ءالى وتىزعا تولماعان جاس جىگىت جۇمىستى بەرىلىپ ىستەۋىمەن وزگە ارىپتەستەرىنە ۇلگى-ونەگە بولىپ ءجۇر. بۇلاندى اۋىلىندا ورتا مەكتەپتى بىتىرگەننەن كەيىن الدىنان ماماندىق تاڭداۋ تۋرالى ماسەلە شىقتى. ءوز ايتۋىنا قاراعاندا, ميراس اقىلجان ۇلى كوپ ويلانباپتى. استانا قالاسىنداعى تەمىرجولشىلار كوللەدجىنە وقۋعا تۇسكەن. تەحنيك قۇرىلىسشى ماماندىعىن يگەرگەن. اسكەري بورىشىن وتەپ كەلگەننەن كەيىن ءۇش جىلداي ساۋدا مەنەدجەرى بولىپ قىزمەت ەتكەن. ايتسە دە كوڭىلدىڭ قالاۋى اۋەل باستا ءوزى قۇلاي سۇيگەن تىلسىم سىرى مول تەحنيكا الەمىنە اۋىسسا كەرەك. وسىلايشا, ءوزى تۋعان ولكەدەگى بولاشاعىنان ۇلكەن ءۇمىت كۇتتىرەتىن جىلۋ وقشاۋلاۋ زاۋىتىنا ورنالاسقان.
بۇرىن ءسال بۇيىعى كۇن كەشكەن ماكينسك قالاسىنىڭ الەۋمەتتىك-ەكونوميكالىق دامۋىنا ءتاپ-ءتاۋىر ۇلەس قوسا باستاعان زاۋىت جىلۋ ۇستاعىشتار شىعارادى. ورتا ازيادا تەڭدەسى جوق الىپ كاسىپورىندى سالۋعا جالپى قۇنى 8 ملرد تەڭگە جۇمسالعان. 200-گە جۋىق ادامدى تۇراقتى جۇمىس ورنىمەن قامتاماسىز ەتكەن زاۋىت ەل ىشىندەگى جۇمىسسىزدىقتى ازايتۋعا دا ىقپالىن تيگىزىپ كەلەدى.
– بازالت تاسى – مينەرالدىق ماقتانىڭ شيكىزاتى. كاسىپورىن 100 پايىز وتاندىق ءونىم شىعارادى. زاۋىتتا ونىمدىلىگى جوعارى يتالياندىق قوندىرعىلار ورناتىلعان. دومنا پەشىندە 1 600 گرادۋسقا دەيىنگى جوعارى تەمپەراتۋرادا بازالت تاسى ەرىتىلىپ, كەيىن ارنايى قوسىندىلار ارقىلى ءونىم دايىندالادى. الدىمەن شيكىزات بۋنكەرگە تولتىرىلادى. سوسىن ەرىتكىش پەشتەن وتكىزىپ, وعان جەلىم, ىلعال وتكىزبەيتىن ماتەريالدار سياقتى قوسىندىلاردى ارالاستىرىلادى. قالىڭدىعى مەن تىعىزدىعىن قاجەتتىلىگىنە وراي بەلگىلەپ, ارنايى قوندىرعىلاردىڭ كومەگىمەن مينەرالدى ماقتا دايىندالادى, – دەيدى ميراس اقىلجان ۇلى.
قۇرىلىسى قارقىندى دامىپ جاتقان ەلوردا بىرەر جىل بۇرىن جىلۋ ساقتاعىش ماتەريالداردى رەسەيدەن تاسىمالداپ كەلگەن. ەندى قۇرىلىسقا قاجەتتى زات ىرگەدەگى بۇلاندىدا دايىندالادى.
ميراس اقىلجان ۇلى جۇمىس بارىسىندا تەحنولوگيالىق ۇدەرىستەردىڭ مۇلتىكسىز ورىندالۋىن قاداعالايدى. تەحنيكالىق قىزمەتكەرلەرگە جەتەكشىلىك ەتەدى. ءارى جۇمىس ورنىندا ايتىپ كەلمەس اپاتتان ساقتاندىرۋ ءۇشىن تەحنيكالىق قاۋىپسىزدىك جايلى ءاربىر جۇمىسشىعا جەتكىزىپ, جۇمىس بارىسىندا تالاپتىڭ ورىندالۋىن باقىلايدى. تسەحتىڭ قۇجاتتارىن تولتىرۋمەن دە اينالىسادى.
– شىعارعان ءونىمىمىزدىڭ تالاپقا ساي بولۋىن قاتاڭ قاداعالايمىن, – دەيدى شەبەر. – وتاندىق جىلۋ ۇستاعىش ماتەريالعا دەگەن سۇرانىس كوپ. قىرعىزستان, تاجىكستان, وزبەكستاننان بولەك ەل ىشىندەگى قۇرىلىسقا دا كوپتەپ پايدالانۋدا. ازاماتتىق جانە ونەركاسىپتىك قۇرىلىستا جىلىتۋ جانە دىبىستى وقشاۋلاۋ ءۇشىن قاجەتتى ماتەريالداردىڭ وزىمىزدە شىعارىلۋى – اتاپ ايتارلىق-اق دۇنيە.
ارىپتەستەرىنىڭ ايتۋىنا قاراعاندا, ميراس اقىلجان ۇلى – بويىنا ىسكەرلىك قاسيەتتەردى مولىنان جيناعان, تىندىرىمدى جان. وسى ىلكىمدىلىكتى جۇمىستى ۇيىمداستىرۋ بارىسىندا دۇرىس پايدالانا بىلەدى. جاستىق جىگەرى جالىن اتقان شەبەر ورتاق ىسكە ارىپتەستەرىن جۇمىلدىرىپ, وزدەرى اتقارىپ جاتقان تىنىمسىز ەڭبەكتىڭ ناتيجەلى بولۋىن قالايدى. ارقاشان وزىنە تاپسىرىلعان ىسكە جوعارى جاۋاپكەرشىلىكپەن قارايتىن ول وزگەدەن دە سونى تالاپ ەتە بىلەدى.
– قازىرگى كۇنى وندىرىستە قازاق جاستارىن كوپ كورە قويمايسىڭ. نەگىزى جاستاردىڭ وقىپ, ءبىلىم الۋىنا, كاسىپ يگەرۋىنە مەملەكەت تاراپىنان قانشاما جاعداي تۋعىزىلىپ وتىر. دەمەك, وزدەرىنە سەنىم ارتىلعاننان كەيىن جاستار دا تەحنيكالىق ماماندىقتى يگەرىپ, جۇمىس ىستەگەنى ءجون عوي, – دەيدى كەيىپكەرىمىز.
اقمولا وبلىسى,
بۇلاندى اۋدانى
