مەملەكەت باسشىسى اتاپ وتكەندەي, حالىقارالىق قاۋىپسىزدىكتىڭ جاڭا جۇيەسىن قالىپتاستىرۋ ءۇشىن بەيبىتشىلىككە شاقىراتىن جاڭا جاھاندىق قوزعالىس قاجەت. بۇل رەتتە رۋحاني جانە ءدىني كوشباسشىلاردىڭ ءرولى زور.
قازىرگى تاڭدا الەم حالقىنىڭ شامامەن 85 پايىزى ءوزىن بەلگىلى ءبىر دىنمەن بايلانىستىرادى. سوندىقتان ءدىن كوشباسشىلارى حالىقارالىق ۇدەرىستەرگە ايتارلىقتاي ىقپالىن ەسكەرە وتىرىپ, جاھان جۇرتىن الاڭداتقان وزەكتى پروبلەمالاردى شەشۋدە ماڭىزدى ءرول اتقارۋى كەرەك.
جالپى, الەمدىك دىندەر ادام ءومىرىنىڭ قۇندىلىعى, مەيىرىمدىلىك, ءوزارا جاۋاپكەرشىلىك پەن قولداۋ, زورلىق-زومبىلىق پەن ارازدىققا قارسى تۇرۋ سياقتى نەگىزگى قاعيدالاردى دارىپتەيدى. پرەزيدەنتىمىزدىڭ ماقالاسىندا ايتىلعانداي, ءدال وسى قاعيدالار جاڭا الەمدىك جۇيەگە نەگىز بولا الادى.
ءدىن قايراتكەرلەرى قاقتىعىستاردى ازايتۋعا, قازىر الەمدە كەڭ تارالعان جەك كورۋ مەن دۇشپاندىق يدەولوگياسىنىڭ الدىن الۋعا دا ىقپال ەتە الاتىنى انىق. سونىمەن قاتار ماقالادا تەحنولوگيالىق دامۋدىڭ مورالدىق جانە ادامگەرشىلىك جاعى تۋرالى ماڭىزدى ويلار ايتىلادى. شىن مانىندە, تسيفرلىق جانە تەحنولوگيالىق دامۋ گۋمانيزم مەن ەتيكاعا تابان تىرەمەسە, ونىڭ قاراما-قايشى سالدارى بولۋى ابدەن مۇمكىن. سوندىقتان بۇل رەتتە دە رۋحاني كوشباسشىلاردىڭ باعىت-باعدارى قاجەت.
ەلىمىزدە الەمدىك جانە ءداستۇرلى دىندەر ليدەرلەرىنىڭ سەزى 20 جىل بويى تۇراقتى تۇردە وتكىزىلىپ كەلە جاتقانى بەلگىلى. قازىرگى تاڭدا دۇنيەجۇزىندە دىنارالىق جانە وركەنيەتارالىق ديالوگتى نىعايتۋدا بۇل باستاما ماڭىزدى ءرول اتقارادى.
سول سەبەپتى, بىلتىر قىركۇيەك ايىندا استانادا پرەزيدەنتىمىز قاسىم-جومارت توقاەۆتىڭ توراعالىعىمەن وتكەن VII سەزد ماڭىزدى حالىقارالىق وقيعا رەتىندە قابىلداندى. سەزگە ريم پاپاسى فرانتسيسك, ءال-ازھاردىڭ جوعارعى يمامى شەيح احمەد ات-تايەب, ءيزرايلدىڭ جوعارعى راۆۆيندەرى جانە الەمنىڭ باسقا دا كوپتەگەن رۋحاني جەتەكشىلەرى قاتىستى.
فورۋمعا قاتىسۋشىلار ەكى كۇن بويى ادامزاتتىڭ جاھاندىق پروبلەمالارىن شەشۋ جولىندا دىندەردىڭ جاسامپاز الەۋەتىن پايدالانۋ ماسەلەسىن تالقىلادى. سونداي-اق جالپىادامزاتتىق جانە رۋحاني قۇندىلىقتارعا نەگىزدەلگەن جاڭا الەمدىك جۇيەنىڭ بەدەرى بەلگىلەندى. سەزد بارىسىندا ايتىلعان بارلىق نەگىزگى يدەيالار مەن ۇسىنىستار فورۋمنىڭ قورىتىندى دەكلاراتسياسىنا ەنگىزىلدى.
كەلەسى ايدا استانادا سەزد حاتشىلىعىنىڭ وتىرىسى وتەدى. وندا VII سەزدىڭ يدەيالارى مەن قورىتىندى قۇجاتىن دارىپتەۋ ماسەلەلەرى جانە الداعى ون جىلعا ارنالعان دىنارالىق فورۋمدى دامىتۋ تۇجىرىمداماسى قارالادى.
وتىرىس كەزىندە الەمدىك دىندەردىڭ وكىلدەرى ەل پرەزيدەنتىنىڭ ماقالاسىندا كوتەرىلگەن ماڭىزدى ماسەلەلەردى دە تالقىلايتىنى ءسوزسىز.
جالپى, ۋاقىت وتكەن سايىن دىنارالىق ديالوگ پەن جالپىادامزاتتىق قۇندىلىقتاردى دارىپتەۋدە ەلىمىزدىڭ بىرەگەي ءرولىنىڭ ماڭىزى ارتىپ كەلەدى. وسىلايشا, قازاقستان حالىقارالىق قوعامداستىقتىڭ الدىندا تۇرعان قازىرگى كۇردەلى پروبلەمالار مەن سىن-قاتەرلەردى ەڭسەرۋگە ءوزىنىڭ ەلەۋلى ۇلەسىن قوسىپ وتىر.
ماۋلەن اشىمباەۆ,
پارلامەنت سەناتىنىڭ توراعاسى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى
