بۇل اتاقتى مايدانگەر جازۋشى ءادي ءشارىپوۆتىڭ سوعىستاعى سوم بەينەسىنىڭ ەكرانداعى كورىنىسى ەدى. قيان-كەسكى شايقاستاردىڭ ورتاسىندا ءجۇرىپ, ادامگەرشىلىك قاسيەتتەرىن سوعىس قاعيدالارىنان جوعارى قويعان, حالقىمىزعا ءتان مەيىرباندىق پەن قامقورلىقتىڭ ۇلگىسى بولعان قازاق كومانديرىنىڭ وبرازىن بىلتىر «1941 جىلدىڭ جازى» فيلمىندە راحاتتانا تاماشالاپ ەدىك. ەندى سول قاھارمان بەينە شىنايى ومىردە الدىمدا وتىر.
تەرىسكەيدەگى الىپ كورشىمىز – رەسەي جۇرتىنا ازامات نىعمانوۆتى الابوتەن تانىستىرۋدىڭ قاجەتتىلىگى شامالى بولعانىمەن, قازاقستان ءۇشىن ول – بولاشاعى زور تالانتتى اكتەر. رەسەيلىك شوۋ-بيزنەس سالاسىندا, ناقتىراق ايتقاندا, تەاتر مەن كينو ونەرىندە مايتالمان اكتەر رەتىندە ابدەن تانىلعان. بۇگىندە ستانيسلاۆسكي اتىنداعى ماسكەۋ ەلەكتر تەاترىنىڭ اكتەرى رەتىندە ەڭبەكتەنىپ ءجۇر. تۇسكەن فيلمدەرى مەن سەريالدارىنىڭ ۇزىن سانى 70-تەن اسادى, باستى رولدە ويناعان كەيىپكەرلەرى مەن كينوفەستيۆالدەردەن العان جۇلدەلەرى دە از ەمەس. رەسەيدىڭ كينويندۋسترياسىن مويىنداتقان قازاق بالاسى قازىر ءوز وتانىنداعى تەاتر مەن كينو سالاسىن دا قولداپ وتىر.
«اسسالاۋماعالەيكۇم!». اۋەلى قوس قولىن كەۋدەسىنە اپارىپ جىلى جىميدى دا, ك ۇلىمسىرەگەن كۇيىندە قول الىستىق. ومبىدا تۋىپ, ورىس اراسىندا ءوستى دەمەسەڭىز ازاماتتىڭ ءتىلى العاش قازاقشا شىققانى بايقالادى. اق جارقىن, دارقان مىنەزدى, جاتىرقاۋشىلىق جوق. بويىندا ادامدى ەرەكشە تارتىپ تۇراتىن قاسيەت بار. بىردەن شەشىلىپ سويلەپ كەتتى.
– ومبىدا قازاق وتباسىندا دۇنيەگە كەلدىم. شاڭىراعىمىز ۇلتتىق داستۇرلەرىمىزگە بەرىك, انا ءتىلىمىز ءۇي ىشىندەگىلەر ءۇشىن قاسيەتتى سانالاتىن. اكتەرلىك ونەرگە كەلۋگە بالا شاعىمنان-اق العىشارتتار مول بولعان ەكەن. ءۇي ۇلكەندەرىنىڭ ايتۋىنشا, ءۇش-ءتورت جاسىمدا تەلەديداردان كونتسەرت بەرىلىپ جاتقاندا سىپىرتقىنى گيتارا ەتىپ, مۋزىكانتتاردى بەينەلەيدى ەكەنمىن, – دەيدى ول ك ۇلىپ. – ۇيدەگىلەردىڭ قوشەمەتىنە ودان ءارى ماسايراپ, ايدارىمنان جەل ەسەتىن.
