الدىمەن بايقاۋ قاتىسۋشىلارى كومپوزيتور, كۇيشى نۇرعيسا تىلەنديەۆتىڭ رۋحىنا تاعزىم ەتىپ, الماتىداعى ەسكەرتكىشىنە گۇل قويۋ راسىمىنە قاتىستى. ۇيىمداستىرۋشىلار قاتىسۋشىلاردى ونەر يەسىنىڭ مۇراجايىنا دا اپارۋدى بايقاۋ باعدارلاماسىندا قاراستىرعان ەكەن. وسى ورايدا جامبىل اتىنداعى قازاق مەملەكەتتىك فيلارمونياسىنىڭ ديرەكتورى اقان جىلقىشىباي ۇلىمەن تىلدەسۋدىڭ ءساتى ءتۇستى.
«22 قىركۇيەك كۇنى بايقاۋ جەڭىمپازدارى گالا-كونتسەرتتە ونەرىن كورسەتۋى كەرەك. حالىق كىل مىقتىعا جۇلدە بەرگەنىمىزگە كوز جەتكىزىپ, جەڭىمپازداردىڭ ونەرىن تاماشالاۋ ءۇشىن ارنايى كەش وتكىزگەلى وتىرمىز. ەگەر دە جەڭىمپازدار كونتسەرت رەپيتيتسياسىنا ۇلگەرەتىن بولسا, جاستاردى ن.تىلەنديەۆتىڭ جاتقان جەرىنە دە اپارىپ قايتۋدى جوسپارلاپ-جوبالاپ, توندى ءپىشىپ قويدىق. ەگەر جاعداي سوعان لايىق بولسا, توندى كيۋگە دايىنبىز. ول جاقتاعى ۇجىم دا ءبىزدى كۇتىپ الۋعا دايىن وتىر. قازاقستاننىڭ ءوڭىر-وڭىرىنەن كەلگەن ونەر يەلەرىن الماتىدا قىدىرتىپ, كورىكتى جەرلەرىنە دە اپارساق دەگەن نيەتىمىز بار. وعان كەلىسىپ قويعان ارنايى كولىگىمىز دە دايىن تۇر», دەيدى بايقاۋدى ۇيىمداستىرۋ كوميتەتىنىڭ توراعاسى اقان جىلقىشىباي ۇلى.
بايقاۋ ماقساتى – ەلىمىزدەگى تالانتتى ديريجەرلەردىڭ باسىن قوسىپ, جاس دارىنداردىڭ ءبىر-ءبىرىنىڭ ونەرىمەن جاقىنىراق تانىسۋىنا ءارى تاجىريبە الماسۋىنا مۇمكىندىك سىيلاۋ. سونداي-اق ۇيىمداستىرۋ كوميتەتى جاس تالانتتار اراسىنان جاڭا ەسىمدەردى انىقتاپ قويماي, قازاق ديريجەرلىك ونەرىن دامىتىپ, ن.تىلەنديەۆتىڭ شىعارماشىلىق باي مۇراسىن حالىققا ناسيحاتتاۋدى دا باستى نازارعا الىپ وتىر.
اتالعان بايقاۋ قازاق مۋزىكا ونەرىندەگى ەسىمى قايتالانباس تۇلعا – ن.تىلەنديەۆتىڭ قۇرمەتىنە وراي 2004 جىلدان بەرى 2 جىلدا 1 رەت ۇيىمداستىرىلىپ كەلەدى. الايدا ءارتۇرلى سەبەپتەرمەن ءۇزىلىپ قالعان اتالعان شىعارماشىلىق بايقاۋ بيىل قايتادان ءوز جالعاسىن تاۋىپ وتىر.
