جارتىلاي فينالدا دانيل مەدۆەدەۆ الەمنىڭ ءبىرىنشى راكەتكاسى, يسپانيالىق كارلوس الكاراستان ايلاسىن اسىرعاندا بارشا ساراپشى مەن جانكۇيەر اقتىق سىندا ول نوۆاك دجوكوۆيچكە لايىقتى قارسىلىق كورسەتىپ قانا قويماي, باس جۇلدەنى ولجالاۋى دا ابدەن مۇمكىن دەپ توپشىلاعان ەدى. بىراق ولاي بولمادى. فينالدىق سايىس سەربيا ساڭلاعىنىڭ ايقىن باسىمدىعىمەن ءوتتى. باسەكە بارىسىندا رەسەيلىك ويىنشى بىردە-ءبىر رەت برەيك جاساعان جوق. ال نوۆاك بولسا, بىرنەشە رەت ءدانيلدىڭ بەرگەن دوبىنا يەلىك ەتە الدى. ناتيجەسىندە, ءۇش سەتتىك سايىس 6:3, 7:5, 6:3 ەسەبىمەن اياقتالدى. بۇل كەزدەسۋ 3 ساعات 17 سەكۋندقا سوزىلدى.
ەستەرىڭىزگە سالا كەتەيىك, نوۆاك بيىلعى US Open تۋرنيرىندە دانيل مەدۆەدەۆتەن بولەك, الەكساندر ميۋللەر (فرانتسيا), بەرنابە ساپاتا-ميرالەس (يسپانيا), لاسلو دەرە (سەربيا), بورنا گويو (حورۆاتيا), تەيلور فريتس (اقش) جانە بەن شەلتوندى (اقش) شاڭ قاپتىردى. رەسەيدىڭ وكىلى كارلوس الكاراستان بولەك, اتيللا بالاج (ماجارستان), كريستوفەر و’كوننەلل (اۋستراليا), سەباستيان باەس (ارگەنتينا), الەكس دە مينور (اۋستراليا) جانە اندرەي رۋبلەۆتەن (رەسەي) باسىم ءتۇستى.
وسىلايشا, نوۆاك دجوكوۆيچ «ۇلكەن دۋلىعا» ساناتىنداعى جارىستاردا جەڭىپ العان جۇلدەلەر سانىن 24-كە جەتكىزدى. بۇل – ەرلەر اراسىنداعى رەكوردتىق كورسەتكىش. تارقاتىپ ايتساق, ول US Open دوداسىندا ءتورت مارتە دارالانسا, رولان گارروستى ءۇش رەت ۇتتى. ۋيمبلدوننىڭ جەتى دۇركىن جەڭىمپازى اتانسا, اۋستراليانىڭ اشىق بىرىنشىلىگىندە 10 رەت الدىنا جان سالمادى. نوۆاك اتالعان جارىستاردىڭ فينالىندا بارلىعى 47 رەت ونەر كورسەتتى. بۇل دا رەكوردتىق ناتيجە. سالىستىرمالى تۇردە الساق, يسپانيالىق رافاەل نادالعا بۇل بەلەس 22 رەت باعىنسا, شۆەيتساريالىق رودجەر فەدەرەردىڭ 20 مارتە مەرەيى ۇستەم بولدى. ال ايەلدەر اراسىندا مارگارەت كورتتىڭ شوقتىعى بيىك. وتكەن عاسىردىڭ الپىسىنشى جانە جەتپىسىنشى جىلدارى اتوي سالعان اۋستراليانىڭ وكىلى دە «ۇلكەن دۋلىعا» دودالارىندا 24 رەت توپ جاردى. دەسەك تە دجوكوۆيچتىڭ بۇل رەكوردتى جاڭارتۋىنا ءالى دە مۇمكىندىگى بار. ويتكەنى كورت ۇلكەن سپورتتان الدەقاشان قول ءۇزىپ كەتكەن, ال 36 جاستاعى سەربيالىق تەننيسشى بۇل كۇندەرى بابىندا. وسى تابىسىنىڭ ارقاسىندا نوۆاك الەمدىك رەيتينگتە قايتا كوش باستادى.
ايەلدەردىڭ جۇپتىق سايىسى گابريەلا دابروۆسكي (كانادا) مەن ەرين ءرۋتليفتىڭ (جاڭا زەلانديا) جەڭىسىمەن اياقتالدى. فينالدا ولار لاۋرا زيگەمۋند (گەرمانيا) پەن ۆەرا زۆونارەۆانى (رەسەي) ۇتتى – 7:6, 6:3. ەرلەردىڭ جۇپتىق باسەكەسىندە رادجيۆ رام (اقش) مەن دجو سولسبەريدىڭ ( ۇلىبريتانيا) باعى جاندى. شەشۋشى تۇستا ولار روحان بوپاننا ء(ۇندىستان) مەن مەتتيۋ ەبدەندى (اۋستراليا) ءسۇرىندىردى – 2:6, 6:3, 6:4.
قازاقستان تەننيسشىلەر جايىندا ايتار بولساق, اقش-تىڭ اشىق بىرىنشىلىگىنىڭ جەكەلەگەن سايىسىنداعى ەڭ ۇزدىك كورسەتكىش ەلەنا رىباكيناعا تيەسىلى. ول مارتا كوستيۋك (ۋكراينا) پەن ايلا ءتومليانوۆيچتى (اۋستراليا) ۇتىپ, ءۇشىنشى كەزەڭدە سورانا كرىستياعا (رۋمىنيا) ەسە جىبەردى. يۋليا پۋتينتسەۆا تۇساۋكەسەر كەزدەسۋىندە تىزە بۇكتى. يتاليالىق مارتينا ترەۆيزاندى العاشقى سەتتە 6:0 ەسەبىمەن ۇتقانىمەن, ودان كەيىن ەكى رەت تاي-برەيكتە ۇتىلدى. ەرلەر اراسىندا سىنعا تۇسكەن الەكساندر بۋبليك پەن تيموفەي سكاتوۆتىڭ ەكەۋى دە العاشقى اينالىمنان اسا المادى. بۋبليك دومينيك تيمگە (اۋستريا), سكاتوۆ الەكس دە مينورعا (اۋستراليا) جول بەردى. بۇعان دەيىن حابارلاعانىمىزداي, ەسەسىنە قازاق ەلىنىڭ جانكۇيەرلەرى اننا دانيلينانىڭ جەڭىسىنە ەرەكشە شاتتاندى. ارالاس جۇپتار سايىسىندا جەرلەسىمىز فينليانديالىق حارري حەليوۆاارامەن بىرگە قارسىلاس شاق كەلتىرمەي, باس جۇلدەنى ولجالادى.