بۇل اۋىلدا, اجەمنىڭ 90 جىلدىق مەرەيتويىندا بولعان. اكەمنىڭ ايتۋىنشا, ءسابي شاعىمدا اجەم كويلەگىنىڭ ەتەگىنە سالىپ, تەربەتىپ, بەسىك جىرىن ايتىپ وتىراتىن كورىنەدى. ال انام ءاندى سىزىلتىپ سالادى, ولەڭ شىعارادى. اكەم جاس شاعىندا كينومەحانيك بولعان, ونىڭ دا ءبىر شاراپاتى تيگەن بولار. شىعارماشىلىققا دەگەن ىنتام 6-سىنىپتا بايقالىپ, بىردە مەكتەپتەگى شاعىن قويىلىمدا مارك تۆەننىڭ «توم سويەرىندەگى» تومنىڭ ناعاشى اپاسىنىڭ ءرولىن ءساتتى وينادىم. ادەبيەت مۇعالىمى بۇل ويىنىمدى جوعارى باعالاپ, كۇندەلىگىمە بىردەن ءۇش بەستىكتى قويىپ بەردى. ۇستازىمنىڭ اقىلىمەن ودان ءارى تەاتر ۇيىرمەسىنە جازىلىپ, ارادا كوپ ۋاقىت وتپەي الگى قامقورشىم ليتسەيدەگى دراما تەاترىنا بار دەدى. الگى ليتسەيدە دەمالىس كۇندەرى كادىمگىدەي سپەكتاكلدەر قويىلىپ, بيلەت ساتىلاتىن. بىرگە وقىعان قىز-جىگىتتەردىڭ كوبى بۇگىندە رەسەيگە تانىمال ونەر يەلەرىنە اينالدى. ءبىرى ايگىلى ۆاحتانگوۆ تەاترىندا رەجيسسەر, ەندى ءبىرى «ساتيريكون» مەملەكەتتىك تەاترىندا ەڭبەك ەتىپ جاتىر. ءوزىم ويناعان «28 پانفيلوۆشى» ءفيلمىنىڭ رەجيسسەرى دە كەزىندە سوندا ءبىلىم الدى. اكتەرلىك جولىم اسا اۋىر بولدى دەپ ايتا المايمىن. دەگەنمەن ماسكەۋدى «باعىندىرۋ» قيىنعا ءتۇستى.
ومبىدا مەكتەپ بىتىرگەن قازاق بالاسى ماسكەۋگە وقۋعا اتتاندى. ارمانى – جوعارى وقۋ ورىندارىنىڭ بىرىنە ءتۇسىپ, ونەر بىلگىرلەرىنەن ءدارىس الۋ ەدى. رەسەي تەاتر ونەرى ينستيتۋتى مەن بۇكىلرەسەيلىك مەملەكەتتىك كينەماتوگرافيا ينستيتۋتىنداعى سىناقتىڭ العاشقى ءۇش كەزەڭىنەن سۇرىنبەي ءوتتى. الايدا جالپى كونكۋرستان وتە المادى. كەلەسى جىلى ماسكەۋگە قايتا بارىپ, ب.ششۋكين اتىنداعى تەاتر ينستيتۋتىنا قۇجات تاپسىرعانىمەن تاعى دا جولى بولمادى. جاراتقاننىڭ نازارى تۇسكەن بولار, سول ساتتە الدەبىر پەداگوگ وعان كۇزدە ۇلتتىق كۋرسقا قابىلداۋ جۇرگىزىلەدى, سول ۋاقىتتا كەل دەپ اقىلىن ايتادى. ءسويتىپ ول ششۋكين ينستيتۋتىنداعى نيكولاي سليچەنكونىڭ شەبەرحاناسىنا وقۋعا ءتۇسىپ, 2009 جىلى ءساتتى اياقتاپ شىقتى. ينستيتۋتتا جۇرگەندە رەسەيدىڭ حالىق ءارتىسى, بەلگىلى تەاتر رەجيسسەرى كونستانتين رايكيننىڭ نازارى قاراتورى بوزبالاعا اۋىپ, چەحوۆ اتىنداعى ماسكەۋ كوركەم تەاترىندا «پروكلياتى ي ۋبيتى» سپەكتاكلىندە ويناۋ ءۇشىن رەجيسسەر ا.رىجاكوۆقا ۇسىنادى. ونداعى تالعات حاريسوۆتىڭ ءرولى ءۇشىن ازامات كەيىن ولەگ تاباكوۆ سىيلىعىن يەلەندى.