كونكۋرس 20-22 قىركۇيەك ارالىعىندا وتكىزىلىپ, ءۇش كۇنگە سوزىلادى. فيلارمونيا باسشىلىعى بايقاۋدى تاماشالاۋعا نيەت بىلدىرگەن جاندارعا ءاردايىم رۋحاني وردا ەسىگىنىڭ حالىققا اشىق ەكەنىن حابارلادى. كونكۋرس كۇن سايىن ساعات 10.00 مەن 19.00 ارالىعىندا وتەدى. ءار قاتىسۋشىنىڭ ونەرىنە كەم دەگەندە, 15-20 مينۋت ۋاقىت بەرىلگەن. جاس تالانتتاردىڭ ونەرىن باعالاپ, ەستەتيكالىق كەشتىڭ كۋاسى بولعىڭىز كەلسە, 22 قىركۇيەك كۇنى ساعات 19.00-دە ءىس-شارانىڭ جابىلۋ سالتاناتىنا وراي ۇيىمداستىرىلعان قورىتىندى گالا-كونتسەرتكە شاقىرامىز!
بايقاۋعا قازاقستاننىڭ تۇكپىر-تۇكپىرىنەن 18 بەن 35 جاس ارالىعىنداعى ديريجەرلەر مەن جوعارى وقۋ ورىندارىنىڭ تالانتتى ستۋدەنتتەرى تاڭدالىپ الىنىپ, 19 ۇمىتكەر سايىسقا جولداما العان. قازاق ۇلتتىق كونسەرۆاتورياسىنىڭ پروفەسسورى, «وتىرار سازى» وركەسترىنىڭ ديريجەرى جالعاسبەك بەگەندىكوۆتىڭ ايتۋىنشا, بايقاۋعا باق سىناۋشىلار بۇگىنگە دەيىن مۇقان تولەباەۆ, بوزداق رزاحانوۆ, رىسباي عابديەۆ اتىنداعى ءتۇرلى رەسپۋبليكالىق بايقاۋلاردىڭ جەڭىمپازى بولىپ ۇلگەرگەن. ولاردىڭ اراسىندا تالانتتى جاس ديريجەر ابىلقايىر بەيسەكوۆ پەن مەدەت ەسبەرگەنوۆ تە بار. ءبىر-بىرىنەن وتكەن مىقتىلاردىڭ اراسىنان ءدۇلدۇلدى انىقتاۋ قازىلار ءۇشىن دە قيىنعا سوعاتىن سىڭايلى.
قاتىسۋشىلار جامبىل اتىنداعى قازاق مەملەكەتتىك فيلارمونياسىنىڭ نۇرعيسا تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ سۇيەمەلدەۋىمەن مۋزىكالىق شىعارمالاردى ورىندايتىن بولادى. بايقاۋ ەكى كەزەڭنەن تۇرادى دەيدى ءادىل قازىلار.
– كەز كەلگەن كونكۋرس ەكى كەزەڭنەن تۇرادى. ءبىرىنشى كەزەڭدە ۇمىتكەر ەكى شىعارما ورىندايدى. ءبىرى – قازاقستان كومپوزيتورلارىنىڭ (تەك ن.تىلەنديەۆ ەمەس, س.مۇحامەدجانوۆ, م.تولەباەۆ, ب.جۇمانيازوۆ, ت.ب.) كەز كەلگەن شىعارماسى بولسا, ەكىنشىسى – حالىق كۇيلەرىنەن بولۋى كەرەك. تاعى ءبىر كوڭىل اۋدارارلىق دۇنيە – اسپاپتا سۇيەمەلدەۋ. وركەستردى دومبىرامەن نە بولماسا قوبىزبەن سۇيەمەلدەۋ ديريجەردىڭ شەبەرلىگىن كورسەتەدى. وركەستردى باعىندىرا وتىرا, ءسوليستىڭ يكەمىنە قاراي بەيىمدەلۋ – وتە ماڭىزدى تالاپ. ەكىنشى كەزەڭدە ن.تىلەنديەۆتىڭ ءتول شىعارمالارى ورىندالادى. سونىمەن قاتار ءان سۇيەمەلدەۋ دە – نەگىزگى تالاپتىڭ ءبىرى. سوليستەردى قاتىسۋشىلار وزدەرى تاڭدامايدى. فيلارمونيانىڭ ارنايى سوليستەرى, ەلگە تانىلىپ كەلە جاتقان جاس انشىلەر كەلىپ, سۇيەمەلدەيتىن بولادى, – دەيدى جالعاسبەك بەگەندىكوۆ.
