فوتو: kokshetv.kz
جەرلەس جاۋىنگەر ماسكەۋ تۇبىندەگى پولاشكينو سەلوسىندا قازا تاپقان ەكەن. لەنكي ەلدى مەكەنىندەگى باۋىرلاستار قابىرىنەن توپىراق بۇيىرعان. قان مايداندا 108-اتقىشتار ديۆيزياسىنىڭ 407-اتقىشتار پولكىنىڭ قۇرامىندا بولعان. 24 جاسىندا قان مايدانعا اتتانعان قىرشىن جاۋىنگەردىڭ ارتىندا ۇرپاق قالماپتى. ايتسە دە ءىنىسى مەن قارىنداسىنان وربىگەن ۇرپاق اتالارىنىڭ قابىرىن تاۋىپ, ءبىر ۋىس توپىراعىن تۋعان جەرىنىڭ توسىنە جەتكىزدى.
– اتامىز تۋرالى ءبىر دەرەك شىعىپ قالا ما دەپ ۇزاق جىل ىزدەدىك, – دەيدى مارقۇمنىڭ جيەنى بوتاگوز نۇرپەيىسوۆا. – «پامياتي نارودا» سايتى ارقىلى تاپتىق. ودان ءارى قالاي ارەكەت ەتەرىمىزدى دە بىلمەدىك. ايتەۋىر, جاناشىر جانداردىڭ ارقاسىندا اتامىز جەرلەنگەن جەرگە بارىپ, قابىرىنە تۋعان جەردىڭ ءبىر ۋىس توپىراعىن قوستىق. ول جاقتان دا ءبىر ۋىس توپىراق اكەلدىك. ەندىگى ويىمىز, مايدانگەردىڭ ەسىمىن جاڭعىرتاتىن كەش ۇيىمداستىرساق پا دەيمىز.
قازاق گۋمانيتارلىق-تەحنيكالىق كوللەدجىنىڭ ۇجىمى 2018 جىلى «كوكشەتاۋ ىزدەۋ» اسكەري-پاتريوتتىق توبىن ۇيىمداستىرعان ەكەن. نەگىزگى ماقسات – ەكىنشى دۇنيەجۇزىلىك سوعىس كەزىندە حابار-وشارسىز كەتكەن جاۋىنگەرلەردىڭ دەرەگىن تابۋ. وسى ۋاقىتقا دەيىن ۇيىم ءتورت مىڭعا جۋىق جاۋىنگەر تۋرالى دەرەك ىزدەپ, ونىڭ 300-دەن استامىنىڭ جەرلەنگەن جەرىن تاپقان.
– ءبىزدىڭ كلۋب اقمولا وبلىسىندا تۇڭعىش رەت قۇرىلعان. بىلايعى جۇرت ءبىزدى «ەستەلىكتەر ۆاحتاسى» دەپ اتاپ كەتتى. كالۋگا, تۋلا توڭىرەگىنە بارىپ, ۋكراينا, سانكت-پەتەربۋرگ ماڭايىن زەرتتەگەنبىز, – دەيدى ىزدەستىرۋ توبىنىڭ جەتەكشىسى ەركىنبەك ابدۋللين. – ەرلەردىڭ اتى ولمەي, كەيىنگى ۇرپاققا ەرلىك ىستەرى ونەگە بولۋى كەرەك. قازاقتا ء«ولى رازى بولماي, ءتىرى بايىمايدى», دەگەن ءسوز بار. بۇل – كەيىنگىلەردىڭ پارىزى.
جەرلەس جاۋىنگەردىڭ توپىراعى التىندى اۋىلىندا جەر قويناۋىنا تابىستالدى. راسىمگە وسى توڭىرەكتەگى ات تۇياعى جەتەتىن جەردىڭ بارىنەن كوپ ادام جينالدى. قۇران باعىشتالىپ, اس بەرىلدى.
اقمولا وبلىسى,
بۇلاندى اۋدانى
