«قازاقستان» تەلەراديوكورپوراتسياسى تۇسىرگەن «مىرجاقىپ. ويان, قازاق!» تەلەحيكاياسىنىڭ نەگىزىندەگى تولىقمەتراجدى كوركەم تۋىندى بۇگىننەن باستاپ كورەرمەنگە جول تارتادى. اقىننىڭ ءرولىن سومداۋعا ەلوردالىق «جاستار» تەاترىنىڭ اكتەرى باقىت قاجىباەۆ تاڭدالعان.
– رولگە كاستينگ ارقىلى تاڭدالدىم. رەجيسسەردىڭ تاڭداۋى ماعان تۇسكەن ەكەن. نەگىزى جاۋاپكەرشىلىگى زور ءرول دەپ ايتار ەدىم. مىرجاقىپ اتامىزدىڭ اتى قازاق ەلىنە ايان. ءوزىنىڭ بوزتورعاي جانى شىرىلداپ, ەلى, جەرى ءۇشىن جانىن قيعان اسىل ازامات. وسى ءرولدى سومدايتىن كەزدە قۋانىشىمنان گورى قورقىنىشىم باسىم بولدى. ءتۇسىرىلىم بارىسىندا قاتتى قينالدىم دەپ ايتا المايمىن. ويتكەنى رەجيسسەردىڭ, ستسەناريدىڭ مىقتىلىعى شىعار دەپ ويلايمىن. بىراق قيىندىقتار دا بولدى. ۋاقىتقا بايلانىستى. اسىرەسە تۇنگى تۇسىرىلىمدەر. ءرولدى سومداعان كەزدە اكتەر رەتىندە اتتەگەن-اي دەگەن ساتتەر دە بولدى. بۇل ءاربىر اكتەردە بولادى دەپ ويلايمىن. ءفيلمدى كورىپ وتىرىپ مىنا جەرىن باسقاشا ويناۋىم كەرەك ەدى دەيتىن ساتتەر بولادى, – دەيدى اكتەر باقىت قاجىباەۆ.
«Qazaqstan» رترك» اق باسقارما توراعاسى ءلاززات تانىسباي تاريحي سەريالدارعا كورەرمەننىڭ سۇرانىسى دا كوپ ەكەنىن ايتادى.
– بۇل ءبىز ءۇشىن تاجىريبە دەۋگە بولادى. سەبەبى فيلم ءتۇسىرۋ كورپوراتسيانىڭ مىندەتىنە جاتپايدى. وتكەن جىلى «مىرجاقىپ. ويان, قازاق!» سەريالىن شىعاردىق. سۇرانىس وتە كوپ بولدى. تۇسىرگەن تاريحي سەريالعا بىردە-ءبىر سىن بولعان جوق. مۇنى ماقتانىشپەن ايتا الامىز. بىرىنشىدەن, ول – رەجيسسەر مۇرات ەسجاننىڭ جۇمىسى. ەكىنشىدەن, ءبىز وسى ۋاقىتقا دەيىن جيناعان تاجىريبەمىزدى, بار كۇشىمىزدى سوعان سالدىق. سوندىقتان دا كەرەمەت تۋىندى شىقتى. حالىقتىڭ سۇرايتىنى, اسىرەسە جاستارعا كەرەك فيلم ەكەنىن تۇسىنەمىز. سوندىقتان سول تۋىندىنى قايتادان مونتاجدادىق, كەرەك جەرلەرىن قايتا ءتۇسىرتىپ, وڭدەپ شىعاردىق. بۇكىل قازاق كورەتىن, سانامىز ءۇشىن, قوعام ءۇشىن پايدالى فيلم بولدى دەپ ويلايمىن, – دەيدى ءلاززات تانىسباي.
