ەكىباستۇز – رەكوردشىلار شاھارى. تەك ءوندىرىس اۋماعىن عانا الاتىن بولساق, الەمدەگى ەڭ ءىرى كەنىش پەن ەڭ بيىك وندىرىستىك مۇرجا وسىندا ورنالاسقان. №2 ماەس-ءتىڭ زەڭگىر كوكپەن ۇشتاسقان مۇرجاسىنان قاشان قاراساڭىز دا بۋداق-بۋداق ءتۇتىن شىعىپ جاتادى. مۇنداعى قوس ەنەرگوبلوك جىلىنا كەمى 6 ملرد ساعات ەلەكتر قۋاتىن ءوندىرىپ, رەسپۋبليكاداعى ەلەكتر ەنەرگياسىنىڭ 6-7 پايىزىن قامتاماسىز ەتىپ وتىر. 2021 جىلى كاسىپورىن ءوزىنىڭ التىن تاريحىندا بۇرىن-سوڭدى تىركەلمەگەن رەكوردتىق كورسەتكىشكە قول جەتكىزىپ, ەل يگىلىگى ءۇشىن 6,4 ملرد ساعات ەلەكتر ەنەرگياسىن بەردى.
ءىرى اۋقىمداعى مۇنداي وندىرىستىك كورسەتكىشتەردى باعىندىرۋ ەڭ اۋەلى كاسىپورىنداعى ورتا بۋىن قىزمەتكەرلەردىڭ ارقاسى ەكەنى ايتپاسا دا تۇسىنىكتى. ستانسادا بۇگىندە 1 500-دەن اسا ادام ەڭبەك ەتەدى. سونىڭ ىشىندە سەيىتجانوۆ اۋلەتى ەرەكشە اتالادى. اۋلەتتىڭ ۇلكەنى قابيدەن ومارعالي ۇلىنىڭ بۇل ەڭبەك ۇيىمىنداعى ءوتىلى 29 جىلدان اسقان. ال اعامىزدىڭ قوساعى, قازاندىق جابدىقتارى بويىنشا ماشينيست-ارالاۋشى گالينا نەعماتقىزى قۋات ءوندىرۋ سالاسىنا 30 جىل ەڭبەك سىڭىرگەن.
– ايماقتىق ەلەكتر ستانساسىندا باسقارۋ پۋلتىندەگى بلوكتىك جۇيەنىڭ ءماشينيسى رەتىندە ەڭبەك ەتەمىن. نەگىزى سوناۋ اتباسار ەلىنىڭ تۋماسىمىن, 1994 جىلى وسى جاققا قونىس اۋدارىپ كەلدىك. العان ءبىلىمىم ەنەرگەتيكا سالاسىنا قاتىستى بولعان سوڭ كوپ ويلانباستان ماەس-2-گە جۇمىسقا تۇردىم. قىزىق بولعاندا, ءبىزدىڭ اۋلەتتىڭ مۇشەلەرىنىڭ بارلىعى جىلدار وتە ەنەرگەتيكا سالاسىنا اۋەس بولىپ شىقتى, – دەپ جىميدى ق.سەيىتجانوۆ. – تەك ءوز وتباسىمنان ۇيدەگى جەڭگەڭ شيرەك عاسىردان اسا قازاندىقتا ماشينيست قىزمەتىن اتقارسا, ۇلكەن ۇلىم نۇرسۇلتان بلوكتىك جۇيەدە اعا ماشينيست بولىپ ەڭبەك ەتىپ كەلەدى. ۇلىم ەكەۋىمىز – 8-رازريادتى قىزمەتكەرمىز. كىشى ۇلىم جولامان جىلۋ اۆتوماتيكاسىندا شەبەر, ال كەنجە قىزىم قازىر الماتىدا ەنەرگەتيكا سالاسى بويىنشا ماگيستراتۋرادا ءبىلىم الىپ جاتىر. بۇيىرسا, ول دا ەلىمىزدىڭ قۋات ءوندىرۋ سالاسىن دامىتۋعا ءوز ۇلەسىن قوسادى دەپ ۇمىتتەنىپ وتىرمىز. بۇدان بولەك, تۋعان اعام مۇحيتدەن سەيىتجانوۆ, وزگە باۋىرلارىمنىڭ بالالارى, جيەندەرىمىز بەن كەلىندەرىمىز ستانسانىڭ كورىگىن قىزدىرىپ, ەل حالقىن قۋاتپەن قامتاماسىز ەتۋ ءۇشىن ىركىلىسسىز جۇمىس ىستەۋدە. جالپى, سەيىتجانوۆتار اۋلەتىنەن بۇل كاسىپورىندا 11 ادام بارمىز.
