قۋانىش كوپكە ورتاق. جىل سايىن وتكىزىلەتىن ءداستۇرلى مەرەكەدە ءتۇرلى ەتنوس وكىلدەرى باس قوسىپ, ءبىر جادىراپ قالدى. بۇل مەيرام ءتۇبى ءبىر تۇركى حالىقتارىنىڭ كۇنتىزبەسىندەگى ايرىقشا ماڭىزدى وقيعالاردىڭ ءبىرى بولىپ سانالادى. ءسوز اراسىندا وبلىستا 17 مىڭعا جۋىق تاتار-باشقۇرت وكىلدەرىنىڭ تۇراتىنىن ايتا كەتەلىك.
– مەرەكە وتەتىندىگى تۋرالى حابار قۇلاعىما تيگەن سوڭ ۇيدە جاتا المادىم, – دەيدى اقكول اۋدانىنىڭ تۇرعىنى رازيدا احمەتجانوۆا, – كونتسەرتتىك باعدارلامادا كوپشىلىك نازارىنا ۇسىنىلعان مىڭ بۇرالعان ءبيدىڭ ناقىشى ادەمى اسەر ەتتى. ۇلتتىق ءبيدىڭ ۇشقىنى ساعىنىش وتى لاۋلاعان جۇرەگىمدى ەلجىرەتىپ جىبەردى. ۇلتتىق داستارقاندى جايناتىپ جىبەرگەن تاتار-باشقۇرتتىڭ اس ءمازىرى قانداي؟
سىرلى سازعا تولى تاتار-باشقۇرت حالقىنىڭ اندەرى ورىندالىپ, جاسىنداي جارقىلداعان جىگەرلى بيلەرى كورەرمەن قاۋىمنىڭ كوڭىلىن كوتەردى. ەڭكەيگەن كارىدەن ەڭبەكتەگەن بالاعا دەيىن ءبىرىن-ءبىرى قۇتتىقتاي ءجۇرىپ, وزدەرى پانا تاپقان قازاق دالاسىنداعى كىلكىپ تۇرعان باۋىرمالدىققا اق العىستارىن ايتىپ جاتتى.
– بۇگىنگى مەركەگە ەلىمىزدىڭ ءار وڭىرىنەن ۇزىن-ىرعاسى ەكى مىڭعا جۋىق مەيمان كەلىپ, ورتاق تويدىڭ قىزىعىن كۇمپىلدەتىپ جاتىر, – دەيدى تاتار-باشقۇرت ەتنو-مادەني بىرلەستىگىنىڭ توراعاسى رافايل سۋلكارناەۆ, – ۇلتتىق ويىندارمەن بىرگە بيىلعى جىلى تۇڭعىش رەت بايگە وتكىزدىك. كەلەر جىلى حالىقارالىق دەڭگەيدە سابانتوي مەرەكەسىن كەڭ كولەمدە اتاپ وتەمىز بە دەگەن جوسپارىمىز بار. بۇگىن اقساقالدارىمىز باس قوسىپ, وسى جايدى تالقىلاماقپىز.
ۇلى ونەردىڭ شاپاعاتى ارقىلى دوستىق دانەكەرى بەكي تۇسپەك. مەرەكە بارىسىندا كورەرمەن نازارىنا ۇسىنىلعان قولونەر بۇيىمدارى, تاتار-باشقۇرت حالقىنىڭ ەرتەرەكتە تۇتىنعان تۇرمىستىق زاتتارى, ءتول مادەنيەتى ارقىلى جالپاق جۇرت تۋىسقان حالىقتىڭ بولمىسىنا تەرەڭىرەك كوز جەتكىزگەندەي. ۇلتتار مەن ۇلىستاردى ۇلى ماقسات توڭىرەگىندە ۇيىستىراتىن بىرلىكتىڭ بەكەمدەلۋى دە وسىنداي تانىپ-بىلۋدەن شىعار بالكىم.
كوكشەتاۋ
