«كەڭەستە «ورتا دەرجاۆالاردىڭ» جانە بارلىق دامۋشى ەلدەردىڭ ءۇنى كۇشەيەتىنىنە, انىق ەستىلەتىنىنە كامىل سەنەمىن», دەدى قاسىم-جومارت توقاەۆ نيۋ-يوركتە وتكەن بۇۇ باس اسسامبلەياسىنىڭ كەزەكتى سەسسياسىندا.
«بايقاۋىمىزشا, قاۋىپسىزدىك كەڭەسى تىعىرىقتان شىعا المايتىن سياقتى. سوندىقتان بەيبىتشىلىك پەن قاۋىپسىزدىكتى ساقتاۋدا ماڭىزدى ءرول اتقارا الۋى ءۇشىن ونىڭ قۇرامىندا باسقا ەلدەر, سونىڭ ىشىندە قازاقستان دا بولۋى كەرەك», دەدى ول.
ق.توقاەۆ كەي مەملەكەتتەردىڭ حالىقارالىق قۇقىقتىڭ نەگىزگى پرينتسيپتەرىنە ساي ارەكەت ەتپەۋى مەن كەيدە ونى بۇزۋىنا الاڭداۋشىلىق ءبىلدىردى. مۇنداي جاعداي ساۋدا جۇيەسىن بۇزاتىنىن, ەكونوميكانىڭ وزەگى سانالاتىن تاسىمال تىزبەگىن السىرەتەتىنىن, سونداي-اق ازىق-ت ۇلىك قاۋىپسىزدىگىنە زاردابىن تيگىزىپ, ينفلياتسيانىڭ قارقىنىن كۇشەيتەتىنىن اتاپ ءوتتى.
«وسكەلەڭ ۇرپاق وزدەرىنە مۇرا بولىپ قالاتىن الەمنىڭ ەندى جاقساراتىنىنا سەنبەيدى. سوندىقتان قازاقستان بۇۇ جارعىسىنىڭ قاعيداتتارىنا ءوزىنىڭ مىزعىماس ادال ەكەنىن تاعى ءبىر رەت مالىمدەيدى», دەدى پرەزيدەنت.
توقاەۆ قابىلدانىپ جاتقان بارلىق شەشىمگە قاراماستان, الەمنىڭ كوپتەگەن ايماعىندا قاقتىعىستار جالعاسىپ جاتقانىنا نازار اۋداردى. بۇكىل تاراپتى بۇۇ جارعىسى مەن حالىقارالىق قۇقىقتىڭ جالپىعا بىردەي نورمالارىن نەگىزگە الا وتىرىپ, قاقتىعىستاردى رەتتەۋدىڭ ديپلوماتيالىق جولىن ىزدەۋگە شاقىردى.
«ديالوگ – جاڭا پرينتسيپتەر مەن نورمالار بويىنشا كەلىسىمگە قول جەتكىزۋگە مۇمكىندىك بەرىپ, قولايلى ورتا قالىپتاستىرۋدىڭ جالعىز جولى», دەدى ول.
مەملەكەت باسشىسى COVID-19 پاندەمياسىنىڭ اۋىر سالدارى بولاشاق بيولوگيالىق قاۋىپ-قاتەرلەر الدىندا دارمەنسىز ەكەنىمىزدى كورسەتىپ بەرگەنىنە نازار اۋداردى. وسىعان بايلانىستى قازاقستان اسسامبلەيانىڭ باس حاتشىسى مەن توراعاسىنا بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ پروتسەسىن باستاۋ تۋرالى ۇندەۋ تاستادى.
«جۋىردا قاسيەتتى كىتاپتارعا قۇرمەتسىزدىك تانىتۋ اكتىلەرى بولدى. ءبىز وسى جاعدايعا الاڭداۋشىلىق بىلدىرەمىز. يسلامعا جانە باسقا دا دىندەرگە قاتىستى جاسالعان مۇنداي تاعىلىق ارەكەتتەردەن ەركىندىكتىڭ, ءسوز بوستاندىعىنىڭ جانە دەموكراتيانىڭ نىشانى بىلىنبەيدى. قۇران سەكىلدى قاسيەتتى كىتاپتاردىڭ ءبارى ۆانداليزمنەن قۇقىقتىق تۇرعىدا قورعالۋعا ءتيىس», دەدى ق.توقاەۆ.
قازاقستان پرەزيدەنتى ءوز ەلىنىڭ ۇلتتىق مۇددەسىن كوزدەي وتىرىپ, وزەكتى حالىقارالىق ماسەلەلەردى شەشۋدىڭ ۇنەمى بەيبىت جولىن ىزدەيتىن مەملەكەت ەكەنىن اتاپ ءوتتى. «تاۋەلسىزدىك, اۋماقتىق تۇتاستىق جانە ەگەمەندىك – مۇنىڭ ءبارى حالقىمىز قازىر دە, كەلەشەكتە دە باسشىلىققا الاتىن مىزعىماس قاعيدالار. ءبىز بارلىق ستراتەگيالىق ماسەلە بويىنشا نەگىزگى وداقتاستارىمىزبەن قارىم-قاتىناسىمىزدى جالعاستىرا بەرەمىز», دەدى ول.
قازاقستان بۇۇ قاۋىپسىزدىك كەڭەسىن رەفورمالاۋدى ۇسىندى
قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ سەسسياسىندا سويلەگەن سوزىندە قاۋىپسىزدىك كەڭەسىن رەفورمالاۋدى ۇسىندى. وسىلايشا, ۇيىمدا قازاقستان سەكىلدى مەملەكەتتەر ماڭىزدى ءرول اتقارا الاتىنىن جەتكىزدى.
توقاەۆ 78-سەسسيانىڭ اشىلۋىندا سويلەگەن سوزىندە قاۋىپسىزدىك كەڭەسىنە جان-جاقتى رەفورما جاساماي, ۋكرايناداعى سوعىس سەكىلدى قيىندىقتار ەڭسەرىلمەيتىنىن مالىمدەدى. وسى ورايدا, ۆەتو قۇقىعى بار مەملەكەتتەر – رەسەي, قىتاي مەن اقش اراسىنداعى الاۋىزدىقتان ۇيىم كەدەرگىگە تاپ بولعانىن نۇسقاپ وتىر.
«بەيبىتشىلىك پەن قاۋىپسىزدىكتى ساقتاۋدا ماڭىزدى ءرول اتقارا الۋى ءۇشىن ونىڭ قۇرامىندا باسقا ەلدەر, سونىڭ ىشىندە قازاقستان دا بولۋى كەرەك», دەدى ق.توقاەۆ.
قازاقستان پرەزيدەنتى الەمنىڭ ءار بولىگىندە قاقتىعىس بولىپ جاتقانىن اتاپ ءوتىپ, بۇۇ جارعىسى مەن حالىقارالىق قۇقىقتىڭ جالپىعا بىردەي نورمالارىن نەگىزگە الا وتىرىپ, قاقتىعىستاردى رەتتەۋدىڭ ديپلوماتيالىق جولىن ىزدەۋگە شاقىردى. «وسى ورايدا قازاقستان ۋكراينا داعدارىسىن ساياسي رەتتەۋدى قولدايتىن ءتۇرلى مەملەكەتتەر مەن ەلدەر توپتارى ۇسىنعان بارلىق باستامالار مەن جوسپارلاردى جوعارى باعالايدى. حالىقارالىق داۋلاردى شەشۋدە ارقاشان ديپلوماتيا مەن ديالوگ باسشىلىققا الىنۋى كەرەك», دەدى ق.توقاەۆ.