بۇل اۋلەتتەن شىققان ەرلان عالياسقار ۇلىنىڭ كاسىپورىندا – 25, گۇلبارشىن راحىمبەردىقىزى – 21, اسەل سايلاۋقىزى – 16, ماحاببات ماراتقىزى – 8, دۋمان ەرمەك ۇلى – 4, ايگەرىم قاسىمحانقىزىنىڭ 2 جىلدىق ەڭبەك ءوتىلى بار. ال 16 جىل تاپجىلماي ەڭبەك ەتكەن تەمىرلان سەيىتجانوۆ قازىرگى كۇنى جىلۋ اۆتوماتيكاسى تسەحىندا باسشىنىڭ ورىنباسارى لاۋازىمىنا جەتكەن. ارىپتەستەرى اينالاسىنا سىيلى, ءاردايىم كوڭىلدى جۇرەتىن تەمىرلاننىڭ ەڭبەگىن ەرەكشە باعالايدى. ول كاسىپورىنداعى كوڭىلدى تاپقىرلار كلۋبىنىڭ كاپيتانى, كاسىپورىن قىزمەتكەرلەرى بالالارىنىڭ دەمالىسىن قىزىقتى ۇيىمداستىرۋدا ودان اسقان شەبەر جوق دەيدى بىرگە جۇمىس ىستەيتىندەر.
«ەلىمىزدىڭ ەنەرگەتيكا جۇيەسى سانالاتىن ەكىباستۇزدا, وسىنداي الىپ وندىرىستە جۇمىس ىستەۋ – ءبىزدىڭ اۋلەتىمىز ءۇشىن ۇلكەن ابىروي. سوناۋ 90-جىلدارى توقىراۋ كەزەڭىن باستان وتكەرىپ, ەلمەن بىرگە تالاي قيىندىقتى كوردىك. قۋات جەتىسپەۋشىلىگى سالدارىنان وڭىرلەردەگى جارىقتى كەزەگىمەن اجىراتىپ, تاۋلىكتىڭ ءبىر مەزگىلىندە عانا جارىق جانىپ تۇراتىن ۋاقىت بولدى. قازىرگى كۇنى ول قيىندىقتار ۇمىتىلىپ, قالالارىمىز بەن اۋىلدارىمىز, ۇلكەن جولداردىڭ بويى تۇندە سامالاداي جارقىراپ تۇراتىنى كوڭىلىمىزگە قۋانىش ۇيالاتادى. ءبىز سياقتى قاراپايىم ەنەرگەتيكتەر ءار وتباسىنىڭ شاڭىراعىنا جەتىپ تۇرعان جارىقتى ماقتانىش, ءوز ەڭبەگىمىزدىڭ ناتيجەسى سانايمىز. تۇپتەپ كەلگەندە ەنەرگەتيكا سالاسى تاۋەلسىز قازاقستاننىڭ نەگىزگى ەكونوميكالىق سەكتورىنا اينالىپ وتىر. بۇيىرسا, جاقىن جىلدارى №2 ماەس-تە ءۇشىنشى ەنەرگيالىق بلوك سالىنىپ, ەلدەگى ەلەكتر قۋاتىنىڭ جەتىسپەۋشىلىگىن ەڭسەرەمىز. جاڭا بلوك ورنالاساتىن ورىن الدەقاشان دايىن, تەك مونتاجداۋشى ارىپتەستەرىمىز 625 مەگاۆاتتىق قازاندىقتىڭ جەتكىزىلۋىن كۇتىپ وتىرعان جايى بار. ال بۇلاردىڭ كىدىرىسسىز جۇمىس ىستەۋى ءۇشىن ءبىزدىڭ دە ارقالايتىن جاۋاپكەرشىلىگىمىز جەتەرلىك», دەپ اڭگىمەسىن تارقاتا ءتۇستى قابيدەن اعا.
