بۇل ۆاگونداردى پەتروپاۆل قالاسىنداعى وتاندىق «زيكستو» زاۋىتى جاساپ شىعاردى. ەلورداعا زاماناۋي ۇلگىدە جاسالعان پلاتسكارت جانە كۋپە ۆاگوندارىنىڭ ءبىرىنشى پارتياسى دا جەتكىزىلدى. بۇل ۆاگوندار «قاراعاندى – جەزقازعان», «اتىراۋ – ماڭعىستاۋ», «اتىراۋ – اقتوبە» باعىتتارى بويىنشا جۇرەتىن پويىزدار قۇرامىندا جولعا شىعادى.
جولاۋشىلار ساپارىنىڭ جايلىلىعىن قامتاماسىز ەتۋ ءۇشىن ۆاگوندار اۋانى باپتاۋ قوندىرعىسى, تازارتۋ سۇزگىلەرى, ءتۇتىن سەزبەگى, بيودارەتحانالارمەن, تامبۋرلارداعى بەينەباقىلاۋ جۇيەسىمەن جابدىقتالعان. ءار كۋپەدە ەلەكتر كوزى مەن USB قوسقىشتارى دا قاراستىرىلىپ وتىر. ءتيىستى نۇسقاۋلىق بويىنشا پايدالانا بىلسەك, ۆاگونداردىڭ قىزمەت ەتۋ مەرزىمى 40 جىلعا دەيىن جارامدى. جايلىلىعى مەن تەحنيكالىق ولشەمدەرى جاعىنان اناۋ-مىناۋ شەتەلدىك باسەكەلەستەرىن شاڭ قاپتىرىپ كەتەتىن وتاندىق ۆاگوندار ءوندىرىسى مۇنىمەن شەكتەلمەك ەمەس.
الداعى قازان ايىنىڭ سوڭىنا تامان «زيكستو» زاۋىتى ۇلتتىق تاسىمالداۋشىعا تاعى دا 50 ۆاگوندى, ال كەلەسى جىلدىڭ باسىندا تاعى 100 جولاۋشى ۆاگونىن پايدالانۋعا بەرۋدى جوسپارلاپ وتىر. سونداي-اق 2030 جىلعا دەيىن «Stadler» كومپانياسىنان 537 جوعارى تەحنولوگيالىق ۆاگون ساتىپ الۋ كوزدەلىپ وتىر. سونىڭ ارقاسىندا سالدىرلاپ, قاڭقاسىن ازەر سۇيرەتىپ جۇرگەن كونەتوز ۆاگونداردىڭ بىرازىمەن قوش ايتىسامىز.
تاسىمال پاركىن جاڭارتۋ بويىنشا بارلىق جوسپارلانعان ءىس-شارانى ەسكەرە وتىرىپ, 2030 جىلى ۆاگونداردىڭ ورتاشا شىققان جىلى 18-دەن 13-كە دەيىن تومەندەيدى دەپ جوسپارلانىپ وتىر. بۇل رەتتە ۆاگونداردىڭ اۋانى باپتاۋ جۇيەسىمەن قامتاماسىز ەتىلۋى 100%-دى قۇرايدى.
قولدا بار مالىمەتتەرگە سۇيەنسەك, كەيىنگى ون جىلدىڭ بەدەرىندە كومپانيا قاۋىپسىزدىك, جايلىلىق جانە ەكولوگيالىق تازالىعى بويىنشا زاماناۋي حالىقارالىق تالاپتارعا جاۋاپ بەرەتىن 1200-دەن استام ۆاگون ساتىپ الىپتى.
