قاراعاندىنىڭ بانك كوللەدجىنە وقۋعا تۇسكەن ەسبولات ەربولات ۇلى ستۋدەنت كەزدە بوس جۇرىسپەن ۋاقىت وتكىزبەدى. قولى قالت ەتسە, ەڭبەك ەتتى. قاتارلاستارى سەكىلدى قىزىق قۋعان جوق. بار ويى – كيىمىنە, ءجۇرىپ-تۇرۋىنا اۋىلداعى اتا-اناسىنان اقشا سۇراماۋ ەدى. ءوزى بولىپ-تولعىسى كەلدى.
سودان تانىس دوسى ارقىلى اۆتوبۋسقا كوندۋكتور بولىپ جۇمىسقا تۇرادى. ءۇش جىل كانىگى جۇرگىزۋشىنىڭ جانىندا ءجۇرىپ, جۇمىستىڭ بارىسىن ابدەن مەڭگەرىپ الادى. ەڭبەككە وسىلاي ەتى ەرتە ۇيرەنەدى. وسى ۋاقىت ارالىعىندا وقۋىن دا ويداعىداي بىتىرەدى. بىراق ديپلوممەن جۇمىس ىستەۋ اياققا تۇرۋعا قيىن بولاتىنىن و باستان تۇسىنگەن. ەسبولات كوندۋكتور بولىپ جۇرگەن كەزىندە جۇرگىزۋشى كۋالىگىن وقىپ الادى. وقۋىنان ابدەن بوساعان سوڭ بىردەن جۇرگىزۋشى بولۋدى ۇيعارادى. اۆتوپارك باسشىلارى دا ەڭبەكقور جىگىتتىڭ ەرىك-جىگەرىن جاقسى بىلەدى. بىردەن قابىلداپ, اۆتوبۋس بەرەدى. مىنە, سودان بەرى ون جىل ءوتتى. №43 اۆتوبۋستىڭ جۇرگىزۋشىسى.
ەسبولات – اكە-شەشەسىنىڭ جالعىز ۇلى. «مۇنداي بولىپ ەرجەتۋىمە اكەم مەن شەشەمنىڭ پاراساتى, تاربيەسى سەپ», دەيدى ءوزى. جالعىز بالالارىن وبەكتەپ ەمەس, ەڭبەكتەن قاشپايتىن, وجەت قىلىپ وسىرگەن اكە-شەشەسى دە اۋىلدىڭ قاراپايىم ەڭبەك ادامدارى ەكەن.
«بالا كەزىمنەن اكەمە كومەكتەستىم. مال جايعاعاندا دا, ءشوپ شاپقاندا دا, ءۇي شارۋاسىندا دا ۇنەمى قاسىندا ءجۇردىم. انام ەكەۋمىز ورمانعا بارىپ, ساڭىراۋقۇلاق تەرەتىنبىز. اۋىر شەلەكتى كوتەرىپ, ونى ارباعا تيەپ, اۋىلعا دەيىن سۇيرەپ كەلەتىنبىز. ويىن بالاسى بولعاندا بار ويلايتىنىم, اكەم مەن اناما قولعابىس ەتۋ ەدى. سونىڭ ءبارى مەنى شىڭدادى», دەيدى ە. ەربولات ۇلى.
ەسبولات قالادا ءجۇرىپ, اۋىلداعى قارا شاڭىراعىنىڭ قامىن كۇيتتەپ وتىر. اكەسىنە كولىك مىنگىزگەن. قوراسىن مالعا تولتىرعان.
ءوزى دە قالادان ەكى بولمەلى پاتەر العان. بىلتىر ۇيلەنىپ, تويىن دا دۇركىرەتىپ جاساعان. «وسىنىڭ ءبارى – اۆتوپاركتە ەتكەن ەڭبەگىمنىڭ ماڭداي تەرى», دەيدى ول.
قازىر اياۋلى جارى گۇلجارقىن ەكەۋىنىڭ رايانا ەسىمدى كىشكەنتاي كوزقۋانىشتارى بار. جاقىندا عانا تۇساۋىن كەسكەن. ءار باسقان قادامىنان شۋاق سەزىنىپ وتىر.
«كەشكە قاراي جۇمىستان قاجىپ كەلىپ, قىزىمدى قۇشاقتاپ, يىسكەگەندە, بۇكىل شارشاعانىم باسىلىپ قالادى. قازىر ۇيگە اسىعامىز», دەيدى ەزۋ تارتىپ.
تاڭ بوزارىپ اتقاننان اتقا قونادى. شامامەن, تاڭعى بەس-التىنىڭ كەزىندە اۆتوبۋستى مايلاپ الادى. سودان جولعا شىعادى. كەشكە دەيىن كۇنىنە قالا ىشىندە 4-5 اينالىم جاسايدى. كەشكىلىك جۇمىس اياعىنا قاراي, اۆتوبۋستى جۋىپ, تازالايدى. «جۇمىستىڭ باستى قيىندىعى – جولاۋشىلاردىڭ قاۋىپسىزدىگى. سوعان الاڭدايمىز. ۇنەمى جولدا جۇرگەندىكتەن ءتۇرلى جۇرگىزۋشى كەزىگەدى. سولاردان ابايلايمىز», – ەسبولات قارپىقباەۆ. جاسىراتىنى جوق, قيىندىقتارعا دا تاپ بولدىق. جول اپاتىنا دا تۇستىك. بىراق سونىڭ ءبارى ساباق بولدى. شىڭدالدىق. شۇكىر, جامان بولعان جوقپىز».
قاناعاتى بار جىگىت دەمالىسىندا اۋىلىنا اسىعادى. ەكى كۇندە قارا شاڭىراعىنداعى قارا جۇمىستى ەڭسەرىپ, ءبىر جاعىنان اكە-شەشەسىنە ەركەلەپ قايتادى. ول كىسىلەر دە ءار دەمالىس سايىن جولعا قاراپ, بالالارىن كۇتەدى. قالاعا كوشىرىپ الايىن دەسە, ول كىسىلەردىڭ اۋىلدان اجىراعىسى كەلمەيدى. وسىلايشا, اۋىلدا اق باتاسىن جاۋدىرىپ, تىلەۋىن تىلەپ وتىر.
اتا-اناسىنىڭ اق تىلەۋىمەن جولى اشىلعان ەسبولات ەربولات ۇلىنىڭ ەڭبەكپەن كەشىپ جۇرگەن قوڭىر تىرشىلىگى وسىنداي.
قاراعاندى وبلىسى
