فوتو: اشىق دەرەككوز
«جالپى العاندا, قازاقستاندا شاعىن جانە ءىرى بيزنەس ءۇشىن وتە جاقسى جاعداي جاسالعان. ءىرى بيزنەس ورنىقتى دامىپ كەلەدى جانە تابىسى مول. ول ءۇشىن مەملەكەتتىك ساياسات قولدانىستاعى ەرەجەلەردىڭ تۇراقتىلىعىن قامتاماسىز ەتۋى, فاۆوريتيزم مەن باسەكەگە قابىلەتسىز تاجىريبەلەردىڭ بولۋىنا جول بەرمەۋى ماڭىزدى. بۇل باعىتتا بەلسەندى جۇمىستى جالعاستىرامىز», دەدى پرەزيدەنت وتاندىق بيزنەس وكىلدەرىمەن كەزدەسۋ بارىسىندا.
قاسىم-جومارت توقاەۆتىڭ ايتۋىنشا, شاعىن كاسىپكەرلىك جۇمىسپەن قامتۋ ىسىندە جانە حالىقتىڭ تابىسىن ارتتىرۋدا اسا ماڭىزدى ءرول اتقارادى. بۇل رەتتە سالىق بارىنشا تومەندەتىلدى, تەكسەرۋ ءىس جۇزىندە جوق, قولداۋ قۇرالدارى بار, وزىق ءارى جايلى تسيفرلىق ورتا قۇرىلدى, اكىمشىلىك كەدەرگىلەر ۇدايى ازايىپ كەلەدى.
«الايدا بىزدە ونى بيزنەستىڭ ەڭ ماڭىزدى ورتا سەگمەنتىنە كوشىرۋ ءۇشىن ىنتالاندىرۋ جولدارى قاراستىرىلماعان. وسى رەتتە ورتا بيزنەستىڭ سىرتقى نارىقتا دامۋى, باسەكەگە قابىلەتتى جاڭا ونىمدەردى ءوندىرۋى جانە ونى ەكسپورتقا شىعارۋى ءۇشىن مۇمكىندىكتەرى مەن ايتارلىقتاي ىنتالاندىرۋ قۇرالدارى بار», دەپ قوستى پرەزيدەنت.
مەملەكەت باسشىسى اتاپ وتكەندەي, ورتا كاسىپكەر الدەقايدا شيراق, ءموبيلدى جانە قۇبىلمالى نارىقتىق جاعدايلارعا تەز بەيىمدەلەدى.
ء«يا, سوڭعى 7 جىلدا ءىجو-دەگى شاعىن جانە ورتا كاسىپكەرلىك ۇلەسىنىڭ وسكەنى بايقالادى. بىراق بۇل ديناميكانىڭ نەگىزگى قوزعاۋشى كۇشى – شاعىن كاسىپكەرلىك سۋبەكتىلەرى. ولاردىڭ سانى 46 پايىزعا كوبەيدى. وسى ورايدا ورتا كاسىپكەرلىك تەك 0,5 پايىزعا ءوسىپ, ەكونوميكاداعى ۇلەسىن 5 پايىزدان 6,2 پايىزعا دەيىن ارتتىردى. بۇل رەتتە ەىدۇ ەلدەرىندە ونىڭ ۇلەسى ورتا ەسەپپەن 18 پايىزعا تەڭ, ال جەكەلەگەن مەملەكەتتەردە ودان دا جوعارى, ياعني 26 پايىزعا دەيىن. ءدال وسى ورتا بيزنەستى, اسىرەسە وڭدەۋ ونەركاسىبىندەگى كاسىپكەرلىكتى قولداۋ ءۇشىن ەلىمىزدە ەشقانداي ەرەكشە جاعداي جاسالماعان. كەرىسىنشە, قازىرگى ءنورماتيۆتى ورتادا, ولارعا, ءتىپتى كەڭەيگەن كەزدە دە, ءفورمالدى تۇردە شاعىن بيزنەس بولىپ قالۋ تيىمدىرەك. ۇكىمەتكە جانە «اتامەكەن» پالاتاسىنا وسى ماسەلە بويىنشا ۇسىنىس ەنگىزىپ, ناقتى ىسكە كوشۋدى تاپسىرامىن», دەپ تۇيىندەدى قاسىم-جومارت توقاەۆ.