جاس اكتەردىڭ ءتۇر-كەلبەتىنە قارادى ما ەكەن, 2010 جىلدان باستاپ كينو تۇسىرۋشىلەر ونى سوعىس تاقىرىبىنداعى كارتينالارعا جيىرەك تارتا باستاعانىن بايقايمىز. ونىڭ ىشىندە «28 پانفيلوۆشى» مەن «1941 جىلدىڭ جازى» فيلمدەرىندە ول قازاقتىڭ جاۋىنگەرلىك رۋحىن جوعارى دەڭگەيدە تانىتا العانىنا ءبارىمىز كۋا بولدىق.
«كينو سالاسىندا «تيپاجنوست» دەگەن ۇعىم بار. ءسىزدىڭ سىرتقى كەسكىن-كەلبەتىڭىز بەلگىلى ءبىر اقپاراتتى جەتكىزەدى. كينو تۇسىرۋشىلەر نەگىزى جالقاۋ حالىق. ولار وزدەرىنىڭ كوزىنە تۇسكەندى عانا العاندى ۇناتادى. سەنىڭ بويىندا ابدەن ءپىسىپ جەتىلىپ, قالىپتاسىپ تۇرعان, تابيعات بەرگەن كەسكىنىڭدى پايدالانادى. ياعني كينو تەاترداعىداي ەمەس, اكتەرلىك ءمينيمالدى ونەر جەتكىلىكتى. ول – ومىرگە جاقىن وبراز. مەنى كوپ رەجيسسەرلەر سوعىس تاقىرىبىنداعى فيلمدەرگە ءجيى شاقىرۋى, وندا ۇنەمى جاعىمدى كەيىپكەرلەردى وينايتىنىم مەنىڭ تيپاجىمدى كورەرمەن سول اۋاننان كورىپ ۇيرەنىپ قالعانىندا بولىپ تۇر. ايتپەگەندە, جاعىمسىز كەيىپكەرلەردى دە سومداۋعا الەۋەتىم جەتەدى دەپ ويلايمىن. تەاترداعى وبراز سومداۋ مۇلدە باسقا الەم. ول جەردە سەن وبراز تۋدىرۋشىسىڭ. بىلمەيتىن سوقپاققا تۇسسەڭ, كىبىرتىكتەپ, تايساقتايتىنىڭ بەلگىلى. كينورەجيسسەرلەر دە سول سياقتى, تاۋەكەلگە بارعىسى جوق. «1941 جىلدىڭ جازى» ءفيلمى مەن ءۇشىن اكتەرلىك شەبەرلىگىمدەگى ۇلكەن مەكتەپ بولدى. ءادي ءشارىپوۆتىڭ رولىنە بەكىتۋگە ىقپال ەتكەن مايدانگەر جازۋشىنىڭ جەسىرى كلارا جاعىپارقىزى ەدى. ءادي ءشارىپوۆ تىرىسىندە اتى اڭىزعا اينالعان اتاقتى تۇلعا عوي. العاش فيلمگە كاستينگ جاريالانىپ, ىرىكتەۋ وتكەندە رەجيسسەرلىك توپ مەنى ەكىنشى باستى ءرولدى وينايدى دەپ شەشىم قابىلداعان ەكەن. بىراق كلارا اپاي مەنىڭ ويىنىمدى كوردى دە: «مىنا جىگىتتىڭ كەلبەتى اديىمە كەلىڭكىرەمەسە دە, ىشكى جان دۇنيەسى جولداسىما ۇقساس. وسى ازامات ويناسىنشى» دەگەن تىلەگىن جەتكىزدى. وسىلايشا, قازاقتىڭ باتىر كومانديرىن سومدادىم. كەيىپكەرىمدى جامان ويناماعان ءتارىزدىمىن. ءارى ءفيلمنىڭ نەگىزگى تاقىرىبىنا سوعىس ەمەس, الاساپىران ۋاقىتتا ادامداردىڭ مەيىرباندىعى, حالىقتار اراسىنداعى دوستىق ارقاۋ بولعانى دا قۋانتتى. سەبەبى مەنىڭ بالالىق شاقتان بەرگى ارمان-ويىم – جەر بەتىندەگى ز ۇلىمدىقتىڭ جويىلىپ, ادامدار اراسىندا ماڭگىلىك دوستىقتىڭ ورناۋى» دەپ اڭگىمەسىن جالعاستىرا ءتۇستى اكتەر.
