US open دوداسىنىڭ جارتىلاي فينالىندا جەڭىلىس تاپقان الەمنىڭ ءبىرىنشى راكەتكاسى كارلوس الكاراس ءوز ورنىن نوۆاك دجوكوۆيچكە بوساتتى. قورجىنىندا 8535 ۇپايى بار 20 جاستاعى يسپانيانىڭ اسقان دارىن يەسى قازىرگى كەزدە ەكىنشى ورىندى ەنشىلەۋدە. اتالعان تۋرنيردە توپ جارعان سەربيانىڭ ساڭلاعى ولجالاعان ۇپايلار سانىن 11795-كە جەتكىزىپ, قايتا ءوز تۇعىرىنا قوندى. ءدۇبىرلى دودانىڭ فينالىنا دەيىن جەتكەن دانيل مەدۆەدەۆ ۇزدىك ۇشتىكتى تۇيىندەدى. رەسەيدىڭ وكىلى 7280 ۇپاي يەلەنىپ وتىر. سونداي-اق توپ-10 ويىنشىنىڭ قاتارىنا حولگەر رۋنە (دانيا, 4710 ۇپاي), ستەفانوس تسيتسيپاس (گرەكيا, 4615), اندرەي رۋبلەۆ (رەسەي, 4515), ياننيك سيننەر (يتاليا, 4465), تەيلور فريتتس (اقش, 3955), كاسپەر رۋد (نورۆەگيا, 3560) جانە الەكساندر زۆەرەۆ (گەرمانيا, 3030) ەندى.
قازاقستاننىڭ تەننيسشىلەرى اراسىنداعى ەڭ ۇزدىك كورسەتكىش الەكساندر بۋبليككە (1349 ۇپاي) تيەسىلى. 26 جاستاعى جەرلەسىمىز اتر رەيتينگىندە 29-ورىندا تۇر. وزگە ويىنشىلارىمىز مىناداي ساتىلارعا جايعاستى: تيموفەي سكاتوۆ (498) – 123-ورىن, ميحايل كۋكۋشكين (250) – 244, دەنيس ەۆسەەۆ (229) – 261, بەيبىت جۇقاەۆ (186) – 283, دميتري پوپكو (103) – 434 جانە گريگوري لوماكين (29) – 811.
وسى كۇنگە دەيىن ايەلدەردىڭ باسەكەسىندە الدىنا جان سالماي كەلگەن يگا سۆەنتەك (8185) اقش-تىڭ اشىق بىرىنشىلىگىنىڭ ءتورتىنشى كەزەڭىندە ءسۇرىندى. سونىڭ سالدارىنان 22 جاستاعى پولشانىڭ وكىلى ءبىر ساتى تومەن سىرعىدى. ونىڭ ورنىن ارينا سوبولەنكو (9266) باستى. 25 جاستاعى بەلارۋستىڭ بەتكەۇستارى نيۋ-يوركتە فينالدا ۇتىلعانىنا قاراماستان, بۇگىنگى تاڭدا الەمنىڭ ءبىرىنشى راكەتكاسى اتانىپ وتىر. ال نيۋ-يوركتەگى ءدۇبىرلى دودادا باس جۇلدەنى ولجالاعان كوري گاۋفف (6165) ۇزدىكتەر تىزىمىندە ءۇشىنشى ورىنعا كوتەرىلدى. جالپى, 19 جاستاعى اقش تەننيسشىسىنىڭ بۇل تابىسىنا تاڭدانۋعا بولماس. ول ۋاقىت وزعان سايىن دارا تالانتىمەن وقشاۋلانۋدا. بىلتىر گاۋفف رولان گارروستىڭ اقتىق سىنىنا دەيىن القىنباي جەتىپ, شەشۋشى تۇستا يگا سۆەنتەككە جول بەردى. بيىل «ۇلكەن دۋلىعا» ساناتىنداعى تۋرنيردە تۇڭعىش رەت توپ جاردى.
قازاقستاننىڭ ءبىرىنشى راكەتكاسى ەلەنا رىباكينا (5665) US open تۋرنيرىندەگى ساتسىزدىكتەن كەيىن ءبىر ساتى تومەندەپ, قازىرگى كەزدە بەسىنشى ورىندى قاناعات تۇتۋدا. ءتورتىنشى ورىنعا امەريكالىق دجەسسيكا پەگۋلا (5755) كوتەرىلدى. نيۋ-يوركتە ەلەنا ءۇشىنشى اينالىمدا جەڭىلىستىڭ كەرمەك ءدامىن تاتسا, دجەسسيكا ءتورتىنشى كەزەڭگە دەيىن جەتتى. سونداي-اق ۇزدىكتەر تىزىمىندە ماركەتا ۆوندروۋشوۆا (چەحيا, 3830), ونس جابەر (تۋنيس, 3772), كارولينا مۋحوۆا (چەحيا, 3765), ماريا ساككاري (گرەكيا, 3525) جانە مەديسون كيز (اقش, 2940) بار.
ەلەنا رىباكينادان بولەك, قازاقستاننىڭ وزگە تەننيسشىلەرى قازىرگى كەزدە مىناداي ورىنداردى يەمدەنۋدە: يۋليا پۋتينتسەۆا (767) – 83-ورىن, جىبەك قۇلامباەۆا (101) – 492-ورىن, گوزال اينيتدينوۆا (62) – 621 جانە اننا دانيلينا (25) – 864.
جۇپتىق سايىستاردا دا كوشباسشىلار وزگەردى. ەرلەر اراسىندا ۇلىبريتانيالىق نيل سكۋپسكيدى (6950) امەريكالىق وستين كرايچەك (7750) پەن حورۆاتيالىق يۆان دوديگ (7240) جىلى ورنىنان ىعىستىردى. ءتورتىنشى جانە بەسىنشى ورىنداردى نيدەرلاندتىق ۋەسلي كوولحوف (6800) پەن اقش-تىڭ تاعى ءبىر وكىلى رادجيۆ رام (5597) ءوزارا بولىسۋدە. ءبىزدىڭ الەكساندر نەدوۆەسوۆ 46-ساتىعا تۇراقتادى. ايەلدەر اراسىندا امەريكانىڭ قوس جۇلدىزى – دجەسسيكا پەگۋلا (6035) مەن كوري گاۋفف (6035) يىق تىرەسىپ تۇر. ەكەۋىنىڭ دە جيعان ۇپايلارى بىردەي. ولاردى بەلگيالىق ەليزا مەرتەنس (5975), چەحيالىق كاتەرينا سينياكوۆا (5625) جانە اۋستراليالىق ستورم حانتەر (5490) وكشەلەپ كەلەدى. قازاقستاننىڭ وكىلى اننا دانيلينا 32-ورىندى يەلەنۋدە.
