سۋرەتتى تۇسىرگەن – جانگەلدى ابدىعالىم
مەكتەپكە ورنالاسقان جاس مۇعالىمدەر اۋەلى ءتورت ساتىلى ىرىكتەۋدەن ءوتىپ, سۇلەيمەن دەميرەل ۋنيۆەرسيتەتىندە قايتا دايارلاۋ كۋرسىندا بىلىكتىلىگىن ارتتىرعان. سولاردىڭ قاتارىندا 21 جاستاعى نازيرا كەڭەسوۆا دا بار. ول جوعارى ءبىلىمدى ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنەن العان. ماماندىعى – ماشينا جاساۋ ينجەنەرى. بىراق نازيرا ۋاقىت وتە جانى مۇعالىم بولۋدى قالايتىنىن تۇسىنەدى. وقۋىن ويداعىداي اياقتاي سالىسىمەن, «Teach for Qazaqstan» جوباسى تۋرالى ەستىپ-ءبىلىپ, باعىن سىناپ كورۋدى ۇيعارادى.
– جوبانىڭ جارناماسىن الەۋمەتتىك جەلىدەن كوردىم. «ارمانىڭدى جۇزەگە اسىر – مۇعالىم بول!» دەگەندى وقىپ, ماعان بەرىلگەلى تۇرعان تاعى ءبىر مۇمكىندىك ەكەنىن ءتۇسىندىم. ىرىكتەۋدەن وتكەن سوڭ, سۇلەيمەن دەميرەل ۋنيۆەرسيتەتىنەن تەرەڭدەتىلگەن ءبىلىم الدىم. ەندى, مىنە جاڭا وقۋ جىلى باستالعالى بەرى تورتكول اۋىلىنىڭ تىرەك مەكتەبىندە ماتەماتيكا جانە فيزيكا ءپانىنىڭ مۇعالىمى بولىپ جۇمىس ىستەپ جاتىرمىن. مەنىڭشە, ءار ادام ءوز ماماندىعىن ءسۇيۋى كەرەك. وزىمە بالالارمەن جۇمىس ىستەۋ ۇناعاندىقتان, وسى جولدى تاڭدادىم. بالالار ساباققا بەلسەنە قاتىسىپ, كەرى بايلانىس جاساسا, ءتىپتى قۋانامىن. ءبىزدىڭ ءبىلىم وشاعى تىرەك مەكتەبى بولعاندىقتان, مەكتەپتە ينكليۋزيۆتى بىلىمگە قاتىستى جوبانى جۇزەگە اسىرۋدى جوسپارلاپ وتىرمىن, – دەيدى نازيرا.
جوبا ارقالىقتىڭ دا ءبىر ۇلىن ارقاعا الىپ كەلدى. جاندوس ايدارحانوۆ استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اقپاراتتىق تەحنولوگيالار فاكۋلتەتىن ءبىتىرىپ, ەلورداداعى ءىرى كومپانيادا ماماندىعى بويىنشا قىزمەت اتقارعان. الايدا جاندوستىڭ دا جانىنا ۇستازدىق ەتۋ جاقىن بولدى. ونىڭ وزىندىك سەبەپتەرى دە بار.
– الدىمدا ۇلكەن مانساپ, پەرسپەكتيۆا, بەرەكەلى ۇجىمىم بولسا دا, جۇمىسىم كوڭىلىمە اسا جاعا قويمادى. ۇيدەگىلەردىڭ بارلىعى ءبىلىم سالاسىندا قىزمەت ەتەدى. سونى كەش ءتۇسىندىم. بىراق ەشتەن كەش جاقسى ەمەس پە؟ اعام وسى ءبىر جوبا جونىندە اقپارات ايتتى. ەكى ويدا جۇرگەن مەن, بىردەن قاتىسۋعا بەل بۋدىم. سونىڭ ناتيجەسىندە ەلىمىزدەگى ەڭ بەدەلدى سۇلەيمەن دەميرەل ۋنيۆەرسيتەتىندە ءبىلىم الۋ باقىتى بۇيىردى. ءساتتى وقىپ شىققان سوڭ, عابيدەن مۇستافين اۋىلىنداعى مەكتەپكە ورنالاستىم. اۋىل بالالارىنا ءبىلىم بەرگەن ۇنايدى. بۇل جەردە مەنى قوسقاندا جوبانىڭ بەس تۇلەگى بار, – دەيدى جاندوس.
«Teach for Qazaqstan» جوباسىن «مۇعالىم ماماندىعىنا بۇيىردەن كەلۋ» دەيدى قاتىسۋشىلار. جوبا ۇزدىك مامانداردى, ىنتالى جاستاردى تاڭداپ الىپ, پەداگوگ بولۋعا كاسىبي تۇردە شىڭدايدى.
– جوبا بيىل ىسكە قوسىلدى. ازىرگە ءبىزدىڭ تۇلەكتەر قاراعاندى وبلىسىنىڭ مەكتەپتەرىنە عانا جۇمىسقا ورنالاستى. ولاردىڭ سەگىزى – بۇقار جىراۋ اۋدانىنىڭ, قالعانى اباي, شاحتينسك, بالقاش قالالارىنىڭ مەكتەپتەرىن تاڭدادى. تۇلەكتەرىمىز ەلىمىزدىڭ جوعارى وقۋ ورىندارىن بىتىرگەن, ءتورت كەزەڭدىك ىرىكتەۋدەن تولىق وتكەن. ىرىكتەۋگە بارلىعى ءۇش مىڭعا جۋىق ۇمىتكەر قاتىستى. ولاردىڭ ىشىنەن 49 تالاپكەردى تاڭداپ الدىق. سۇلەيمەن دەميرەل ۋنيۆەرسيتەتىندە قايتا دايارلاۋ وقۋ باعدارلاماسىن تەك 30 مامان اياقتاي الدى, – دەيدى «Teach for Qazaqstan» قوعامدىق قورىنىڭ ديرەكتورى گۇلنار سالمەنوۆا.
ەكى جىلدىق ادىستەمەلىك كومەكپەن قوسا, جوبا تۇلەكتەرى اي سايىن 300 مىڭ تەڭگە كولەمىندە شاكىرتاقى الادى. بۇعان قوسا مەكتەپتەردە ولارعا ارنايى تالىمگەرلەر بەكىتىلەدى. ەكى جىلدان كەيىن جاس مامانداردا كەز كەلگەن حالىقارالىق ۋنيۆەرسيتەتكە ءتۇسىپ, ءبىلىمىن ءارى قاراي جەتىلدىرۋ مۇمكىندىگى قاراستىرىلعان.
– Teach for Qazaqstan – بۇل الەمنىڭ 60-قا جۋىق ەلىندە تابىستى ىسكە اسىرىلىپ جاتقان «تeach عor All» جاھاندىق جوباسىنىڭ ءبىر بولىگى. كەلەسى جىلى تاعى 100 قاتىسۋشىنى ىرىكتەپ الىپ, جۇمىستى ءارى قاراي جالعاستىرۋ جوسپارى بار. وسى ارقىلى پەداگوگ تاپشىلىعىن ءبىرجولا جويماساق تا, ءبىز دايارلاعان ماماندارمەن كادر تاپشىلىعىن استە-استە ازايتا بەرمەكپىز, – دەيدى گ.سالمەنوۆا.
قاراعاندى وبلىسى
