بايقاۋعا قاتىسۋعا 48 ادامنان ءوتىنىش ءتۇسىپتى. ونىڭ ىشىندە بالالارعا ارنالعان ولەڭدەر نوميناتسياسى بويىنشا 35 اقىن, بالالارعا ارنالعان اڭگىمەلەر اتالىمىندا 13 جازۋشى ءوز شىعارمالارىن جولدادى. شىعارمالاردىڭ اۆتورى كورسەتىلمەي, سانمەن بەلگىلەنىپ, قازىلار القاسىنىڭ تالقىسىنا ۇسىنىلدى.
قازىلار قۇرامىندا ە.بوكەتوۆ اتىنداعى قاراعاندى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى جانسايا جارىلعاپوۆ, قازاقستان جازۋشىلار وداعىنىڭ مۇشەسى, جۋرناليست سۇيىندىك جانىسباي, اقىن, «شىراق» تىلدەردى وقىتۋ ورتالىعىنىڭ ديرەكتورى سايات تۇياقباەۆ, ە.بوكەتوۆ اتىنداعى قاراعاندى ۋنيۆەرسيتەتىنىڭ وقىتۋشىسى, فيلولوگيا عىلىمدارىنىڭ كانديداتى, بالالار ادەبيەتىن زەرتتەۋشى جانار رۇستەموۆا جانە «Ortalyq Qazaqstan» گازەتى ينتەرنەت-رەداكتسياسىنىڭ رەداكتورى, اقىن ءىلياس مۇقاەۆ بار.
القا شەشىمىمەن ەكى اتالىم بويىنشا بارلىعى 18 جۇلدەلى ورىن انىقتالدى. 3-5 جاس ارالىعىنداعى بالالارعا ارنالعان ولەڭدەر نوميناتسياسىندا ءى ورىندى قۋانىش امانقۇلوۆ ەنشىلەدى. ءىى ورىن رۋزا الداشەۆا مەن سۇلتان داۋلەتحانعا بۇيىرسا, ءىىى ورىن وحان زاكەريا, نۇرعالي قارابەكوۆ, ءاليا بەكپەنبەتوۆا سىندى قالامگەرلەردىڭ قانجىعاسىنا بايلاندى. بايقاۋدىڭ ىنتالاندىرۋ سىيلىقتارىمەن ءمولدىر بولەكوۆا, ەلميرا ورىنباەۆا, ايان كيزكين ماراپاتتالدى.
6-10 جاس ارالىعىنداعى بالالارعا ارنالعان اڭگىمەلەر اتالىمىندا ءى ورىن داۋرەنبەك بۇلانباەۆقا, ءىى ورىن جۇپار جاقان مەن ءاليحان قۇلجاعا, ءىىى ورىن كامشات تاناشەۆا, انەل ماحمەت, اقبوتا شاربەكوۆاعا بۇيىردى. ىنتالاندىرۋ سىيلىعىن اينۇر قۋانباەۆا, ءامينا زەكەن, زامزاگۇل ماۋينا ەنشىلەدى.
– وبلىستىق تىلدەردى دامىتۋ باسقارماسىنىڭ, حالىقارالىق «قازاق ءتىلى» قوعامىنىڭ قاراعاندى وبلىسى بويىنشا فيليالىنىڭ قولداۋىمەن بالالار ادەبيەتىنە قالام سىلتەپ جۇرگەن قالامگەرلەر اراسىندا ۇيىمداستىرىلعان ءىس-شارا بۇلدىرشىندەرگە ارنالعان, ادام بويىنداعى ىزگى قاسيەتتەر ءتارىزدى تاربيەلىك ءمانى بار تاقىرىپتارعا جازىلعان شىعارمالاردى ناسيحاتتاۋدى ماقسات ەتتى, – دەيدى ءىس-شارانى ۇيىمداستىرۋشىلار.
جۇلدەگەرلەردى ماراپاتتاۋ سالتاناتىندا كورەرمەندەر نازارىنا جۇلدەلى ورىنعا يە بولعان اۆتورلاردىڭ ولەڭدەرى وقىلىپ, كونتسەرتتىك باعدارلاما ۇسىنىلدى.
قاراعاندى وبلىسى
