ەرلەردىڭ جەكەلەگەن سايىسىندا بەس دۇركىن وليمپيادا جانە 13 دۇركىن الەم مەن ازيا چەمپيونى ما لۋنگتىڭ قارقىنىنا ەشكىم شىدامادى. ودان بولەك, قىتايلىق ويىنشى ءار جىلدارى الەم كۋبوگىندە سەگىز جانە ازيا ويىندارىندا بەس مارتە باس جۇلدەنى ولجالادى. فينالدا ول ءوزىنىڭ وتانداسى, كوماندالىق ەسەپتە وليمپيا ويىندارىنىڭ جەڭىمپازى, دۇنيەجۇزىلىك دودادا سەگىز رەت جەڭىس تۇعىرىنىڭ ەڭ بيىك ساتىسىنا كوتەرىلگەن فان چجەندۋندى جەڭدى. قولا مەدالدى تايپەيلىك لين يۋن-دجۋ مەن قىتايدىڭ تاعى ءبىر وكىلى ليان تسزينكۋن ەنشىلەدى. قازاقستاننىڭ ەڭ ۇزدىك سپورتشىلارى كيريلل گەراسيمەنكو مەن الان قۇرمانعاليەۆ 1/8 فينالعا دەيىن جەتتى.
ايەلدەردىڭ جارىسىندا جۇلدەلى ورىنداردىڭ بارلىعىن قىتاي سپورتشىلارى ولجالادى. اتاپ ايتساق, ۆان مانيۋ – ءبىرىنشى, سان ينشا – ەكىنشى جانە چەن سينتۋن مەن ۆان يدي – ءۇشىنشى ساتىلارعا جايعاستى. بۇلاردىڭ بارلىعى دا اتاعى الىسقا جايىلعان سپورتشىلار. ءبىزدىڭ زاۋرەش اقاشەۆا مەن اناستاسيا لاۆروۆا 32 ۇزدىك ۇستەل تەننيسشىلەرىنىڭ ساناتىنا قوسىلدى.
جەرلەستەرىمىزدىڭ اراسىنان ەڭ ۇزدىك كورسەتكىشكە ايەلدەردىڭ جۇپتىق سايىسىندا قول جەتكىزدىك. زاۋرەش اقاشەۆا/اناستاسيا لاۆروۆا جانە سارۆينوز مىرقادىروۆا/انگەلينا رومانوۆسكايا جۇبى 1/8 فينالدا ونەر كورسەتتى. ەرلەردەن ونداي قارقىن بايقالمادى. ولار قالىڭ توپتىڭ اراسىندا قالىپ قويدى. ال ميكستە كيريلل گەراسيمەنكو/اناستاسيا لاۆروۆا جانە ايدوس كەنجەعۇلوۆ/زاۋرەش اقاشەۆا جۇبى 1/16 فينالدا ءسۇرىندى.
كوماندالىق باسەكەدە قازاقستاننىڭ ەرلەر جانە ايەلدەر قۇراماسى شيرەك فينالعا دەيىن جەتىپ, قورىتىندى ەسەپتە سەگىزىنشى ورىندى قاناعات تۇتتى. وسى مەجەگە جەتكەن كوماندالاردىڭ بارلىعى دا 2024 جىلى جالاۋى جەلبىرەيتىن الەم چەمپيوناتىنا جولداما الدى. ءبىر قۋانىشتىسى, سولاردىڭ قاتارىندا وتانداستارىمىز دا بار. ەرلەر سايىسىندا قىتاي قارسىلاس شاق كەلتىرمەسە, تايپەي مەن وڭتۇستىك كورەيا كۇمىس پەن قولا مەدالدى يەلەندى. ايەلدەر اراسىندا دا قىتايلىقتاردىڭ قارقىنىنا ەشكىم شىدامادى. فينالدا ولار كورەيلەردى ۇتتى. ال جاپونيانىڭ ورەندەرى ءۇشىنشى ورىنعا تابان تىرەدى.
