بىراق ەگەمەن ەل اتانعالى بەرى 30 جىلدا ەركىن كۇرەستەن الەمدىك دەڭگەيدە العاش رەت التىن بۇيىرعان ساتتە اتويلاپ كوتەرەتىن كوك بايراعىمىزدى تاپپاي تىپىرشىپ قالدىق. ءدۇبىرلى دودا داستۇرىنە ساي جەڭىمپاز تۋعان ەلىنىڭ تۋىن توبەسىنە كوتەرىپ, بوزكىلەمدى ءبىر اينالىپ شىعۋى كەرەك ەدى. سپورتشىلار بۇل ءداستۇردى ءوزارا «قۇرمەت شەڭبەرى» دەپ اتايدى. وسى جارىستا الەم چەمپيونى بولعان اقش, يران بالۋاندارى ءوز ەلدەرىنىڭ تۋىن ماقتانىشپەن الىپ وتكەنىن كوردىك. كوردىك تە سۇيسىندىك. وكىنىشكە قاراي, حالقىمىز تالاي جىل كۇتكەن جەڭىستى كوك تۋسىز قارسى الدى. الەمدى مويىنداتقان تاريحي ساتتە چەمپيوناتتى ۇيىمداستىرۋشىلار, باپكەرلەر مەن جانكۇيەرلەردەن ءبىر تۋدىڭ تابىلماعانى وتە وكىنىشتى, ارينە. قازاق جىگىتىنىڭ جانكۇيەرلەرىنە قاراپ جانۇشىرا «تۋ قايدا؟» دەپ ايقايلاعان, اشۋعا بۋلىققان, شاراسىزدىققا تولى داۋسىن ەستىگەندە ۇياتتان جارىلىپ كەتەردەي بولدىق. امالسىزدان كىلەمگە باپكەرى كوتەرىلىپ, الەم چەمپيوناتىنان العاشقىلاردىڭ ءبىرى بولىپ قورجىنعا التىن سالىپ بەرگەن ريزابەكتىڭ قولىن كوتەرىپ ءجۇرىپ شارشى الاڭدى اينالىپ شىقتى. اينالا ءجۇرىپ ءوزىنىڭ كيىمىندەگى كوزگە ارەڭ كورىنەتىن كوك تۋدى كورسەتكەندەي بولدى... تاۋەلسىز ەل تاريحىندا ەركىن كۇرەستەن تۇڭعىش الەم چەمپيونىن ماراپاتتاپ, التىن جۇلدەمەن قوسا چەمپيوندىق بەلبەۋ تاققان كەزدە دە تۋ سىرتىنا ىلىنگەن تۋىمىز تولىق كورسەتىلمەدى – ويۋىنىڭ جارتىسى جابىلىپ قالعان.
كەشەگى كورىنىستەن كەيىن قازاقستان كۇرەس فەدەراتسياسى مەن چەمپيوننىڭ باپكەرىنە قاراتا ايتىلعان سىن دا, قويىلعان سۇراق تا كوپ. «شەشۋشى ساتكە كوك بايراقسىز قالاي كەلدى؟», «بۇل باپكەرىنىڭ شاكىرتىنە دەگەن سەنىمسىزدىگى مە؟» دەگەن جۇرتتىڭ ءبىرازى «التىننان ءۇمىتى بولماعان سوڭ تۋدى وزدەرىمەن بىرگە الماعان بولار» دەگەن بولجامىن دا اشىق ايتىپ وتىر.