اكتەردىڭ ءوزى ويناعان كينەماتوگرافيالىق كوللەكتسياسى وتە باي. ولاردىڭ نەگىزگىلەرىن اتاپ وتسەك:
«ودناجدى ۆ پروۆينتسي» (2008 جىل); «تيحايا زاستاۆا» (2011); «سلۋجۋ سوۆەتسكومۋ سويۋزۋ» (2011); «كونۆوي» (2012); «موتىلكي» (2013), «يسترەبيتەلي» (2013), «وبنيمايا نەبو» (2014), «28 پانفيلوۆشى» (2016), «وستروۆ» (2016), «پياتنيتسا» (2016), «جيۆوي» (2017), «گراجدانسكي براك» (2017), «زولوتايا وردا» (2018), «توپور» (2018), «چيورنىە بۋشلاتى» (2018), «اداپتاتسيا-2» (2019), «بولشوي ارتيست» (2019), «چيورنايا لەستنيتسا» (2019), «سارى مىسىق» (2020), «پەرەۆال دياتلوۆا» (2020), «پودولسكيە كۋرسانتى» (2020), «رۋممەيت» (2020), «ستاجەرى» (2021), «1941 جىلدىڭ جازى» (2022).
«تيحايا زاستاۆا» كارتيناسىنداعى شەكاراشى ازاماتتىڭ ءرولىن سومداعان اكتەر ءوزى ءۇشىن بۇل شىعارماشىلىق ءوسۋدىڭ باسى بولعانىن جەتكىزدى. كينوداعى العاشقى ناعىز اكتەرلىك ءرولىم دە سول ەدى دەيدى. كەيىن «كونۆوي» فيلمىندەگى ارتەم تۋگاەۆتى بەينەلەگەنى ءۇشىن ايتۋلى كينوفەستيۆالدەردىڭ, اتاپ ايتقاندا الماتىداعى «ەۆرازيادا» جانە سوچيدەگى كينوتاۆردا «ەڭ ۇزدىك ەر ادام ءرولى» نوميناتسيالارىندا جەڭىمپاز اتاندى.
قازاقستان كينويندۋسترياسىندا ول العاش رەت ناريمان تورەباەۆتىڭ «شىتىرمان وقيعا» تۋىندىسىنا ءتۇستى. ودان سوڭ ءادىلحان ەرجانوۆتىڭ «سارى مىسىق», «شتۋرم», «مۇيىزتۇمسىق» جانە بەكبولات شەكەروۆتىڭ جوعارىدا اتالعان «1941 جىلدىڭ جازىندا» وينادى. ال جاڭا ماۋسىمدا وتاندىق نتك ارناسىنان كورسەتىلۋى جوسپارلانىپ وتىرعان «موشەننيكي» سەريالىندا اعا تەرگەۋشىنىڭ رولىندە كورە الامىز. بۇدان بولەك, ازامات بيىل رەسەيلىك «ساشا پروتيۆ» سەريالىنا ءتۇسىپ تە ۇلگەردى. سەريالدا ۇلتتار اراسىنداعى قارىم-قاتىناس كورىنىس تابادى. ول ءوزىن دۋبلياجداۋ ونەرىندە دە سىناپ كورىپ, «گالاكتيكا ساقشىلارى. 3-ءبولىم» فيلمىندە جاۋىز ءارى بىتىسپەس قارسىلاستى دىبىستادى. امەريكالىق «مارۆەلدىڭ» كينوتۋىندىسىنداعى باس كەيىپكەردى دۋبلياجداۋدىڭ بۇيىرۋى اكتەردىڭ ءوز ورتاسىنداعى جوعارى بەدەلىن اڭعارتسا كەرەك.
