ءورت ءسوندىرۋشى بولىپ ەڭبەك ەتىپ جۇرگەن ساپاربەك جاقۇدين جاڭا قۇرىلىس اۋىلىنداعى ۇيدەن شىققان ءورتتى ءوشىرىپ جۇرگەندە جاراقات الادى. قاسىنداعى ارىپتەسى وقىس قيمىلداپ, سۋ سوراتىن سورعى تەمىرى ساپاربەكتىڭ كوزىنە تيەدى. سوققى قاتتى تيسە دە, قىزمەتتىك مىندەتىن ارمەن قاراي اتقارعان ول سول ۋاقىتتا الگى جاراقات جانارىنان ايىراتىنىن بىلگەن دە جوق.
كۇن وتە كوزى كورۋدەن قالىپ, سىرقاتى سىر بەرە باستايدى. ول كەزدە جاسى وتىز توعىزدا ەدى. ءۇش جىل ۋاقىت وتكەن سوڭ كوزى مۇلدەم كورمەي قالادى. سودان جانارىنا جارىق سىيلاۋ ءۇشىن نەبىر دارىگەردىڭ, ەمحانانانىڭ تابالدىرىعىن توزدىرادى. شەتەلدەگى دارىگەرلەردىڭ دە الدىنا بارادى. الايدا بارىنەن قايران بولمادى.
ءسويتىپ, كۇنى دە, ءتۇنى دە قاراڭعى تۇنەككە اينالادى. تاعدىر سىناعىنا كوندىگەدى. ءۇمىتى, كوڭىلىنىڭ نۇرى جالعىز ۇلى بەكتۇر ەدى. اسىل جارى گۇلميرانىڭ دا دەمەۋى ساپاربەك اعامىزعا دەم بەرەدى. سودان بەرى 19 جىل ءوتىپتى.
ۇيدەگى شارۋانىڭ ءبارىن ساپاربەك اعامىزدىڭ ءوزى رەتتەپ وتىرادى. قولى التىن. ۇيگە قاجەت زاتتاردى ءوز قولىمەن جاسايدى. كوكىرەگى سايراپ-اق تۇر. كۇندەلىكتى تاڭەرتەڭ جانە كەشكىلىك حاباردى قالت جىبەرمەيدى. تاڭەرتەڭ ەرتە تۇرىپ, شىنىعۋدى دا سالتىنا اينالدىرىپ العان. سودان قانى اينالادى, جانى سەرگيدى. ۇيدەگىلەر جۇمىسىنا كەتكەندە ءۇي شارۋاسىن ءوزى اتقارا بەرەدى.
كوز ۇشىندا, كوڭىل تورىندە بالا كەيپىندە قالعان بەكتۇرى وتاۋ قۇرىپ, شاڭىراعىن كەڭەيتىپ, شاتتىعىن ەسەلەدى. قۇدايعا تاۋبە, قازىر قۇشاعىندا ءالي, تاسمين ەسىمدى ءتاتتى نەمەرەلەرى بار. ەستۋىمىزشە, اعامىزدىڭ ەڭ ءبىر ەرەكشە قاسيەتى – بالانى تەز باۋرايتىنى. ۇيگە كەلگەن اعايىن-تۋىستىڭ بالالارى جاتىرقاپ جىلاسا, اعامىز قالاي قولىنا الادى, سولاي جادىراپ سالادى. نەمەرەلەرىنە ەرتەگى, اڭىز ايتۋ – كۇندەلىكتى ەرمەگى. ساناۋدى, ءارىپتى ۇيرەتەدى ەكەن.
گۇلميرا جەڭگەمىز اۋداندىق مادەنيەت ۇيىندە ادىسكەر بولىپ قىزمەت اتقارادى. ال ۇلى مەن كەلىنىنىڭ ءدامحاناسى بار. سونى كاسىپ ەتكەن.
«ۇيدە وتىرا بەرگەن جاراماس», دەپ اعامىز ىزدەنە باستايدى. جوعارىدا اعامىزدىڭ قولى التىن ەكەنىن ايتا وتكەنبىز, ويىنا ماسساجبەن اينالىسۋ كەلەدى. سول مەزەتتە قىتايدان كەلگەن مامان زاعيپ جانداردى وسى ءبىر ىسكە وقىتىپ جاتادى. سوندا بارىپ, 3 اي كۋرسقا قاتىسىپ, ءتالىم الادى. قاسىنداعىلارعا قاراعاندا جەدەل قاعىپ الادى. ساباعىن ءساتتى تۇيىندەپ سەرتيفيكاتقا يە بولادى. ءسويتىپ, بىلتىر اۋدان اكىمىنىڭ 1 ملن تەڭگە گرانتى بۇيىرادى. ۇكىمەتتىڭ قايتارىمسىز قاراجاتىنا كەرەك-جاراعىن الىپ, ءۇيدىڭ ءبىر بولمەسىن جابدىقتادى.
مىنە, قازىر نۇرالىقتار ساپاربەك اعانىڭ ماسساجىنا اسىعادى. كىسى كەلمەسە, كوڭىلى تۇسەدى. بۋىن-بۋىنعا ماسساج جاساۋعا ابدەن ماشىقتانىپ العان اعامىزدىڭ ەكى تاۋداي ارمانى بار. وكىنىشكە قاراي, ءبىر ارمانى جاقىن كورىنگەنىمەن, الىستاپ كەتتى. وسى جىلدىڭ اقپان ايى ەدى. «استانادان كەرەمەت كوز ەمحاناسى اشىلىپتى. بارعاندار كورىپ كەتىپ جاتىر ەكەن. مەنىڭ دە كوزىم كورەدى», دەپ كوپشىلىكتەن ءسۇيىنشىنى دە سۇراپ قويعان. وندا بارعانىمەن, ەمحانانىڭ باس دارىگەرى مۇمكىن ەمەستىگىن امالسىز جەتكىزەدى. سول ساتتە ەڭكىلدەپ جىلاعانى ەلدىڭ جانىنا قاتتى باتادى. گۇلميرا جەڭگەمىزدىڭ ءوزى سول اۋىر ءساتتى بىلاي ەسكە الىپ كۇرسىنەدى: «جيىرما جىل بويى ەڭسەمىز بۇلاي ەزىلمەپ ەدى. قاتتى ۇمىتتەنىپ ەدىك. ءدال سول كەزدەگىدەي توقتاماي, سولق-سولق ەتىپ جىلاعانىن بۇرىن كورگەن ەمەسپىن. ءۇمىتىمىز كوزىمىزدىڭ جاسىمەن ءسوندى».
ەندى ءبىر ارمانى بار. اعامىز اۋرۋحاناعا جۇمىسقا ورنالاسىپ, ەمگە كەلگەندەرگە ماسساج جاساپ, ەلگە پايداسىن تيگىزگىسى كەلەدى. «جالاقىنىڭ از-كوپتىگى ماڭىزدى ەمەس, ەل قاتارلى ەڭبەك ەتسەم, قوعامعا ۇلەس قوسسام», دەپ بىزگە دە ۇلكەن ءۇمىت ارقالاتىپ جىبەردى. وسى ءبىر ءۇمىت وتىن ءوشىرىپ الماساق يگى ەدى...
قاراعاندى وبلىسى,
نۇرا اۋدانى
