«ۇلتتىق ساپا ورتالىعىنىڭ نەگىزگى ماقساتى – ەلىمىزدەگى اۆتوموبيل جولدارىن سالۋ, قايتا جاڭعىرتۋ, جوندەۋ, كۇتىپ ۇستاۋ كەزىندەگى جۇمىستارعا, قۇرىلىسقا پايدالانىلاتىن ماتەريالداردىڭ ساپاسىنا ساراپتاما جۇرگىزۋ, دياگنوستيكالاۋ جانە اسپاپتىق تەكسەرۋدەن وتكىزۋ, حالىقارالىق جانە رەسپۋبليكالىق ماڭىزى بار اۆتوموبيل جولدارىنداعى ينفراقۇرىلىم قاۋىپسىزدىگىنە مونيتورينگ جاساۋ. ال جەرگىلىكتى فيليالدار جىلجىمالى زەرتحاناسى بار اۆتوكولىكپەن قۇرىلىس جۇمىستارى اياقتالعان جول تەلىمدەرىنىڭ, جالپى پايدالانۋداعى اۆتوموبيل جولدارىنىڭ ساپاسىن تەكسەرەدى», دەيدى «جول اكتيۆتەرىنىڭ ساپاسى ۇلتتىق ورتالىعى» رمك باس ديرەكتورى زامير ساعىنوۆ.
اتىراۋ وبلىستىق فيليالى بيىل 79 جولدى باقىلاۋعا العان. ءتورت جىلدان بەرى ماماندار 341 نىسانعا 3 612 رەت تەكسەرۋ جۇرگىزىپتى. تەكسەرۋ كەزىندە 1 038 اقاۋ انىقتالعان. ونىڭ ىشىندە 247 ورەسكەل اقاۋ بار. جول قۇرىلىسىنا پايدالانىلاتىن ماتەريالداردان 5 903 سىناما الىنىپ, زەرتحانادا تەكسەرىلدى. سونىڭ ناتيجەسىندە 900 سىنامانىڭ ەلىمىزدىڭ جول سالاسىنداعى ستاندارتتارىنا سايكەس بولماي شىققان.
جەرگىلىكتى فيليال ماماندارىنىڭ انىقتاعان اقاۋعا بايلانىستى جولدىڭ 90 263 شارشى مەتر كەدىر-بۇدىرلى بەتى وڭدەلگەن. سونداي-اق 14 584 شارشى مەتر اسفالتبەتون جامىلعىسى, 5 896 شارشى مەتر جول نەگىزى, 631 تەكشە مەتر تەمىربەتون, 775 كوپىر قايتا سالىنعان. مەردىگەر كومپانيالار ءوز ەسەبىنەن 357 ملن تەڭگەنىڭ جۇمىسىن قايتا جاساۋعا ءماجبۇر بولعان.
ماسەلەن, «جول اكتيۆتەرى ساپاسىنىڭ ۇلتتىق ورتالىعى» رمك اتىراۋ وبلىستىق فيليالىنىڭ ءبولىم باسشىسى نۇرلان ءجانتۋريننىڭ ايتۋىنشا, بيىلعى ساۋىردە «اقتوبە-اتىراۋ-رف شەكاراسى» باعىتىنداعى جولدىڭ «اتىراۋ-دوسسور» بولىگىندە 120 500 شارشى مەتردەن قارا قيىرشىقتاستىڭ ۇشقانى انىقتالعان. سوعان بايلانىستى اقاۋ مەردىگەر مەكەمەنىڭ قارجىسىنا قايتا جوندەۋ ۇيعارىلعان.
«قازىر جولدىڭ بۇل بولىگى كەپىلدىك مەرزىمىندە تۇر. الايدا مەردىگەر اۋا رايى قولايلى كەزدە اقاۋلاردى تولىعىمەن جويۋ جۇمىسىن ۋاقىتىندا باستامادى. سول سەبەپتەن تاپسىرىس بەرۋشى «قازاۆتوجول» اق اتىراۋ وبلىسى بويىنشا فيليالىنا جانە وبلىستىق مەملەكەتتىك ساۋلەت-قۇرىلىس باقىلاۋ باسقارماسىنا حات جولدادى. ويتكەنى 553-589 شاقىرىم ارالىعىنداعى جولعا 2021 جىلعى قىركۇيەكتە ورتاشا جوندەۋ باستالىپ, 2022 جىلدىڭ جەلتوقسان ايىندا تاپسىرىلعان. ەندى اتالعان جول بولىگىنىڭ بەتكى قاباتىن قايتا توسەۋ جۇمىستارى «ماڭعىستاۋ قۇرىلىس كومبيناتى» اق-نىڭ قارجىسىنا جاسالدى», دەيدى ن.جانتۋرين.
مەردىگەر كومپانياعا قاراستى جول ۋچاسكەسىنىڭ جەتەكشىسى ناۋرىز سۇيىنعارانىڭ ايتۋىنا قاراعاندا, بۇل جولدىڭ ەكى جىلدىق كەپىلدىك مەرزىمى بار. «جول اكتيۆتەرىنىڭ ۇلتتىق ساپا ورتالىعى» رمك فيليالى انىقتاعان كەمشىلىكتەردى جويۋ ءۇشىن ماماندار ماڭعىستاۋدان كەلگەن. ولار جول ۇستىندەگى تاڭبالاردى قىرىپ, تازالاۋ جۇمىستارىن جۇرگىزدى. سودان سوڭ 12 شاقىرىمعا تۇگەلدەي جانە كەي تۇستارىنا 1 500 توننا قارا قيىرشىقتاس توسەلدى.
اتىراۋ وبلىسى