قازىلار القاسىنىڭ مۇشەسى ايتقالي جايىموۆتىڭ ايتۋىنشا, اتالعان كونكۋرستان باس جۇلدە العان ديريجەر كەلەر جىلى وتەتىن بايقاۋعا قاتىسا المايدى, بىراق باسقا بايقاۋلارعا قاتىسۋىنا بولادى. مۇنداعى ماقسات باسقا دا جاستاردىڭ ونەرىن باعالاپ, مۇمكىندىك بەرۋ ەكەنىن ايتتى.
مادەنيەت جانە اقپارات مينيسترلىگىنىڭ قولداۋىمەن تالانتتاردى ىنتالاندىرۋ ماقساتىندا بيىلعى بايقاۋدىڭ جۇلدە قورى 5 ميلليون تەڭگەگە جەتىپ وتىر. باس جۇلدە – 1,5 ملن تەڭگە, I ورىن – 1 ملن تەڭگە, II ورىن – 700 مىڭ تەڭگە, III ورىن – 500 مىڭ تەڭگە, ىنتالاندىرۋ سىيلىعى (ەكەۋ) – 250 مىڭ تەڭگە. بايقاۋعا «نۇرعيسا تىلەنديەۆتىڭ شىعارمالارىن ۇزدىك ورىنداعانى ءۇشىن» اتتى ارنايى جۇلدە قوسىلىپ وتىرعانىن دا ايتا كەتكەنىمىز ءجون.
شارا قورىتىندىسىن قازىلار القاسى 22 قىركۇيەك كۇنى جاريالايدى. قازىلار مۇشەلىگىندە ن.تىلەنديەۆتىڭ كوزىن كورىپ, تاربيەسىن العان شاكىرتتەرى مەن بەلگىلى ديريجەرلەر بار. اتاپ ايتقاندا, ونەرپازدار «وتىرار سازى» وركەسترىنىڭ باس ديريجەرى, قازىلار القاسىنىڭ توراعاسى ءدىنزۋھرا نۇرعيساقىزى, ە.راحماديەۆ اتىنداعى مەملەكەتتىك اكادەميالىق فيلارمونياسى قازاق حالىق اسپاپتار وركەسترىنىڭ كوركەمدىك جەتەكشىسى جانە باس ديريجەرى ايتقالي جايىموۆ, ە.راحماديەۆ اتىنداعى سيمفونيالىق وركەستىرىنىڭ كوركەمدىك جەتەكشىسى, باس ديريجەرى پەتر گريبانوۆ, م.تولەباەۆ اتىنداعى حالىق اسپاپتار وركەسترىنىڭ ديريجەرى, كوركەمدىك جەتەكشىسى ءالي الپىسباەۆ, «وتىرار سازى» وركەسترىنىڭ ديريجەرى جالعاسبەك بەگەندىكوۆ سىندى كاسىبي مامانداردىڭ سىنىنان وتپەك.
ەستەرىڭىزگە سالا كەتەيىك, 2025 جىلى نۇرعيسا تىلەنديەۆتىڭ تۋعانىنا ءجۇز جىل تولۋىنا وراي حالىقارالىق جانە رەسپۋبليكالىق دەڭگەيدە اتالعان بايقاۋدى جوعارى دەڭگەيدە, كەڭىنەن ۇيىمداستىرۋ قازىردەن باستاپ جوسپارعا الىنعان. الداعى ۋاقىتتا بايقاۋدىڭ نوميناتسيالارى «اسپاپتا ويناۋ», «ەسترادالىق ۆوكال» سىندى باعىتتارمەن تولىعۋى مۇمكىن.
ايسۇلۋ سەزحان,
ء تىلشى