ازامات نىعمانوۆتىڭ سوڭعى ەكى جىلدا قازاق تەاترلارىمەن بايلانىس ورناتىپ, رەجيسسەرلىك سالادا ءوز باعىن سىناي باستاعانى دا بايقالادى. 2021 جىلى سەركە قوجامقۇلوۆ اتىنداعى جەزقازعان قازاق مۋزىكالىق دراما تەاترى ونىڭ تىرناقالدى رەجيسسەرلىك تۋىندىسى – «جۇت» دراماسىن ساحنالاپ, بۇل قويىلىم قازاق تەاترلارى اراسىندا جاڭاشىلدىعىمەن كوزگە تۇسكەنى ءمالىم. بۇل جايىندا ازامات بىلاي دەپ اڭگىمەلەيدى:
«تەاتر باسشىسى دوسحان ساكەن ۇلى اكتەرلەرگە شەبەرلىك ساعاتىن وتكىزۋدى ۇسىنىپ, ويدا جوقتا «جۇتتىڭ» ەپيزودتارىمەن تانىستىم. ونىڭ ءبىر ەپيزودىن جەرگىلىكتى تەاتردى قۇرعان ارداگەر اكتەرلەرگە كورسەتىپ ەدىك, بىردەن تولىق سپەكتاكل كەرەك دەدى. مەن ءۇشىن بۇل ءارى جاعىمدى, ءارى كۇتپەگەن ۇسىنىس بولدى. ماسكەۋدە 2011 جىلدان جاسوسپىرىمدەر تەاترىنا ساباق بەرىپ جۇرسەم دە كاسىبي تەاتردا رەجيسسەرلىك ەتۋگە باسىندا جۇرەكسىندىم. تاۋەكەل دەپ كىرىسىپ, بارلىق اكتەرلەر قۇرامىمەن جۇمىس ىستەي باستادىم. ءسويتىپ پرەمەرانى ساحناعا الىپ شىقتىق. قويىلىم كورەرمەندەر ءۇشىن اسەرلى شىققانى قۋانتتى. اقتوبەدە, استانادا جانە جەزقازعاندا وتكەن تەاترلار فەستيۆالدەرىندە جۇلدە الدى. بۇل مەن ءۇشىن ومىرىمدەگى تىڭ سوقپاق بولدى», دەيدى جاس رەجيسسەر.
ال بيىل ازاماتتىڭ رەجيسسەرلىك ەتۋىمەن قازاقستاندا ەكىنشى تەاتر تۋىندىسى جارق ەتتى. ول – پاۆلوداردىڭ جۇسىپبەك ايماۋىتوۆ اتىنداعى ونەر ورداسىندا تۇساۋى كەسىلگەن شاكارىم قۇدايبەردى ۇلىنىڭ «ۇجدان» ءافساناسى. شاعىن عانا اڭگىمەدەن تۋعان بۇل قويىلىمنىڭ تۇپكى يدەياسىنا ازامات باستاپقىدان-اق قىزىقتىم دەيدى. ونەر ورداسىنىڭ باسشىلىعىنان ۇسىنىس تۇسكەندە ەڭ اۋەلى ماتەريالدى تىڭعىلىقتى قاراپ شىعىپ, اڭگىمەنىڭ ساحنالىق نۇسقاسىن جاساعان نۇركەن تۇرلىبەكپەن, اكتەرلەرمەن ۇزاق اڭگىمەلەسىپتى. نەگىزى «ۇجداننىڭ» ماعىناسى وتە تەرەڭ, اناۋ-مىناۋ ادام تولىق تۇسىنە قويمايتىن, جانرى كۇردەلى قويىلىم. ء«اۋ باستان-اق مۇنى شىعارماشىلىق ۇجىم اراسىندا تالقىلاپ, اڭگىمە ءوربىتۋ كەرەكتىگىن ءتۇسىندىم. تەاتر باسشىلىعى قويىلىمدى ساحناعا الىپ شىعۋ ءۇشىن بارلىق كارت-بلانشتى قولىما بەرگەنىنە ريزامىن. تەاترداعى اكتەرلەر اراسىندا «ەتيۋد» دەگەن ۇعىم قالىپتاسقان, ول تەاترلىق شاعىن سۋرەتتەۋ دەگەندى بىلدىرەدى. اڭگىمە جەلىسىمەن ءتۇرلى تاقىرىپتا پىكىر الماستىق. «ۇجدان دەگەن نە؟», «ەگەر ادامنان ۇجداندى ايىرىپ تاستاسا