قاراعاندى وبلىسىنىڭ تابيعي رەسۋرستار جانە تابيعي پايدالانۋدى رەتتەۋ باسقارماسىنىڭ قاراماعىنداعى جەردىڭ جالپى اۋدانى – 127 039 گەكتار. ونىڭ 68 962 گەكتارى – ورمان. بيىل دالا مەن ورماندى قوسقاندا 192,62 گەكتار وتقا ورانعان. ونىڭ 55,71 گەكتارى – ورمان.
ءورت قاۋپى كۇشەيگەنگە دەيىن باسقارماعا قاراستى ورماننىڭ اينالاسى قوتارىلعان. قوتارىلعان جەردىڭ ۇزىندىعى – 4293,2 شاقىرىم. باسقارما باسشىسىنىڭ سوزىنشە, قاجەتتى جۇمىس كۇشى دەر كەزىندە جۇمىلدىرىلىپتى.
ورمان قورىن ءتىلسىز جاۋدان قورعاۋعا ارنالعان شارالاردىڭ جوسپارى وبلىس اكىمىمەن وسى جىلدىڭ ناۋرىزىندا بەكىتىلگەن.
– قاراعاندى وبلىسىنىڭ اۋماعىندا ورمان ءورتىنىڭ الدىن الۋ جانە ولاردى جويۋ جونىندەگى ءىس-قيمىل جوسپارى بار. 2023 جىلعا ارنالعان تابيعي ورتتەردى جويۋ كەزىندە تابيعي رەسۋرستار جانە تابيعات پايدالانۋدى رەتتەۋ باسقارماسى جانە توتەنشە جاعدايلار مينيسترلىگى قاراعاندى وبلىسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى بولىمشەلەرىنىڭ ءوزارا ءىس-قيمىل ءتارتىبى تۋرالى الگوريتم ازىرلەندى. بيىل ورمان شارۋاشىلىقتارىن جاراقتاندىرۋعا 1,1 ملرد تەڭگە ءبولىندى جانە 349 زاماناۋي جابدىقتار مەن م ۇلىك ساتىپ الىندى, – دەيدى باسقارما باسشىسى باحتيار سانباەۆ.
باسقارما پاركى ءورت ءسوندىرۋ كولىكتەرى, موتوتسيكلدەر, كۆادروتسيكلدەر, تراكتورلارمەن تولىققان. تاعى دا باسقا توتەنشە جاعداي كەزىندە قولدانىلاتىن قۇرىلعىلار جەتكىزىلگەن. سونىمەن قاتار ورمانداردىڭ ماڭىندا 5 ءورت ءسوندىرۋ ستانساسى بوي كوتەرمەك. ستانسالار قاراعاندى قالاسىنىڭ, اقتوعاي اۋدانىنىڭ, بۇقار جىراۋ اۋدانىنداعى بەلاعاش اۋىلىنىڭ, شەت اۋدانىنداعى اقسۋ-ايۋلى اۋىلىنىڭ, قارقارالى اۋدانىنداعى ەگىندىبۇلاق اۋىلىنىڭ ىرگەسىندە ورنالاسادى.
باسقارما باسشىسى: «جاسىل جەلەككە ءبىزدىڭ عانا ەمەس, حالىقتىڭ دا جانى اشۋى كەرەك», دەيدى. ويتكەنى ءتىلسىز جاۋ كەيدە دەمالۋشىلاردىڭ سالعىرتتىعىنان دا تۇتانادى. كوبىنە قاۋىپسىزدىك ەرەجەلەرى ەسكەرۋسىز قالادى ەكەن.
ورمان ورتىمەن قوسا, باسقارما زاڭسىز اعاش كەسۋشىلەرمەن دە كۇرەس جۇرگىزىپ جاتىر. زاڭ بۇزۋشىلاردى انىقتاۋ ماقساتىندا 101 رەيد ۇيىمداستىرىلعان. ناتيجەسىندە, 2 زاڭ بۇزۋ دەرەگى انىقتالدى. ال وسىندايدا پايدا تابۋدى عانا ويلايتىن پىسىقايلار 3,8 تەكشە اعاش كەسىپ ۇلگەرىپتى.
قاراعاندى وبلىسى