ەلەكتر ستانساسىندا ارنايى دابىل قاعىلىپ, باسقارۋ پۋلتىندەگى قىزمەتكەرلەردىڭ كەز كەلگەن جاعدايعا دايىندىعى تەكسەرىلەدى. باسقارۋ پۋلتىندەگى بلوكتىك جۇيەنىڭ بارلىعى كومپيۋتەرگە جالعانعان دەمەسەڭىز, ەنەرگيالىق بلوكتارداعى ءاربىر كورسەتكىش پەن نورمالاردى تاۋلىك بويى تاپجىلماستان باقىلاپ, تەڭگەرىمىن ساقتاۋ ناعىز مامانداردىڭ عانا قولىنان كەلەتىنى شىن. ال قابيدەن ومارعالي ۇلى سياقتى بىلىكتى ماماندار جۇيەنىڭ ءاربىر قادامىن ءدوپ باسىپ, وندىرىستەگى قوس «الىپ جۇرەكتىڭ» ءلۇپىلىن قالىپتى ەتۋگە ولشەۋسىز ۇلەس قوسىپ وتىر.
اۋلەت ۇلكەنىنىڭ پىكىرىنشە, وتاندىق قۋات ءوندىرىسىنىڭ وسۋىمەن قاتار, سالاداعى قىزمەتكەرلەردىڭ الەۋمەتتىك جاعدايىنا مەملەكەت باسا نازار اۋدارعانى ابزال. ەڭ باستىسى, جالاقى دەڭگەيى دۇرىس بولىپ, ساپالى مامانداردى ۇستاپ قالۋعا باسىمدىق بەرىلسە دەيدى.
«مەملەكەت باسشىسى قاسىم-جومارت توقاەۆتىڭ باستاماسىمەن بۇگىندە ەڭبەك ادامدارىن قۇرمەتتەۋگە ماڭىز بەرىلىپ وتىر. پرەزيدەنتىمىز ادىلەتتى قازاقستاندا قاراپايىم ەڭبەك ادامدارىنا ەرەكشە قۇرمەت كورسەتىلەتىنىن, بارلىق جەتىستىكتىڭ باستاۋى ادال ەڭبەك پەن ىسكەرلىك ەكەنىن تالاي مارتە ايتتى. ەلىمىزدىڭ الدىندا ەكونوميكالىق جانە الەۋمەتتىك ۇلكەن وزگەرىستەر تۇرعانى بايقالادى. وسى ماقسات جولىنداعى بارلىق باستاماعا قاراپايىم ەڭبەك ادامدارى تىرەك بولاتىنى انىق. ال بۇگىنگى ومىرشەڭ جوبالارىمىزدى ءوسىپ كەلە جاتقان ۇرپاق جالعاستىرادى. مەنىڭ بالالارىم مەن نەمەرەلەرىم مارتەبەلى ماماندىقتى ءارى قاراي يگەرىپ, سالانىڭ باعىن جاندىرا بەرەتىنىنە سەنىمدىمىن. جاستارىمىز ءاردايىم جاسامپازدىق پەن جاڭاشىلدىققا ۇمتىلسا, جامان بولمايدى», دەيدى قۇرمەتتى ەنەرگەتيك.
ايتىپ وتەيىك, قابيدەن ومارعالي ۇلى ەل تاۋەلسىزدىگىنىڭ مەرەيتويلىق مەدالدارىمەن, سالالىق قۇرمەت گراماتولارىمەن ماراپاتتالعان. اۋلەتتىڭ وزگە مۇشەلەرى دە لايىقتى ماراپات-سىيلىقتان كەندە ەمەس. سەيىتجانوۆتاردىڭ تىنىمسىز تىرلىگى ەلدەگى ەنەرگەتيكا سالاسىنا قوماقتى ۇلەسىن قوسۋدا دەپ قابىلداعان دۇرىس. اۋلەتتىڭ ءاربىر مۇشەسى قۋات ءوندىرۋ سالاسىنىڭ زەينەتىن كورىپ, بەرەكەلى عۇمىر كەشسىن دەيمىز.
پاۆلودار وبلىسى,
ەكىباستۇز قالاسى
