– بيىل مەكەمەمىزدىڭ 35 جىلدىعىنا وراي «مۇراجايلار قوناققا كەلەدى» جوباسى ۇيىمداستىرىلدى. بىزگە وسىعان دەيىن پاۆلوداردان كورمە كەلدى. بۇل كورمە – بەينەلەۋ ونەرى تاريحىمەن بايلانىستىڭ ءبىر ءتۇرى. مۇندا ەلىمىزدىڭ بەلگىلى سۋرەتشىلەردىڭ جۇمىستارى ۇسىنىلعان. ءبىز وسى تۋىندىلاردا بەينەلەنگەن وتكەن داۋىرمەن بايلانىستا ءومىر ءسۇرىپ جاتقانىمىزدى سەزىنەمىز, – دەيدى مۋزەي باسشىسى بيبىگۇل قۇداباەۆا.
كورەرمەندەردىڭ نازارىنا شايماردان ساريەۆ, جاناتاي شاردەنوۆ, ساحي رومانوۆ, مۇحيت قاليموۆ, جولامان ارالباەۆ, ماناربەك داۋلەتياروۆ, قامباربەك امانوۆ, سادىر كارىباي, رافاەل سلەكەنوۆ تاعى دا باسقا قىلقالام شەبەرلەرىنىڭ تۋىندىلارى ۇسىنىلدى.
– جىل سايىن ءبىزدىڭ مۇراجاي كوشپەلى كورمە ۇيىمداستىرادى. ءبىز قاراعاندىلىق كورەرمەنگە « ۇلى دالا بوياۋلارى» اتتى ەكسپوزيتسيانى ۇسىنامىز. مۇندا قورىمىزدان 70 كارتينا اكەلدىك. تۋىندىلاردى تاڭداۋدا ۇرپاقتار ساباقتاستىعىن بۇزباۋعا تىرىسامىز. كورمەگە اعا, ورتا بۋىن جانە جاس سۋرەتشىلەردىڭ كارتينالارى كىردى. مۋزەيلەر تاجىريبە الماسىپ, تىعىز جۇمىس ىستەۋى كەرەك. سول ءۇشىن دە وسىندامىز. ءبىزدىڭ مۇراجايدا 2 205 كەسكىندەمە, گرافيكا بار, – دەيدى شايماردان ساريەۆ اتىنداعى اتىراۋ وبلىستىق كوركەم جانە ساندىك-قولدانبالى ونەر مۋزەيىنىڭ ديرەكتورى تولەگەن ورىنباسار ۇلى.
كورمەنىڭ اشىلۋىندا ەكى مۋزەي باسشىسى ىنتىماقتاستىقتى نىعايتۋ تۋرالى مەموراندۋمعا قول قويدى.
قاراعاندى وبلىسى
