جۋىردا ۆيتسە-پرەمەر سەرىك جۇمانعارين مەملەكەتتىك ورگاندار مەن ۇلتتىق كومپانيالاردىڭ باسشىلارىمەن وتاندىق ءونىمدى وتكىزۋدىڭ جاڭا نارىقتارى جانە قىتاي, يران, اۋعانستانعا ەلدەگى زاماناۋي وندىرىستەر قۇرۋ مۇمكىندىكتەرىن اشاتىن مەملەكەتتەرمەن ىنتىماقتاستىقتى كۇشەيتۋ ماقساتىندا اتقارىلىپ جاتقان جۇمىستار مەن قابىلدانىپ جاتقان شارالاردى تالقىلادى.
قىتايمەن اراداعى ىنتىماقتاستىق – باستى نازاردا. ۆيتسە-پرەمەردىڭ تاياۋداعى اسپاناستى ەلىنە ساپارى قازاقستاندا جوعارى تەحنولوگيالىق وندىرىستەر قۇرۋ بويىنشا كەڭ پەرسپەكتيۆالار اشادى. مەتالداردى وڭدەۋ, ەلەكتروندىق كوممەرتسيا, قۇرىلىس, جاڭا ماتەريالدار مەن تەحنولوگيالار ءوندىرىسى, اوك سالالارىنداعى ءىرى الەمدىك كوشباسشى كومپانيالاردىڭ باسشىلارى ىنتىماقتاستىقتى نىعايتۋعا اشىق قىزىعۋشىلىق ءبىلدىردى.
مەملەكەت باسشىسىنىڭ جولداۋدا بەلگىلەگەن وڭدەۋشى سەكتوردى جەدەل دامىتۋ جانە ءونىمدى جوعارى دەڭگەيدە وڭدەيتىن كلاستەرلەردى قۇرۋ تۋرالى مىندەتىن ءتيىمدى ارىپتەستىك پەن ۇزدىك تاجىريبەلەردى ەنگىزۋ ارقاسىندا ورىنداۋعا بولادى.
«قىتاي – ءبىزدىڭ شىعىستاعى ەڭ جاقىن كورشىمىز جانە ونىمدەرىمىزدى وتكىزەتىن ەڭ تارتىمدى جانە قولجەتىمدى نارىقتاردىڭ ءبىرى. ساپار بارىسىندا ءبىز جەتى ءىرى كومپانيامەن كەزدەسۋلەر وتكىزدىك, شەنچجەندەگى دوڭگەلەك ۇستەلدە تۇقىم, فوسفور تىڭايتقىشتارى, پەستيتسيدتەر وندىرەتىن قاۋىمداستىقتار, كولىك, لوگيستيكا, سەرتيفيكاتتاۋ كومپانيالارى وكىلدەرىمەن تانىستىق, ولاردىڭ بارلىعى بىرلەسىپ جۇمىس ىستەۋگە جانە تاجىريبە, تەحنولوگيا, عىلىمي ازىرلەمەلەرمەن الماسۋعا دايىن ەكەندەرىن ءبىلدىردى. ەندى ءبىز ىنتىماقتاستىق باعىتىنان باستاپ جوبانى قازاقستاندا لوكاليزاتسيالاۋعا دەيىن ءار كومپانيا بويىنشا ءوزارا ءىس-قيمىل الگوريتمىن پىسىقتاۋ قاجەت. الگوريتمدى پىسىقتاۋ ءۇشىن «Qaztrade», «Kazakh Invest» جانە «اتامەكەن» ۇكپ وكىلدەرىنەن جۇمىس توبىن قۇرۋدى جانە بارلىق مۇددەلى مينيسترلىك جانە ۆەدومستۆومەن جوبالاردىڭ جول كارتاسىن قۇرۋدى تاپسىرامىن», دەدى سەرىك جۇمانعارين.
سونداي-اق كەڭەستە قازاقستان مەن يران اراسىنداعى تاۋار اينالىمىن 3 ملرد دوللارعا دەيىن جەتكىزۋ جونىندەگى ءىس-شارالار تالقىلاندى. قۇجات جوباسى اوك, كولىك جانە لوگيستيكا, مۇناي-گاز سالاسىنداعى ينفراقۇرىلىمدىق جوبالاردى دامىتۋعا باعىتتالعان 30 ءىس-شارادان تۇرادى. ونى يران تاراپى قاراپ جاتىر. ەاەو مەن يران اراسىنداعى ەركىن ساۋدا ايماعى تۋرالى كەلىسىمگە وسى جىلدىڭ سوڭىنا دەيىن قول قويىلادى دەپ كۇتىلۋدە, وسىعان وراي بۇل قۇجات اسا وزەكتى بولىپ وتىر.
بۇدان باسقا قازاق-اۋعان بيزنەس-فورۋمى بارىسىندا قول قويىلعان كەلىسىمدەردى ىسكە اسىرۋ ءۇشىن اۋعانستانمەن ءوزارا ەسەپ ايىرىسۋ تەتىكتەرى تالقىلاندى.
