فوتو: تۇركىستان وبلىسى اكىمىنىڭ ءباسپاسوز قىزمەتى
عىلىمي فورۋم كورنەكتى عالىم, قازاقستان رەسپۋبليكاسى ۇلتتىق ينجەنەرلىك اكادەمياسىنىڭ پرەزيدەنتى, تۇركى الەمى ماتەماتيكالىق قوعامىنىڭ پرەزيدەنتى اكادەميك جۇماعۇلوۆ باقىتجان تۇرسىن ۇلىنىڭ توراعالىعىمەن 20-23 قىركۇيەك ارالىعىندا تۇركىستاندا وتەدى.
كونگرەستىڭ نەگىزگى ماقساتى – عالىمداردىڭ حالىقارالىق بايلانىستارى مەن عىلىمي ىنتىماقتاستىعىن كەڭەيتۋ, ماتەماتيكا عىلىمىنىڭ دامۋىنا جانە ماتەماتيكانىڭ, اقپاراتتىق تەحنولوگيالاردىڭ جەتىستىكتەرىن عىلىمي زەرتتەۋلەردە, تەحنيكا مەن ءبىلىم بەرۋدە قولدانۋعا ۇلەس قوسۋ.
تۇركى الەمىنىڭ ماتەماتيكالىق قوعامى (Turkic World Mathematical Society, TWMS) قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگىنىڭ, تۇركىستان وبلىسى اكىمدىگىنىڭ جانە ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ قولداۋىمەن ءوتىپ جاتقان كونگرەسكە الەمنىڭ 20 مەملەكەتىنەن 400-دەن استام ماتەماتيك عالىم قاتىسادى. پلەنارلىق 8 باياندامانى تۇركيا, ازەربايجان, تۇركىمەنستان, وزبەكستان, قىرعىزستان, رەسەي جانە قازاقستاننىڭ الەمگە بەلگىلى عالىمدارى جاسايدى. ماتەماتيكانىڭ 10 باعىتى بويىنشا سەكتسيالاردا جانە ءبىر شاعىن سيمپوزيۋمدا قازىرگى ماتەماتيكا عىلىمىنداعى سوڭعى عىلىمي ناتيجەلەر بويىنشا 405 بايانداما ۇسىنىلادى.
فورۋمدا ورتا جانە جوعارى مەكتەپتەردە اقپاراتتاندىرۋ مەن ماتەماتيكانى وقىتۋدىڭ زاماناۋي ماسەلەلەرى قاراستىرىلادى. پىكىر الماسۋعا جانە ماتەماتيكا عىلىمدارىنىڭ سوڭعى جەتىستىكتەرى تۋرالى اقپارات الۋعا تاماشا مۇمكىندىك بەرەتىن كونگرەستە تۇركى الەمىنىڭ ماتەماتيكتەرى كوتەرگەن وزەكتى ماسەلەلەردى بىرلەسىپ شەشۋ ءۇشىن عىلىمي باعدارلامالار دايىنداۋ كوزدەلىپ وتىر.
عىلىمي فورۋم جۇمىسى بارىسىندا ماتەماتيكا عىلىمدارىنىڭ دامۋىنا ەرەكشە ۇلەس قوسقان ماتەماتيكتەر مەدالدارمەن ماراپاتتالادى جانە TWMS كونگرەسىنىڭ لاۋرەاتتارى جاريالانادى.
