ليۆيانىڭ شىعىسىن باقىلايتىن اكىمشىلىكتىڭ وكىلى موحاممەد ءابۋ-لامۋشا مەملەكەتتىك اقپارات اگەنتتىگىنە بەرگەن سۇحباتىندا قازا تاپقانداردىڭ سانى 5 300-دەن اسقانىن حابارلادى. شىعىس ۇكىمەتىنىڭ تاعى ءبىر وكىلى تاريك ءال-حارراز بۇكىل اۋدانداردى سۋ شايىپ, كوپتەگەن مۇردەنىڭ تەڭىزگە اعىپ كەتكەنىنە توقتالدى.
قازىرگى تاڭدا زيراتتاردا مايىتتەر جۇزدەپ سانالادى. ءتىرى قالعاندار ولاردى ارەڭ-ارەڭ تانىپ جاتىر. ءال-حاررازدىڭ ايتۋىنشا, قازا تاپقاندار سانى ون مىڭنان اسىپ كەتۋى ىقتيمال. حالىقارالىق قىزىل كرەست جانە قىزىل جارتى اي ۇيىمدارى دا وسىنداي بولجام جاساپ وتىر.
دۇنيەجۇزىلىك دەنساۋلىق ساقتاۋ ۇيىمىنىڭ ليۆياداعى وكىلدىگىنىڭ قىزمەتكەرى رامي ەلشاحەيبي دەرناداعى جاعداي جانشوشىرلىق ەكەنىن اتاپ ءوتتى. ازاماتتىق اۆياتسيا ءمينيسترى حيچەم چكيۋات قايتىس بولعانداردىڭ كوبى سۋ باسقان جەردە قالعانىن مالىمدەدى.
«مايىتتەر شاشىلىپ جاتىر. تەڭىزدە, جاعالاۋلاردا, عيماراتتاردىڭ استىندا ولگەندەر جۇزدەپ سانالادى. قالانىڭ 25 پايىزى جوعالىپ كەتتى دەسەم, ارتىق ايتقانىم ەمەس. كوپتەگەن عيمارات قيرادى», دەيدى ح.چكيۋات.
ليۆيا تالاي جىلدان بەرى ازاماتتىق سوعىستان كوز اشا الماي كەلەدى. سول سەبەپتى ەلدەگى ينفراقۇرىلىمدار ابدەن توزعان. بۇقارالىق اقپارات قۇرالدارىندا تاراعان اقپاراتقا سۇيەنسەك, ينجەنەرلەر بۇعان دەيىن بوگەتتەردىڭ جارىلۋ قاۋپى بار ەكەنىن, شۇعىل تۇردە جوندەۋ جۇمىستارىن جۇرگىزۋدى ەسكەرتكەن. ليۆيادا ورنالاسقان «Sadeq» ساراپتامالىق ورتالىعىنىڭ نەگىزىن قالاۋشى اناس ءال-گوماتي ماسەلەنى جان-جاقتى زەرتتەۋ كەرەكتىگىنە ەكپىن بەرەدى.
«سولتۇستىك افريكا كليماتتىڭ وزگەرۋىنەن زارداپ شەگەدى. بىراق بۇل جولى سىبايلاس جەمقورلىق پەن بىلىكسىزدىك اپاتقا دۋشار ەتتى. دەرنادا ەۆاكۋاتسيا بولعان جوق. قازىر قالا تۇرعىندارىنىڭ تورتتەن ءبىرى سۋ استىندا قالدى», دەيدى ءال-گوماتي.