نە بولادى؟», «قوعامنىڭ ازعىندانۋ بەلگىلەرى قانداي؟», «قوعامعا رەتتەۋشى كۇش مىندەتتى تۇردە قاجەت پە؟», «ادامدى ىشكى ءتارتىبى ۇستاپ تۇرا ما, الدە مىندەتتى تۇردە سىرتقى كۇش (مەملەكەت زاڭدارى مەن قۇقىقتارى) كەرەك پە؟». ءبىز وسى فيلوسوفيالىق سۇراقتار اۋماعىندا ەتيۋدتەرىمىزدى ازىرلەدىك. مىسالى زاڭ نەمەسە ءتارتىپ قاعيدالارى وسالدىق جاساسا, كەيبىر پەندە ءۇشىن ول العا جىلجۋعا مۇمكىندىك ەكەن. قويىلىم بارىسىندا ءۇش جاس جىگىتتىڭ ورتاعا شىعىپ, دەگراداتسياعا ۇشىراعان قوعام مۇشەلەرىن سۇراقپەن ارانداتاتىن ءساتى بار عوي. بىردە دايىندىق بارىسىندا قىزىق وقيعا بولدى. ءۇزىلىس ۋاقىتىندا ءۇش جاس اكتەر ماعان جاقىنداپ: «سىزبەن اڭگىمە بار, بۇل جاقتا نە ىستەپ ءجۇرسىز؟», دەپ سۇراقتىڭ استىنا الدى. تۇرلەرىنە قاراسام, بىردەڭەنى بۇلدىرۋگە بەكىنىپ تۇرعانداي. باسىندا كادىمگىدەي تىكسىنىپ قالدىم. سويتسەم, ول جىگىتتەردىڭ اكتەرلىك ويىنى ەكەن. ارتىنان الگى ارانداتۋشىلىق ويىندى كادىمگىدەي ەتيۋدتىڭ ءبىر ەلەمەنتىنە اينالدىرىپ, كورەرمەنگە باعىتتاپ جىبەرۋدىڭ ورايى كەلدى. تاعى بىردە كورەرمەن-قوعامنىڭ اشۋ-ىزاسىن جەتكىزەتىن ەتيۋد ىزدەدىك. اكتەر ارقىلى قوعامنىڭ جانايقايىن, ياعني مەسسەدجىن ءبىلدىرۋ كەرەك بولدى. قوعام اراسىنداعى ىرىتكى سالۋ, ارانداتۋشىلىقتىڭ فاكتورى كوپ. بىلتىر قازاقستانداعى «قاڭتار وقيعاسىندا» كوپپەن بىرگە دۇكەندەردەگى ۇيالى تەلەفونداردى توناپ جۇرگەن ەرلى-زايىپتىلاردىڭ بەينەجازباسىن كورگەنمىن. ولار ءۇشىن ۇجدان ماسەلەسى شەت قالىپ قويعانى وكىنىشتى. مۇنداي ماسەلە رەسەيدە دە بار. ۇجدان بۇل ادامدارعا قالىپتى ومىردە «كەدەرگى كەلتىرىپ» كەلسە, قاڭتار وقيعاسى بويدا جاتقان جاعىمسىز ەنەرگيانى شىعارۋعا جول اشتى. نەگىزى ۇجدان – وتە كۇردەلى ادامي قاسيەت. قازاق حالقىندا ەجەلدە ءوز الدىنا دالا زاڭى بولدى. بالا كەزىمدە قازاقستانمەن شەكارادا تۋىستارىم تۇراتىن قازاق اۋىلىنا ءجيى باراتىنمىن. نەبارى ءۇش-اق كوشەدەن تۇرادى. اۋىلعا اپاراتىن دەنى دۇرىس جول جوق, تۇرعىندارى سۋدى قۇدىقتان ىشەتىن. سوندا بىرەۋ باسبۇزارلىق جاساسا, ونىڭ ماسەلەسىن ۇلكەندەر ءوزارا جينالىپ شەشەتىن. بۇل – جەرگىلىكتى حالىقتىڭ ىشكى قالىپتاسقان ءمورالى-تۇعىن. ياعني ادامدار قوعامدىق ۇجدانعا باعىنىپ, ودان اتتاپ كەتپەدى. وسىنداي ومىرلىك وقيعالار «ۇجداندى» ساحناعا وزگەشە بەينەدە الىپ شىعۋعا سەبەپكەر بولدى», دەپ ءوز ويىمەن ءبولىستى.