وكىنىشكە قاراي, حالىقارالىق دودالاردا مەملەكەتتىك رامىزدەرىمىزگە قاتىستى مۇنداي ولقىلىقتار ءبىرىنشى رەت بولىپ وتىرعان جوق. ايتەۋىر, ءبىر كەمشىلىگىمىز الەم جۇرتىنىڭ الدىندا كورىنىپ قالادى. ەستەرىڭىزدە بولسا, وتكەن جىلى لاتۆيادا سپورتتىق بيدەن الەم چەمپيوناتى ءوتىپ, جارىستا جاستار اراسىندا سىنعا تۇسكەن وتانداستارىمىز ماكسيم جيلەنكوۆ پەن ارينا مولوچنيكوۆا سپورتتىق ءبيدىڭ قوسسايىس تۇرىندە باس جۇلدەگە يە بولعان ەدى. الەم چەمپيوندارىن ماراپاتتاۋ سالتاناتىندا ماسقارا بولىپ, ەلىمىزدىڭ قازىرگى گيمنىنىڭ ورنىنا بۇرىنعى ءانۇران قوسىلدى. تۇركيا ەلىندە الەم مەملەكەتتەرىنىڭ تۋلارىنىڭ ىشىندە كوك بايراعىمىزدىڭ تەرىس ىلىنگەنىن دە كوردىك.
قايبىر جىلدارى قازاقستان نامىسىن شەتەلدىك جارىستا قورعايتىن ءار كومانداعا ەلىمىزدىڭ گيمنى مەن كوك تۋىن قوسا الىپ ءجۇرۋ مىندەتى قويىلعان بولاتىن. بىراق كەشەگى جاعدايدان كەيىن بۇل تاپسىرمانىڭ دا سوڭى سۇيىلىپ كەتكەنىن انىق اڭعارۋعا بولادى.
راس, كەز كەلگەن حالىقارالىق جارىستا جەڭىسكە جەتكەن سپورتشى ءۇشىن توبەسىنە ەلىنىڭ تۋىن كوتەرۋدەن اسقان باقىت جوق. شەتەلدەردە ەلىمىزدىڭ كوك بايراعى كوككە كوتەرىلىپ, ءانۇرانىمىز ايتىلعاندا قازاقستانىم دەپ سوققان ءار جۇرەكتىڭ ەرەكشە كۇيگە بولەنىپ, رۋحىمىز كوتەرىلەتىنى ءسوزسىز. ال تۋ جەڭىستەردى اتاپ ءوتۋدىڭ اجىراماس نىشانىنا اينالىپ كەتتى. قانداي باسەكەنى بولسىن بايراقسىز ەلەستەتۋ مۇمكىن ەمەس. ال جەڭىل اتلەتيكادا جەڭىس تۇعىرىنان كورىنگەن اتلەتتىڭ ءوز ەلىنىڭ تۋىن ارقاسىنا جامىلىپ, بۇكىل ستاديوندى اينالا جۇگىرىپ شىعاتىنى وسى ءبىر بەكزادا سپورتتىڭ جازىلماعان زاڭدىلىعىنا اينالدى. سول سياقتى كۇرەس تۇرلەرىنەن دە چەمپيوننىڭ تۋمەن بىرگە كىلەمدى اينالا ءجۇرىپ ءوتۋىن قالىپتاسقان ءداستۇر دەپ قابىلدايتىن بولدىق. ويتكەنى تۋدى كوتەرىپ, جينالعان جۇرتتىڭ قوشەمەتىنە بولەنۋ – نامىسىن قورعاپ, ابىرويىن اسىرعان ەلىنىڭ اتىن اسقاقتاتۋ, جۇرتىڭدى ماقتان تۇتۋ دەگەن ءسوز. سەبەبى كوك تۋ – ەلدىڭ ايبارى, ءانۇران – حالىقتىڭ ايبىنى. تۋ – ەلدىكتىڭ بەلگىسى, تاۋەلسىزدىكتىڭ ءرامىزى. حالىقارالىق ارەناداعى قازاقستاننىڭ ابىروي-بەدەلى مەملەكەتتىك رامىزدەرگە دەگەن قۇرمەتپەن قالىپتاسادى. تۋى جوق سپورتشىلار دا بار. بار تۋىن بايراقتى باسەكەنىڭ بيىگىندە كوتەرە الماي جۇرگەن ەلدەر دە جوق ەمەس. ءبىزدىڭ كەيدە سول بارىمىزدى جارقىراتىپ كورسەتە الماي قالاتىنىمىز جانعا باتادى. كەشەگى ولقىلىق تا قازاق كۇرەسىنىڭ تاريحىندا ء«بىر كەم دۇنيە» بولىپ قالارى انىق.