«ۇجدان» دىتتەگەن ماقساتىنا جەتىپ, بيىل وتاندىق رەجيسسەرلەردىڭ اۋزىندا جىلدىڭ ۇزدىك پرەمەراسى اتالىپ وتىر. كۇزدە ەكى بىردەي حالىقارالىق تەاتر فەستيۆالىنە شاقىرتۋ الدى. سونىڭ ءبىرى – رەسەي استاناسىندا وتەتىن «پودموسكوۆنىە ۆەچەرا» VII حالىقارالىق تەاترلار فەستيۆالى. مۇنداي مارتەبەگە يە بولۋ قويىلىمدى دايىنداۋ بارىسىنداعى توگىلگەن تەردىڭ تەككە كەتپەگەنىن دالەلدەسە كەرەك.
ازاماتپەن ۇزاق اڭگىمەلەسۋدىڭ ورايى كەلمەدى. ءسوز سوڭىندا اكتەر سوعىس تاقىرىبىنداعى كينولارعا ءجيى تۇسكەنىمەن, كورەرمەندەرگە سوعىستى دارىپتەۋ ويىندا جوق ەكەنىن تاعى ءبىر مارتە نىقتاپ قويدى. ء«بىز بەيبىت زاماندا ءومىر ءسۇرىپ جاتىرمىز. كينودان كورەتىن سوعىس ءومىرى ول تەك كينودا عانا. گراناتا لاقتىرىپ, جاۋدى دەمدە قىرىپ سالىپ, ەكراننىڭ بەرگى جاعىندا وتىرعاندارعا كەرەمەت قاھارمان بولىپ كورىنۋىڭ مۇمكىن. الايدا ول كورىنىس شىنايى ءومىر ءۇشىن جالعان. ادامداردىڭ بويىندا سوعىس جاقسى دەگەن سەزىم قالىپتاسپاۋى كەرەك. مەن استافەۆتىڭ «پروكلياتى ي ۋبيتى» پەساسىندا وينادىم. سوندا جازۋشى سوعىستىڭ ادامزاتقا اكەلگەن سۇمدىعىن قالاي كورىپ, قابىلداعانىن جان-دۇنيەممەن سەزىندىم. سوعىس – قورقىنىش, اينالاعا ۇرەي سەبەدى. ءبىزدى بالا كەزىمىزدە «ۋرا, ءبىز نەمىستەردى جەڭدىك, نەمىستەر جامان, ءبىز جاقسىمىز», دەگەن ۇعىممەن تاربيەلەدى. وسە كەلە ءمان-جايدى تۇسىنە باستادىق. سوندىقتان ءوز باسىم جەر بەتىندە بەيبىتشىلىكتىڭ ماڭگى تامىر جايعانىن قالايمىن», دەپ اڭگىمەسىن تۇيىندەدى ول.
ءبىزدىڭ دەرەك:
- ازامات نىعمانوۆ 1987 جىلى 15 قازاندا رەسەيدىڭ ومبى قالاسىندا دۇنيەگە كەلگەن.
- ب.ششۋكين اتىنداعى تەاتر ينستيتۋتىن ءتامامدادى.
- جالپى سانى 70-تەن استام فيلم مەن سەريالدارعا ءتۇستى.
- «كونۆوي» فيلمىندەگى ءرولى ءۇشىن 2012 جىلى الماتىدا وتكەن حالىقارالىق«ەۆرازيا» كينوفەستيۆالىندە جانە رەسەيلىك «كينوتاۆردا» «ەڭ ۇزدىك ەر ادام ءرولى» نوميناتسيالارىنا يە بولدى
- قازاقستاندىق رەجيسسەرلەردىڭ 5 كينوتۋىندىسىندا جانە بىرنەشە سەريالدارىندا باستى رولدەردە وينادى.
- ونىڭ رەجيسسەرلىك ەتۋىمەن ەلىمىزدەگى قازاق تەاترلارىندا «جۇت» جانە «ۇجدان» قويىلىمدارى ساحنالاندى.
پاۆلودار
